Ezequiel 37

I chaqij taq b'aq

1I Ajwal xuya u'ab' pinwi yin, xaq xu'an chwe chi are xin-el b'ik lik in nojnaq che ucho'ab', i xinuya chwach jun ta'aj chi nojnaq te'eq che b'aq. 2I Ajwal xu'an chwe chi xinb'in k'ulala; i b'aq unojsam uwach i ta'aj, lik je k'i xaq lik je chaqij. 3Are uri xub'ij chwe: “¿Kakoj yet chi i b'aqi kewalij chik xaq kek'asi chik?” Yin xinla' uwach che: “Ajwal, xwi yet aweta'am.”

4Are uri i Ajwal xub'ij chwe: “Chatch'aw pinb'i chke i b'aqi. Chab'ij chke: Chaqij taq b'aq, chita i tzijoniki re i Ajwal. 5I Ajwal kub'ij chiwe: Kin-an chiwe yix chi kok uxlab' re k'aslemal chiwe, re kixk'asi tan chik. 6Kinkoj ni ib'och' chiwe, kinch'uq ni iwij che i ti', kinkoj ni itz'umalil, xaq kinya i uxlab' re k'aslemal chiwe, keje ile kixk'asi tan chik. Are uri kiwetamaj ni yix chi Yin in Ajwal.” 7Yin xe'in-ijla pacha in utaqom ire chu'anik. Tz'aqat kintijin che lapanik ku', xinta chi o xluk'kanik. Are jun kab'raqan, i b'aq xkijeq unak'ik kib' chkiwach. 8Xaq xwilo chi chkij i b'aq le xwinaqir ib'och', ti', xaq xch'uqtaj kij ru' tz'umalil. Xwiri nti kuxlab' re k'aslemal.

9Are uri i Ajwal xub'ij chwe: Chatch'aw pinb'i che i uxlab' re i k'aslemal i chab'ij che: Keje iri kub'ij i Ajwal: Uxlab' re k'aslemal, chatk'un che i kajib' uchi' uwach i jyub' ta'aj i chaya kik'aslemal i ch'akulaji chi je kamnaq. 10Yin xinch'aw pub'i i Ajwal, pacha xinutaq Ire chu'anik, i uxlab' re k'aslemal xk'unik i xok chke ike, ike xek'asi chik i xetak'i'ik. Lik je k'i i winaq rumali xyiji jun nim laj tzob'aj.

11Are uri i Ajwal xub'ij chwe: I tinimit re Israel keje pacha taq i b'aqi. Ketijin chub'ixkil: I qab'aqil lik je chaqij; lik nti chik qoy-em che, lik oj sachnaq. 12Utzi', chatch'aw pinb'i chke xaq chab'ij chke: Iri are kub'ij i Ajwal: Intinimit, kinjaq ni ijul yix, kixwesaj na li chila xaq kin-an ni chiwe chi kixtzalij chik che i jyub' Israel. 13Yin are kinjaq ijul xaq kixwesaj li chupam, kiwetamaj ni uri yix, intinimit, chi Yin in Ajwal. 14Yin kinya ni wuxlab' re k'aslemal chiwe yix, i yix kixk'asi tan chik; xaq kixinya chila piwulew. Are uri kiwetamaj ni yix chi Yin in Ajwal, inb'im xaq in anom. Yin in Ajwal, xinb'ij.

Ujunamsaxik tan chik kiwach i tinimit Israel xaq i Judá

15I Ajwal xlapan wu' i xub'ij chwe: 16Chak'ama jun che', chattz'ib'an chwach: Tinimit Judá xaq Israel chi kiya'om kiwach ru' ire. Chak'ama chik jun che', chatz'ib'aj chwach: I ma Efraín chi xuk'exelaj ma José che i tinimit, xaq konojel i kiya'om kiwach chi je are aj Israel chi je o kan chila. 17Te'uri, cha'ana junam chke pa'ab' jun ru' i jun chik, man keje ile xa jun ke'eloq. 18Are i awach aj tinimit kkib'ij chawe: Chab'ij usuk' chqe wach kraj ub'ixkil iri, 19chab'ij chke: Iri are kub'ij i Ajwal: Kink'am b'i che' re ma José chi o pu'ab' ma Efraín xaq ke i jub'an chik tzob'aj chi kiya'om kiwach ru' i tinimit Israel, xaq kin-an junam che ru' uche' i tinimit Judá man keje ile ke'eloq xa jun che' o pin-ab'. 20Chawok'aj pa'ab' chkiwach ike, chekeb' che' chi xattz'ib'an chwach. 21Te'uri chab'ij chke: Iri are kub'ij i Ajwal: Kewesaj li aj Israel chkixol i nimaq taq tinimit ipa xek'iji wi; kinmol ni kichi' che k'ulala taq k'ijib'al xaq kin-an ni chke chi ketzalij chal pkulew. 22Kin-an ni chke ike xa jun nim laj tinimit che i ulewi, chwi taq jyub' re i tinimit Israel, xaq lik xa jun ni kajawinel. Kki'an ti chik keb' nimaq taq tinimit che kib', xaq kkijach ti chik kiwach che i ajawinik. 23Xaq kkitz'ij ti chik kib' chukojik ki'ij i tiox chi xaril je antalik chi lik nti ki'ij xaq kki'an ti chik k'iyal taq uwach mak atzalal. Yin kixwesaj ni chwach ni'pa taq i suk'ul taj chi i'anom, xaq kinch'aj ni imak. Ike keu'on ni intinimit xaq Yin kinu'on ni ki-Dios. 24Wajpatan ma David xwi ire ajawinel xaq xwi ire ajyu'ul chij ke konojel ike, xaq ike kinkikoj na, kki'an na pacha kub'ij in-atb'al tzij xaq intaqanik. 25Kejeqi ni che i ulew chi xinya che wajpatan ma Jacob, xaq ipa xejeqi wi i katit kimam. Arewi chila kejeqi ni ike, i kak'al xaq konojel i kimuq kixikin; wajpatan ma David lik arewi are ire kaj-atzil. 26Kin-an ni jun trat ku' ike, re kinsujuj ni jun kik'aslemal chi lik utz. Lik are ni jun trat chi lik k-e ij saq chrij. Kin-an na chi lik kek'iyar na, xaq ronojel ij saq kinya ni lo'laj wachoch chkixol ike. 27Kinjeqi ni chkixol ike i Yin in ki-Dios na xaq ike je intinimit na. 28I lo'laj wachoch are o ni chkixol ike ronojel ij saq, i jub'an chik nimaq taq tinimit kketamaj na chi incha'om i tinimit Israel man lik we Yin.

Currently Selected:

Ezequiel 37: ACHICUB

Highlight

Copy

Compare