Ezequiel 36
36
Relik i tinimit Israel chisaq k-on panoq
1Yet, winaq, chatch'aw pinb'i Yin chke taq i jyub' naj uwi re Israel, chab'ij chke chi chkita intzij. 2Yin in Ajwal, kinb'ij: I ajch'oj chrij i tinimit Israel, kkich'ob' ike chi je rajaw chik i nimaq taq jyub' naj uwi chi nti uk'isik. 3Rumali, chatch'aw pinb'i i chab'ij chke: Iri are kub'ij i Ajwal: Lik k'ulala kpe ni ch'oj chiwij yix, xaq ksachsax ni iwach; konojel ni'pa taq i tinimit je aj naj, ix o chik pki'ab', i winaq kixkiyo'ya na xaq tzel ni kixkilo. 4Rumali jyub' naj uwi re i tinimit Israel, chita utzijonik i Ajwal chke i jyub' naj uwi, utzam taq jyub', raqana xaq uwa taq ta'aj; tinimit chi wulijnaq xaq nti chik winaq chwach, xaq i tinimit tz'inilik jyub' re i tinimit Israel, chi el-am b'i ub'itaq ke kumal i tinimit chi je o chrij chwach chi xaq je yo'yam kumal ike. 5Iri are kub'ij i Ajwal: Intzij lik kjuluwik rumal woywal chkij jub'an chik tinimit, lik are mas nim woywal chrij ronojel i tinimit Edom, man lik ru' nim laj kikotemal xkimaj i wulew, xaq lik ru' nim laj oywal xkik'am b'i o chwach.
6Chatch'aw pinb'i chrij ulew re Israel, i chab'ij: Iri are kub'ij i Ajwal chke i jyub' naj uwi, utzam taq jyub', raqana xaq i uwa taq ta'aj: Intzij yin lik re k'anil xaq re oywal, rumal i k'ax chi itijom yix xaq i yo'yanik kumal i nimaq taq tinimit aj naj. 7Rumal uri, Yin in Ajwal, kinsaqij ub'ixkil chi i tinimit chi o chiwij chiwach yix, lik kenoj ni che k'ixb'alil. 8Xwiri, yix, jyub' naj uwi re Israel, lik knoj ni iwach che nimaq taq che', xaq lik kewachin na re intinimit Israel, chi lik ya ktzalij loq. 9Yin lik ke'inchajij na, xaq kin-an na chi ktuk uwach xaq ktikik. 10Kin-an na chi kk'iyar i tinimit Israel chi jeqel chila. I tinimit kenoj ni che i winaq, ni'pa taq i je wulijnaq, keyak tan chik. 11Kin-an na chi kek'iyar ni winaq xaq kek'iyar i chikop iwu', xaq lik chek'iyaroq. Lik je k'i ni winaq pacha i ujer, i yix mas lik utz na kina'o chwach ujer. Are uri kketamaj na chi Yin in Ajwal. 12Kin-an na chi intinimit kb'in piwi yix jyub' nimaq uwi re Israel, ike chki'ana ke chiwe pacha je iwajaw, keje ile iwumal yix ksach ti chik kiwach i kak'al.
13Yin in Ajwal, kinb'ij: Chiwe yix jyub' naj uwi, k-ab'ax chiwij chi keitij i winaq, xaq keikanaj kan i tinimit chi nti chik kak'al. 14Lik utzi', yix keitij ti chik i winaq, xaq keikanaj ti kanoq chi nti chik kak'al itinimit. Yin in Ajwal, kinb'ij. 15Kinya taj chi kita tan chik i k'ax laj taq tzij kumal i nimaq taq tinimit aj naj; kik'am ti chik mas yo'yanik chke i tinimit le, man yix kiya ti chik chi itinimit kkanajik nti rak'al. Yin in Ajwal, kinb'ij.
16I Ajwal xlapan wu', i xub'ij chwe: 17I aj Israel are je jeqel te pa kulew, xkiqajsaj u'ij ru' i xaqmanal xki'an pkik'aslemal. I kik'aslemal chinwach Yin xe'eloq pacha tz'il chi lik ch'am taj. 18Are uri xwo'taj li woywal pkiwi ike rumal i kamik chi xki'an pa nim laj tinimit xaq rumal xkiqajsaj in-ij rumal ukojik ki'ij i tiox chi xaril je antalik, 19re yab'al utojb'alil chke rumal i xaqmanal xki'an pkik'aslemal xeinkichersaj b'i chkixol jub'an chik tinimit xaq pa nimaq taq tinimit. 20Xwiri pa ronojel taq tinimit ipa keupon wi te ike, kkiqajsaj u'ij i lo'laj inb'i, rumali i winaq kkib'ij: “Ike ri je are i tinimit re i Ajwal, xwiri xe'el b'i pkulew.” 21Are uri lik k'ax xinna'o are xwilo chi rumal umak i tinimit Israel, i lo'laj inb'i xqajsax u'ij pa nimaq taq tinimit ipa keupon wi te ike.
22Rumali, chab'ij che i tinimit Israel: Iri are kub'ij i Ajwal: I wach kin-ano iwumal ti yix ix aj Israel, Yin kin-an ile rumal i lo'laj inb'i, chi yix iqajsam u'ij chkixol ni'pa i nimaq taq tinimit ipa ix uponnaq wi. 23Yin kink'ut ni chkiwach nimaq taq tinimit i lo'laj u'ij i nim laj inb'i, chi yix iqajsam u'ij chkixol ike; are kin-an Yin ile, ike kketamaj uri, chi Yin in Ajwal. Yin in Ajwal kinb'ij. 24Yin kixwesaj ni yix che ni'pa taq i tinimit le xaq che i nimaq taq tinimit; kinmol ni ichi' xaq kin-an ni chiwe chi kixtzalij chali piwulew. 25Kixinch'aj ni ru' ch'am laj ya, kixinjos-ij ni che ni'pa taq i ch'am taj, kin-an ni ch'am chiwe re elsab'al ukojik ki'ij i tiox chi xaril je antalik. 26Kinkoj ni chiwe yix jun iwanima k'ak' xaq jun uxlab' k'ak'. Kwesaj ni chiwe yix iwanima le chi lik ko pacha ab'aj xaq kinkoj ni jun iwanima chi ko taj. 27Kin-an na chi lik kok ni Intewal pik'ux, xaq kin-an na chi lik kixkojon ni che in-atb'al tzij xaq intaqanik; 28kixjeqi ni che i tinimit chi xinya chke iqajaw ichuch, xaq kixu'an ni intinimit i Yin in i-Dios. 29Kixinto ni chwach ronojel ni'pa xintz'ij chiwe. Kin-an na chi i trigo kk'iyarik xaq lik kitij ti chik numik. 30Xaq kin-an na chi ni'pa taq i che' xaq i ulew kewachin mas, keje ile yix kixik'aw ti chik pa k'ixb'alil chkiwach i jub'an chik nimaq taq tinimit, rumal i numik. 31Are kk'un chik'ux i utz ti laj ik'aslemal, xaq i xaqmanal i'anom, kk'ix ni ipalaj che rumal imak xaq rumal i xaqmanal i'anom. 32Yin in Ajwal, kinb'ij: Chiwetamaj, ix aj Israel chi iri kin-an taj rumal taq we kmajaw chiwe; china ni ik'ixb'alil rumal i suk'ul ti laj nojb'al chi xi'an pik'aslemal.
33Yin in Ajwal, kinb'ij: Are kin-an ch'am chiwe che ni'pa taq imak, kin-an ni chiwe chi kixjeqi pitinimit xaq keiyak chik ni'pa i wulijnaq. 34I jyub' chi kanijnaq te'eq tz'inilik jyub', puk'exel ile chi kkanaj tz'inilik jyub' wo'or kchakunsax ni uwach chkiwach konojel ni'pa keik'aw chila, 35I kb'ix na: I ulewi chi kanajnaq te'eq tz'inilik jyub', wo'or lik keje pacha ktzun i tikonb'al re Edén; i nimaq taq tinimit chi xsachsax kiwach lik xk'is kiwach xaq lik xewulijsaxik, wo'or lik je are jub'an ja chi lik je ko xaq lik je o winaq chupam. 36Are uri i tinimit chi je o chrij chwach chi kek'asi kanoq, kketamaj na chi Yin in Ajwal, kinyak chik i wulijnaq xaq kintik chik ile chi xk'is uwach. Yin in Ajwal, inb'im xaq lik kin-an na.
37Yin in Ajwal, kinb'ij: Lik k'a o ni mas kin-ano. Kinya ni che i tinimit Israel wach kutz'onoj chwe chi kin-an chke ike; kinpaxsaj ni kiwach uwinaq pacha jun tzob'aj chij. 38I tinimit chi je wulijnaq lik kenoj ni che i winaq, chi lik kemajaw na pacha i chij chi pa taq nima'ij kek'am b'i pa tinimit Jerusalén re kkisujuj re kisipon. Are uri kketamaj na chi Yin in Ajwal.
Currently Selected:
Ezequiel 36: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
