Ezequiel 38

Ma Gog, are jun rajchak i Dios

1I Ajwal xlapan wu' i xub'ij chwe: 2Yet, winaq, wo'or chattzalij chik che i tinimit Magog, i chatch'aw pinb'i chrij i ma Gog, chi aj-atzil naj u'ij re i Mesec xaq i Tubal. 3Chab'ij che: Iri are kub'ij i Ajwal: Ma Gog, aj-atzil re Mesec xaq i Tubal, Yin kinsaqij chawe chi in ajch'oj chawij. 4Kin-an chawe chi kattzalij chaloq, kinkoj xok ch'ich' pachi', katwesaj b'i yet xaq konojel i akaway, junam ku' i ke'an chkij chi chomiq ki'u', i je ajch'oj le chi lik je k'i kiyijb'am kib' ru' kich'ojb'al chi k'ulala o uware xaq i jalajuj taq tob'al kib'. 5Kekachi'ilaj nu b'i i winaq re Persia, Etiopía xaq i Libia, konojel ike le kuk'am tob'al kib' xaq kikojom tob'al kijolom, 6xaq konojel i achiyab' chi je yij che i ch'oj re Gomer xaq re Bet-togarma, chi lik naj je o wi che i moxab' xaq i je uk'iyal i tinimit chi kiya'om kiwach awu' yet. 7Chayijb'a awib' xaq chawiqa awib' ru' ach'ojb'al, yet xaq ku' konojel i achiyab' chi je yij che i ch'oj chi je o awu'; lik chki'ana pacha i kab'ij yet. 8Keik'aw ni k'iyal junab' kya' ni jun taqanik chawe chi ka'an ch'oj chrij jun tinimit chi ik'awnaq pa ch'oj, xwiri ya yijinaq chik xaq nti chik pa ch'oj; jun tinimit chi xkichersax b'i chkixol jalajuj nimaq taq tinimit chi lik xsach te uwach ronojel ij saq, xwiri lik xkimol chik kib' chwi taq jyub' re Israel. Che taq ile ike je tzalijnaq tan chaloq che uk'iyal taq tinimit, xaq konojel kejeqi na xaq utz ni kek'iji'ik. 9Katupon ni yet pacha jun nim laj sutz' ch'uqb'al re i tinimit, xaq ka'an ni ch'oj chrij pacha jun nim laj jab' junam ku' awajch'oj xaq ni'pa taq uk'iyal i tinimit.

10Yin in Ajwal, kinb'ij: Che i ij le kach'ob' u'anik itzel laj taq anik. 11Kab'ij: Kin-an ch'oj chrij jun tinimit re kin-an we che, chi nti tob'al re, chke i winaq chi utz kik'aslemal chi xaq lik kul kik'ux, konojel i tinimit chi lik nti tapial chkij, nti uchija xaq nti silik' chke. 12Kwesaj li ub'itaq re xaq kwel-aj b'ik, kin-an ch'oj chkij i tinimit chi je yaktal chik che jun tinimit chi kimolom kib' che jalajuj nimaq taq tinimit, chi o kichikop xaq jub'an chik ub'itaq ke chi xaq je jeqel pa nik'aj che i jyub' ta'aj. 13I winaq re i Sabá xaq i Dedán, xaq i ajk'ayinel re Tarsis xaq jub'an chik tinimit, kkitz'onoj ni chawe: ¿Xatk'un pa el-anik? ¿Xamol kichi' i awinaq chi je yij che i ch'oj re kawesaj b'i ub'itaq re xaq re ka'an awe che i saq-o'oj xaq i an-o'oj, chikop xaq jub'an chik ub'itaq re, re kak'am b'i jun nim laj b'eyomal?

14Xwiri chatch'aw pinb'i che ma Gog, xaq chab'ij che: Iri are kub'ij i Ajwal: Are intinimit Israel utz uk'aslemal, yet kajeq b'inik 15k'a che i awulew, lik k'a naj che i moxab', awachi'ilam li uk'iyal achiyab' chi lik o kicho'ab' chi je yij che i ch'oj, xaq i k'iyal taq tzob'aj ajch'oj chi je o rij taq kaway, 16i ka'an ni ch'oj chrij intinimit Israel. Yet, ma Gog, kach'uq ni uwi i jyub' ta'aj pacha jun nim laj sutz'. Che taq i k'isb'al ij le kin-an ni chawe chi katpe pa ch'oj chrij i wulew, man keje ile awumal yet i jub'an chik nimaq taq tinimit kketamaj na chi Yin kink'ut i ch'am laj in-ij chkiwach ike.

17Yin in Ajwal, kinb'ij: Chawe yet xinb'ij wi, are xinch'aw jela kanoq, are xech'aw wajpatan pinb'i Yin chi je profeta chi je aj Israel; ike xkitzijoj jela kanoq chi Yin kin-an ni chawe chi katk'unik re anb'al ch'oj chrij i tinimit Israel.

Tojb'alil puwi i ma Gog

18Yin in Ajwal, kinb'ij: i Ma Gog are ku'an ch'oj xaq kumaj kan i tinimit Israel, i woywal lik kjuluw na. 19Are lik kjuluw i nim laj woywal kinsaqij, chi che i ij le, o ni jun nim laj kab'raqan pa tinimit Israel. 20I kar chi je o pa mar xaq i tz'ikin je aj chikaj, xaq chikop aj pa taq es xaq i chikop chi kejukuk chwach taq ulew, kesiksat ni chinwach Yin, xaq keje pacha konojel i winaq re uwach i jyub' ta'aj. I nimaq taq jyub' naj uwi kewulij na, i nimaq taq ab'aj ketzaq na loq, ni'pa i tapial kewulij na. 21-22Yin kin-an ni che i ma Gog chi kpe ronojel taq k'ax puwi chi lik kuxij rib' che. Kinya ni utojb'alil che ru' k'iyal taq yob'il xaq b'isb'al laj kamik. Kin-an na chi ketzaq puwi ire, pkiwi uwinaq chi je yij che i ch'oj xaq pkiwi uk'iyal taq tinimit chi je rachi'ilam, nimaq taq jab' tew upam, saqb'ach, a' xaq i asufra, i uwinaq kki'an ni ch'oj chkiwach ru' i ch'ich' chi k'ulala o uware. Yin in Ajwal, kinb'ij. 23Keje ile kink'ut ni chke uk'iyal taq tinimit unimal incho'ab' xaq lo'laj inch'amil. Yin kink'ut ni wib' chke ike, keje ile kketamaj na chi Yin in Ajwal.

Currently Selected:

Ezequiel 38: ACHICUB

Highlight

Copy

Compare