Ezequiel 35
35
Tzijonik re i Ajwal chrij i jyub' Seir
1I Ajwal xlapan wu' yin i xub'ij chwe: 2Chattzalij b'i che i jyub' Seir xaq chatch'aw pinb'i chrij ire. 3Chab'ij che:
Iri are kub'ij i Ajwal:
Yin lik kinsaqij chawe chi lik in ajch'oj chawij, jyub' Seír,
xaq kinya ni utojb'alil amak,
kin-an ni jun tz'inilik jyub' chawe chi xaq wulijnaq.
4Keinwulijsaj kan atinimit,
i yet katkanaj na jun tz'inilik jyub'.
Are uri kawetamaj na chi Yin in Ajwal.
5Yet lik arewi ronojel ij lik at ajch'oj chrij i tinimit Israel, xaq lik xa'an ch'oj chkij are xya' k'isb'al utojb'alil kimak chke. 6Xwiri Yin in Ajwal, kinsaqij pink'aslemal chi katinjach ni che i kamik xaq i kamik katuterb'ej na. Man at ajmak re kamik rumali i kamik katuterb'ej na. 7Kin-an ni jun tz'inilik jyub' chi xaq lik at wulijnaq, jyub' Seir xaq kin-an na chi mijun kik'aw chik chila ipa at o wi. 8Kin-an na chi chwi taq ajyub', chwi taq a-loma, uwa taq ata'aj, xaq i araqana, kekanaj na chi lik je nojnaq che i kamnaq chi kekam pa ch'oj. 9Lik ronojel ij saq kin-an ni chawe chi at tz'inilik jyub', xaq lik mijun kjeqi chik pa taq atinimit. Are uri yix kiwetamaj na chi Yin in Ajwal.
10Yet xab'ij: I nim laj tinimit Israel, ru' keb' utinimit lik je we yin na, yin lik kin-on ni rajaw ronojel ile, tupu i Ajwal lik jeqel chila. 11Xwiri Yin in Ajwal, kinsaqij pink'aslemal chi Yin kin-an ni woywal chawe, pacha xataq b'i u'anik yet chi xtitat apam che i tinimit Israel. Yin are kinya utojb'alil pawi, ike kketamaj ni inwach. 12Are uri kawil na chi Yin in Ajwal, xinta ni'pa taq i k'ax chi xab'ij chrij i jyub' Israel. Yet xab'ij: ¡Lik jun tz'inilik jyub' chaqij; wo'or kojtiki chkib'i'ik! 13Xajaq achi', xaxij ti awib' chwe, xtortaj li utzam awa' chwij, Yin xinta.
14Iri kinb'ij Yin in Ajwal: Ronojel uwach i jyub' ta'aj kekikot na are kinsach awach. 15Yet xatkikotik are xsach uwach i nim laj tinimit Israel chi xuk'amo re ire, xwiri xaq keje ile kak'ulmaj ni yet: Katkanaj na jun tz'inilik jyub', jyub' Seir, nim laj tinimit re Edom. Are uri kiwetamaj na chi Yin in Ajwal.
Currently Selected:
Ezequiel 35: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
