Ezequiel 30
30
Utojb'alil puwi i tinimit Egipto
1I Ajwal xlapan wu' i xub'ij chwe: 2Yet winaq, chatch'aw pinb'i Yin xaq chab'ij:
Iri are kub'ij i Ajwal:
Chixsik'in rumal i ij
3chi ya knaqajab' loq;
¡Ktijin li unaqajab'ik i ij re i Ajwal!
¡Are jun ij chi lik eqmuj,
are jun ij chi lik xib'in ib' chke i nimaq taq tinimit!
4Kpe ni ch'oj chrij i tinimit Egipto.
Are kekamsax ni je k'i chila
xaq kkel-aj kib'eyomal chke,
xaq kkisach uwach i tinimit Egipto k'a chuxeb'al loq,
i tinimit Etiopía ksiksat na.
5Xaq ketzaq ni pa ch'oj
i achiyab' chi je yij che i ch'oj re i tinimit Etiopía, re i tinimit Libia,
tinimit Lidia, xaq konojel aj Arabia, re Lud xaq jub'an chik tinimit ke i jub'an chik,
chi kiya'om kiwach ru'.
6Iri are kub'ij i Ajwal:
Ni'pa kkiya kiwach ru' i tinimit Egipto
kekam ni pa ch'oj,
kjeqan li che i tinimit Migdol k'a che i tinimit Sevene.
I nim laj ukojik u'ij i tinimit Egipto
kkanaj na chi lik nti chik u'ij.
Yin in Ajwal, kinya intzij.
7¡Egipto are i tinimit chi lik nti chik o chwach, chkiwach i jub'an chik tinimit, xaq utinimit lik mas wulijnaq. 8Yin are kin-an na chi i tinimit kumaj a' i ksach kiwach konojel ni'pa kkito, are uri kketamaj na chi Yin in Ajwal.
9Are kuriq i ij chi kinya utojb'alil umak i tinimit Egipto, kintaq b'i je ajb'il tzij chi ke'e chwi mar man keje ile kkikojsaj il i winaq chi nti kkich'ob' che chila pa Etiopía, chi lik konojel kkixij ni kib'. I ij le ya kk'unik.
10Yin in Ajwal, kinb'ij: Kin-an na chi are ma Nabucodonosor, ajawinel re i tinimit Babilonia, are ire kk'isaw uwach ub'eyomal i tinimit Egipto. 11Ire k-e ni ku' i achiyab' chi je yij che i ch'oj, chi lik je are mas je itzel laj taq winaq, chusachsaxik uwach i tinimit. Kki'an ni ch'oj chkij i tinimit Egipto ru' kich'ich' chi k'ulala o uware, xaq lik kkinojsaj ni kan i tinimit chke i kamnaq. 12Kin-an ni che raqana Nilo kchaqijik xaq kinya ni tinimit pki'ab' itzel laj taq winaq; kumal i je aj naj le kinwulijsaj ni i tinimit xaq ronojel ni'pa o chwach. Yin in Ajwal, xinb'ij.
13Yin in Ajwal, kinb'ij:
Kinsach ni kiwach i tiox chi xaril je antalik
xaq usachik kiwach konojel i tiox chi ne te saqil re i tinimit Menfis.
I tinimit Egipto lik nti chik jun chi kok'aw utzam chke,
xaq lik kinnojsaj ni che i xib'in ib'.
14Kin-an na chi ksach uwach i jyub' wiqab' re i tinimit Egipto, kinnak' a' che i tinimit Zoán
xaq kin-at tzij puwi i tinimit Tebas.
15Kinya ni woywal puwi i tinimit Sin, chi are ucho'ab' i tinimit Egipto xaq kinsachsaj ni uwach ub'eyomal i tinimit Tebas. 16Kinnak' ni a' che i tinimit Egipto, i tinimit Sin kub'ak'ek'ej ni rib' rumal uk'axk'ol; kjaqtaj ni jul che i tapial re i tinimit Tebas, i tinimit Menfis lik kki'an ni ch'oj chrij pa'ij. 17Alab'om re i tinimit Avén xaq re i Pibeset kekam ni pa ch'oj, i jub'an chik winaq kekik'am nu b'i prexil. 18Yin are kinsach uwach ucho'ab' i tinimit Egipto xaq kinsach ni uwach ucho'ab' chi lik kukoj u'ij ru', i ij ku'an ni equm chila pa Tafnes, jutzob'aj sutz' kuch'uq ni uwi Egipto, xaq i winaq chi je o pkitinimit kek'am nu b'i prexil. 19Yin kin-at ni tzij xaq kinya utojb'alil puwi i tinimit Egipto, are uri kketamaj na chi Yin in Ajwal.
20Che wuqub' ij che nab'e ik' re julajuj junab', i Ajwal xlapan wu' xaq xub'ij chwe: 21Yin inpatz'om uteleb' i ma faraón, chi ajawinel re i tinimit Egipto, i mijun ukunam che xaq ub'atz'om taq k'ul chrij yab'al tan chik ucho'ab' chi lik ktiki tan chik chumo'exik uch'ich' chi k'ulala o uware. 22Rumali Yin in Ajwal, kinb'ij: Yin kinsaqij chi in ajch'oj chrij ma faraón chi ajawinel re i tinimit Egipto. Kinpatz' ni chekeb' uteleb', i uteleb' chi nti k'ax che xaq i uteleb' chi patz'tajnaq chik, kin-an ni che chi kro'taj uch'ich' pu'ab'. 23Keinkichersaj nu b'i aj Egipto chkixol jub'an chik nimaq taq tinimit, xaq keinkichersaj nu b'i che jalajuj nimaq taq tinimit. 24Lik kinya ni ucho'ab' uteleb' i ajawinel re Babilonia, xaq kinya ni inch'ich' pu'ab' chi k'ulala o uware. Kinpatz' ni uteleb' ma faraón, ire kjilaw na are kuna'o chi soktajnaq chik chkiwach i je ajch'oj chrij. 25Kinya ni ucho'ab' uteleb' i ajawinel re Babilonia, xwiri kwesaj ni ucho'ab' uteleb' ma faraón. Are kinya inch'ich' pu'ab' i ajawinel re Babilonia, ire kuyak chrij i tinimit Egipto, are uri kketamaj na chi Yin in Ajwal. 26Keinkichersaj nu b'i aj Egipto chkixol jub'an chik tinimit xaq nimaq taq tinimit, are uri kketamaj na chi Yin in Ajwal.
Currently Selected:
Ezequiel 30: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
