Ezequiel 29
29
Tzijonik re i Ajwal chrij i tinimit Egipto
1Che i kab'lajuj ij, re i ulajuj ik', re i ulajuj junab', i Ajwal xlapan wu', xaq xub'ij chwe: 2Yet, winaq, wo'or jat ru' ma faraón, ajawinel re i tinimit Egipto, chatlapan pinb'i chrij ire, xaq chkij konojel aj Egipto. 3Chab'ij che:
Iri are kub'ij i Ajwal:
Yin kinsaqij chawe chi in ajch'oj chawij,
ma faraón, ajawinel re i tinimit Egipto,
chi pacha at nim laj itzel chikop chi at jupul chupam araqana,
chi kab'ij: I raqana Nilo lik we yin, yin xin-anawik.
4Kinkoj ni xok ch'ich' patzam,
i kin-an na chi ral taq kar chi je o chupam araqana,
kenak'i ni che asolot.
¡Lik katwesaj na li chupam araqana
ru' konojel ni'pa i kar chi je nak'al che asolot!
5Katink'aq nu b'i pa tz'inilik jyub' chaqij,
junam ku' konojel i kar re araqana;
kattzaq che i jyub' jamjik,
i mijun katuyako re muqb'al awe.
Kin-an ni chawe chi katkitij b'i itzel laj taq chikop aj pa taq es,
xaq i tz'ikin aj chikaj.
6Konojel i winaq aj Egipto kketamaj na
chi Yin in Ajwal.
I tinimit Israel xutzukuj utob'al awu',
xwiri xe'eloq pacha at jun ch'amiy re ajij chi ko taj.
7Are xkaj uchapik kib' chawe,
yet xatpatz'tajik i lik xasok i kik'alk'ax;
Are xkaj uk'amik kicho'ab' chawe,
yet xatpatz'tajik i xa'an chke chi xetzaqik.
8Rumali Yin in Ajwal, kinb'ij: Tinimit Egipto, kin-an ni chawe chi kki'an ch'oj chawij ru' ch'ich' chi k'ulala o uware xaq kkikamsaj awinaq xaq achikop. 9Katkanaj na pacha at tz'inilik jyub', i winaq kketamaj na chi Yin in Ajwal. Yet xab'ij: I raqana Nilo lik we yin, yin xin-anawik. 10Lik saq laj tzij, yin kinsaqij chi lik in ajch'oj chawij xaq tzel kwil araqana. Kin-an ni jun tz'inilik jyub' chaqij chawe chi lik xib'in ib' xaq lik nti o chwach, kjeqan che i Migdol k'a che i tinimit Sevene, k'a chuchi' i jyub' re Etiopía. 11Mitene winaq xaq mitene chikop keik'aw ni chila. Che i kawinaq (40) junab' lik mijun winaq kjeqi chila. 12Yin kin-an ni chawe Egipto, chi lik are jun jyub' chi nti o chwach; che i kawinaq (40) junab' atinimit kewulij na, chi lik mas b'isb'al chkiwach jub'an chik tinimit chi lik je wulijnaq chik, xaq kewesaj nu b'i awinaq pa cho'ab' chwach kulew i keinkichersaj nu b'i che jub'an chik tinimit xaq che nimaq taq tinimit.
13Yin in Ajwal, kinb'ij: Are ik'awnaq chik kawinaq (40) junab' kinmol ni kichi' i aj Egipto che taq i tinimit ipa je inkichersam wi b'ik. 14Kin-an ni chke ajprexil re Egipto ketzalij loq i kejeqi chila pa wiqab' re i Egipto man chila je alaxnaq wi, chila kki'an wi jun tinimit che kib' chi nti u'ij. 15Lik are i tinimit chi lik nti u'ij chkiwach jub'an chik, xaq lik kwalij ti pkiwi i jub'an chik nimaq taq tinimit. Lik kin-an ni ch'utin che chi lik ktiki ti chkipek'ik jub'an chik tinimit; 16i tinimit Israel lik kukub'a ti chik uk'ux che i tinimit Egipto, iri kuk'ut ni chke chi xa je t'ortajnaq are xe'e chila chutzukuxik kitob'al. Are uri kketamaj na chi Yin in Ajwal.
17Che i nab'e ij re i nab'e ik' re wuqub' juwinaq (27) junab', i Ajwal xlapan wu' xaq xub'ij chwe: 18Ma Nabucodonosor, ajawinel re i tinimit Babilonia, junam ku' i achiyab' chi je yij che i ch'oj, kijeqom jun nim laj ch'oj chrij i tinimit Tiro; chi lik konojel xch'oltaj b'i kijolom xaq lik xu'an ch'ak uwi taq kiteleb'; xwiri mitene ire xaq mitene i rajch'oj nti kich'akom che i ch'oj le chrij i tinimit Tiro. 19Rumali Yin in Ajwal, kinb'ij: Kin-an na chi i ajawinel ma Nabucodonosor kuch'ak ni i tinimit Egipto, kumaj ub'eyomal che xaq ni'pa taq o ru'. Ru' i krel-aj le, o ni uri tojb'al ke i rajch'oj. 20Kin-an na chi i ajawinel ma Nabucodonosor kuch'ak ni i tinimit Egipto tojb'al re che rumal i ch'oj chi xu'an chrij i tinimit Tiro, man chakunnaq wu' Yin. Yin in Ajwal, xinb'ij.
21Che taq i ij le kin-an na chi kk'iyar ucho'ab' i tinimit Israel, i yet, ma Ezequiel, lik chatch'aw ni saqil ku' are lik mijun kat-atiwik. Are uri kketamaj na chi Yin in Ajwal.
Currently Selected:
Ezequiel 29: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
