Ezequiel 31
31
Ma faraón junamsam ru' i che' chakalte'
1Che i nab'e ij re urox ik' che i junab' julajuj, i Ajwal xlapan wu' i xub'ij chwe: 2Chab'ij che ma faraón, ajawinel re i tinimit Egipto, xaq chke ni'pa uwinaq:
¿Wach ru' kjunamsax wi unimalil acho'ab'?
3Pacha taq at jun che' k'isis o xaq pacha at jun chakalte' re Líbano,
chi ru' chomiq taq ki'ab' kkiya muj puwi i k'achelaj,
chi lik naj kij xaq i kitzam kupon k'a pa taq sutz'.
4I jab' xaq i ya re uwach ulew
xki'an che chi xk'iyik;
xeyiji i raqana chrij chwach
pa je tiktal wi,
i kiraqana xkija'aj
ronojel i che' re i jyub' le.
5Rumal lik k'i ya o chuxe',
rumali xk'iy mas chkiwach jub'an chik che' pa k'achelaj;
i u'ab' che' lik xek'iyarik,
xaq lik xekicher b'ik.
6Lik k'iyal taq kiwach tz'ikin
kki'an kisok chwi taq u'ab' i che' le;
xaq konojel i jalajuj chikop aj pa taq es
kealan chuxe' i che' le.
Che umujal o i k'ijib'al wetene kek'iji
uk'iyal taq tinimit chila.
7Lik are jun che' chi lik chom xaq lik nim,
lik nimaq raqan u'ab',
ronojel i ra' o
chuk'ulel uk'iyal ya.
8Mijun chakalte' che' re utikonb'al i Dios
kjunamsax taq ru' ire;
mijun che' chaj o u'ab' pacha u'ab' ire le,
mijun akoj che' o k'i taq uxaq,
mijun che' re utikonb'al i Dios
kjunamsax ru' uchomal ire le.
9Yin lik chom xin-an che ru' k'iyal taq u'ab';
jub'an chik che' re Edén chi utikonb'al i Dios,
lik ktitat kipam che.
10Rumali, iri are kub'ij i Ajwal: I che' lik naj rij xel b'ik, chi utzam xupon k'a pa taq sutz'; lik xk'iyik rumali lik xu'an nim che rib'. 11Rumali Yin lik inxutum, kin-an che chi ktzaq pu'ab' jun ajk'amol utzam chi aj naj, chi ku'an ni che pacha kmajaw che rumal umak. 12Je are mas utz ti laj taq winaq chi je aj naj kkik'atzij kanoq; kkiya kan chila i u'ab' patz'tajnaq chik ketzaq na li chwi taq jyub', chwi taq ta'aj xaq pa taq siwan re i tinimit, xaq konojel i tinimit chi je jeqel te chuxe' umujal ke'anmaj na i kko'taj kanoq. 13Jalajuj taq tz'ikin kek'un na xaq kejeqi puwi i che' chi tzaqnaq, xaq jalajuj itzel laj taq chikop kepuyi ni chupam u'ab' i che' le. 14Lik mijun chik che', tupu o chuchi' i ya k-on ti chik naj rij, tupu lik ja'talik kupon ti chik utzam pa sutz', xaq lik ku'an ti chik naj rij. Konojel je k'oqtal rumal i kamik, keqaj chupam i jyub' le k'a chuxe' ulew, kkimol ni kib' chila ku' i je o chik pa jul chi je kamnaq chik.
15Yin in Ajwal, kinb'ij: Are kqaj i che' ipa krajawin wi i kamik, kin-an na chi rumal i b'is kchaqij i nim laj mar; kein-atij ni raqana, xaq ronojel i b'eya chi keb'inik; rumal ire kin-an na chi i jyub' Líbano kch'uqtaj ni uwi che i b'is xaq konojel ni'pa i che' chi je o pa taq es kematz'krij na. 16Are Yin kin-an na chi kqaj b'i ipa krajawin i kamik re kkimol kib' ku' i je kamnaq chik, i uch'awb'al are ktzaq pulew kuyikya ni tinimit. I che i jyub' ta'aj le chuxe' ulew kkina ni kub'sab'al kik'ux ni'pa i che' re Edén, chi lik je chomiq xaq lik je ja'talik che i jyub' Líbano. 17Xaq ike keqaj na, pacha ire, chila ipa krajawin i kamik, chumolik kib' ku' i je kamnaq pa ch'oj. I jub'an chi je jeqinaq chuxe' umujal, kekichersax nu b'i pa nimaq taq tinimit. 18Mijun chke i che' re Edén ktiki taq chujunamsaxik rib' ru' ire che uchomalil xaq i unajtil rij; xwiri kqaj ni ku' jub'an chik che' pa Edén che i jyub' ta'aj le chuxe' ulew, re kjeqi chila chkixol i jub'an chi kkikoj ti u'ij i Dios xaq chkixol i winaq chi xekam pa ch'oj.
I che' le, are i ma faraón junam ku' uwinaq. Yin in Ajwal, xinb'ij.
Currently Selected:
Ezequiel 31: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
