Ezequiel 28

Tzijonik re i Ajwal chrij i ajawinel pa tinimit Tiro

1I Ajwal xlapan wu' i xub'ij chwe: 2Yet, winaq, chab'ij che i ajawinel re tinimit Tiro:

Iri are kub'ij i Ajwal:

I awanima xnoj che ukojik u'ij,

i xa'an che awib' chi at jun tiox

chi at kul pkikub'ib'al i tiox

chi sutim awij rumal i mar.

Xwiri yet xa at winaq

chi kuch'ob'o chi o unojb'al re dios.

3¿Xatab'a lik mas o ano'oj chwach i ma Daniel?

¿Xatab'a o b'iroxik uwam uwach we aweta'am ti yet?

4Ru' ano'oj xaq ru' wach kattiki chu'anik

ariqom uk'iyal ab'eyomal,

anojsam akaxa che i an-o'oj xaq i saq-o'oj.

5Ru' ni'pa kattiki chu'anik che taq i k'ayinik,

ak'iyarsam ab'eyomal,

xaq ni'pa i ab'eyomal le ki'anom chawe chi ka'an nim che awib'.

6Rumali, i Ajwal kub'ij:

Yet chi kakoj taq ile chi o unojb'al jun dios awu',

7Kin-an chawe chi kek'un ni aj naj chu'anik ch'oj chawij,

chi lik je itzel laj taq winaq,

chi kkesaj na li kich'ich' chi k'ulala o uware re kki'anb'ej ch'oj chawij,

yet, chi lik at chom chi xaq o anojb'al,

xwiri lik kuqajsaj i achomalil k'a pulew.

8Lik katkik'aq nu b'i pa nim laj jul,

xaq lik k'ax kamik ka'an ni chupam i nim laj mar.

9¿Lik kamayij ti ukojik chi lik at jun dios

are at o chkiwach i katkikamsaj?

¡Pki'ab' i katkikamsaj

lik at keje pacha jun achi chi nti u'ij!

10Katkam ni pki'ab' i winaq aj naj

keje pacha kikamik i winaq chi nti Dios ku'.

Yin in Ajwal, xinb'ij;

Yin lik inya'om intzij.

B'ix re muqunik rumal i ajawinel aj Tiro

11I Ajwal xlapan wu' i xub'ij chwe: 12Yet, winaq, chab'ixaj jun b'ix re muqunik che i ajawinel re tinimit Tiro xaq chab'ij che:

Iri are kub'ij i Ajwal:

Yet at are te'eq k'utb'al re i suk'ulik,

chi lik o ano'oj xaq lik tz'aqat achomalil.

13At o te'eq pa Edén, tikonb'al ukotz'ij i Dios,

at wiqom ru' uk'iyal taq ab'aj chi lik chomiq, i kib'i are iri:

Rubí, crisólito, jade,

topacio, cornalina, jaspe,

zafiro, granate xaq i esmeralda;

ni'pa chomiq taq ab'aj re wiqb'al ib' xaq i awarit, lik re an-o'oj,

yijb'am li chawe k'a che li ij are xatyijb'axik.

14Xatinya kan pa chajixik pu'ab' jun querubín,

at o te che i lo'laj jyub' re i Dios

i katmalkat chkixol i ch'umil.

15Ak'aslemal lik suk'ulik

k'a che li ij are xatyijb'axik,

xwiri xuriqa i ij chi xwinaqir i utz taj chawe.

16Ru' uk'iyal ak'ay,

xanojsaj awib' che i ch'oj xaq che i mak atzalal.

Are uri xatwesaj b'i chinwach;

xatwesaj li che i lo'laj jyub' re i Dios,

xaq i querubín chi katuto te'eq,

xatresaj li chkixol i ch'umil.

17I achomal lik xu'an nim chawe;

i awalch'inik xusach uwach anojb'al.

Yin xatinjab'ij li pulew,

lik xatinya pa k'ixb'alil

chkiwach i ajawinelab'.

18Lik k'i i mak atzalal xa'ano,

xaq lik k'i i ch'am taj xa'an ru' ak'ay,

chi xaqajsaj ki'ij awachoch chi o te ki'ij.

Are uri xin-ano chi xwalij jun a'

chaxol k'atsab'al awe.

Konojel katkil wo'or chi at o pulew,

at u'onom chik chaj.

19Konojel i nimaq taq tinimit chi keta'am awach,

are katkilo lik kkixij kib' chawe.

Lik tzel ktzun chik kat-anawik;

¡Lik ronojel ij saq xsach awach!

Tzijonik re i Ajwal chrij i tinimit Sidón

20I Ajwal xlapan wu', i xub'ij chwe: 21Yet, winaq, chattzalij pa Sidón, chatch'aw pinb'i chrij ire. 22Chab'ij che:

Iri are kub'ij i Ajwal:

Yin lik kinsaqij chawe chi in ajch'oj chawij, tinimit Sidón;

chaxol yet k-aljin nim laj in-ij,

are kinya ni utojb'alil amak chawe,

xaq kink'ut i lo'laj in-ij,

k-etamax ut chi Yin in Ajwal.

23Kintaq na li k'iyal taq yob'il pawi,

i kik' lik klemem ni xol taq ab'e;

konojel awinaq ketzaqik i kekamik,

xaipa ke'oqtax ni ru' ch'ich' chi k'ulala o uware.

Te'uri k-etamax na chi Yin in Ajwal.

24I tinimit Israel kutij ti chik uyej

rumal i k'ix chi jutut utzam chi lik k'ax te'eq kuna'o

rumal uk'aqik b'i u'ij kumal i tinimit chi je o chrij chwach.

Are uri k-etamax na chi Yin in Ajwal.

25Yin in Ajwal, kinb'ij: Kinmol ni kichi' i winaq re i tinimit Israel chkixol i nimaq taq tinimit ipa je kichernaq wi b'ik, xaq kink'ut ni nim laj in-ij inchomal chkiwach i nimaq taq tinimit. I je aj Israel kejeqi ni chwach i kulew, i ulew chi xinya che ma Jacob chi wajpatan. 26Chila lik utz ni jeqelem kki'ano xaq utz na kek'iji'ik, kkiyak ni kachoch xaq kkitik ni uva. Yin kin-an ni atb'al tzij xaq kinya ni utojb'alil chke ni'pa je o chrij chwach chi tzel kkil i tinimit Israel. Te'uri k-etamax na chi Yin in Ajwal, chi ki-Dios aj Israel.

Currently Selected:

Ezequiel 28: ACHICUB

Highlight

Copy

Compare