Ezequiel 27
27
B'ix re muqunik che i tinimit Tiro
1I Ajwal xlapan wu', i xub'ij chwe: 2Yet, winaq, chab'ixaj i b'ixi re muqunik 3chrij i tinimit Tiro, are i tinimit chi o chuchi' i mar chi kk'ayin ku' i nimaq taq tinimit, xaq ku' k'iyal tinimit chi je o chuchi' i mar. Chab'ij che chi keje iri kub'ij i Ajwal:
Yet, tinimit Tiro, ka'an che awib'
pacha taq at k'ak' laj barco chi lik at chom xaq lik at utz;
4i uchi' awulew kupon k'a punik'ajal i mar,
i winaq chi xatki'ano lik mas chom xki'an chawe.
5Ronojel i tz'alam re chaj chi xok chawe,
petnaq che i jyub' Senir, xaq i nim laj che' chi xok chawe,
xki'an che jun che' chakalte' chi petnaq che i jyub' Líbano;
6i ral taq perpaq che' chi jek'b'al ya are katb'in puwi i ya, antal che i che' b'aqit chi kpe che i jyub' Basán;
i tz'alam chi xch'uqb'ex awij, xki'an che i che' k'isis,
chi xkik'am li chuchi' i mar re i tinimit Chipre,
ni'pa ile lik wiqtal rij ru' marfil.
7I ariprik k'ul t'istal ru' lino re Egipto,
kajwax chawe re k'ul chi kuk'ut u'ij jun tzob'aj;
i ch'uqb'al awi antal che i k'ul kaqxar xaq i kaq
k'amtal li che i tinimit chuchi' i mar Elisa.
8I kejek'aw i barco are achiyab' re Sidón xaq re i tinimit Arvad,
i katok'awik lik je are i achiyab' chi o kino'oj chi je awinaq yet.
9I rijab' taq achiyab' re Gebal
are katyojtajik lik je yij ike chayijb'axik.
Xaq konojel i rajchakib' i barco chi je o chwi mar
kkilo' ak'ay xaq kkik'ayij.
10Achiyab' re Persia, Lud xaq i Fut
xe'ajwaxik re ajch'oj ku' achiyab' chi je yij che i ch'oj chi je awe yet;
katkiwiq ru' tob'al ib' re ch'oj xaq ru' tob'al jolomaj,
yab'al re a'ij.
11Winaq re i tinimit Arvad, junam ku' i achiyab' chi je yij che i ch'oj chi je awe yet, kkichajij atapial chi usutim awij, xaq che i awachoch tak'taq je o achiyab' re tinimit Gamad. I tob'al kib' chwach i ch'oj kitzayb'am che ronojel raqan i tapial chi pim uwach, anb'al re chawe chi lik mas at chom. 12Lik k'i ab'eyomal te'eq, rumali i tinimit Tarsis junam kixk'ayin chiwach, chwach i ak'ay yet, kuya i saq-o'oj, ch'ich', estaño xaq i raxch'ich'. 13Xaq i tinimit Javán, Tubal xaq i Mesec kelo'on awu', chwach i kilo'onik kkiya kan i kitaqon xaq i b'iroxik chi anch'ich' tojb'al re. 14I winaq je aj Bet-togarma kkitoj ni chawe ru' kaway chi re eqan, re i anb'al xaq i mula. 15Winaq re tinimit Dedán xaq kelo'on awu'. Ka'an k'ayij ku' k'iyal taq tinimit chi je o chuchi' i mar, chi kkitoj chawe ru' i marfil xaq ru' i che' ébano. 16I tinimit Edom xaq klo'on awu' rumal uk'iyal uwach taq ak'ay: Chwach ak'ay kkiya i ab'aj granate, xaq i k'ul t'isom kaqxar, k'ul re lino, chomiq taq ab'aj coral xaq i rubí. 17Xaq keje i tinimit Judá xaq i Israel kelo'on awu' xaq kkitoj chawe ru' trigo re Minit, ru' kaxlanputz, uwa'al kab', aceite xaq i pomada. 18I tinimit Damasco kulo' te uk'iyal ak'ay chi lik paqalik; xutoj chawe ru' uwa'al uva muqb'am re Helbón xaq i lan chi kpe che ulew Sahar. 19K'a che li tinimit Uzal, chwach ak'ay kkik'am li uwa'al uva muqb'am, ch'ich' chi lik wiqom, canela xaq i ajij chi lik muy. 20I tinimit Dedán kulo' ak'ay, chi are aparej re kakoj chrij akaway re anb'al. 21Arabia xaq konojel i je aj-ok'al utzam re Cedar je ajlo'onel te'eq awu' yet: Kkitoj chawe ru' mama'ib' taq chij, chij xaq ral taq me'. 22Ajlo'onel aj Sabá xaq aj Raama je ajlo'onel te'eq awu', kkitoj chawe ru' muy laj taq kunb'al, ru' chomiq taq ab'aj xaq ru' an-o'oj. 23Awu' yet kki'an te lo'onik Harán, Cane, Edén xaq ajlo'onel re Sabá, re Asiria xaq konojel aj Quilmad; 24Kkik'ayij te chomiq taq k'ul chawe chi lik paqal rajil, k'ul chi kaqxar ktzunik, k'ul t'isom, k'ul nimaq raqan chi k'i taq utzunb'al xaq i ko laj taq chij pach'um. 25I nimaq taq barco re Tarsis kek'unik kiterb'elem kib', kuk'am li k'ayij awe yet.
Lik at keje te'eq pacha jun barco chi o puwi i nim laj mar,
chi lik nojnaq che k'ayij re b'eyomal.
26I je aj-ok'al awe puwi i ya re katb'inik xatkik'am b'i chupam i ya chi lik cho,
xwiri i tew re prelb'al ij xu'an ch'aqa taq chawe chupam i mar.
27I ab'eyomal, ak'ay xaq ni'pa i ak'ayij,
achiyab' chi kechakun chupam i barco chwi mar xaq i je aj-ok'al awe puwi i mar,
je ajtz'ajol awij, je awajk'ayinel,
je awinaq chi je yij che i ch'oj xaq konojel ni'pa katok'awik,
ke'e ni k'a chuxe' i mar are kuriq
i ij chi katsach b'i chupam i mar.
28Ru' kisik' i achiyab' chi kechakun chupam i barco chwi mar
keb'arb'at ni ub'olol i ya.
29I je aj-ok'al awe puwi i ya re katb'inik keqaj ni chupam i ki-barco;
i achiyab' chi kechakun chupam i barco chwi mar xaq i aj-ok'al awe
kkik'aq na li kib' k'a chwach ulew.
30Kesik'in na
xaq lik ke'o' ni chawe ru' uk'axk'ol kik'ux.
Kkikoj ni uk'aj ulew pkija'
xaq kkib'alk'atij kib' pa taq chaj.
31Awumal yet kkisol b'i kiwi lik kki'an tz'um che i kijolom,
kkikoj ni ki'u' re muqunik
xaq lik ke'o' ni ru' uk'axk'ol kik'ux.
32Awumal yet kkib'ixaj ni jun b'ix re muqunik,
chi kkib'ij ni ru' b'is:
¿Pachin kujunamsaj rib' ru' i tinimit Tiro
chi o te'eq puwi i mar?
33Are kupon te ronojel ak'ay puwi i mar,
lik xakub'saj kik'ux k'iyal nimaq taq tinimit.
Ru' uk'iyal ab'eyomal xaq ru' ak'ay
xa'an b'eyom chke i ajawinelab' re uwach i jyub' ta'aj.
34Wo'or lik xatjar pa mar.
Xatqaj b'i k'a chuxe' i ya.
I ak'ay xaq i katok'awik
junam xixqaj k'a chuxe' i mar.
35Konojel ni'pa i winaq ke i tinimit chi je o chi taq mar
lik je oknaq il awumal yet;
xaq i kajawinelab' lik kixim kib',
lik alaj che kipalaj chi kixim kib'.
36I je ajlo'onel ke i jub'an chik tinimit
lik kkixij kib' are katkilo.
Lik xib'in ib' kattzunik;
lik ronojel ij saq nti chik ak'aslemal.
Currently Selected:
Ezequiel 27: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
