Ezequiel 26
26
Tzijonik re i Ajwal chrij i tinimit Tiro
1Nab'e ij re ik', che i julajuj junab', i Ajwal xlapan wu' xaq xub'ij chwe: 2I tinimit Tiro, chu'anik ub'im chrij i tinimit Jerusalén:
“¡Che i okb'al re k'ayij chkixol i nimaq taq tinimit
lik anom ch'aqa taq che!
¡Wo'or xuriqa i ij chi kpe ni k'ayij wu' yin!
Lik kinu'on ni b'eyom
tz'aqat ire kkanaj puyej.”
3Rumali Yin in Ajwal, kinb'ij:
Tinimit Tiro, kinsaqij chawe chi Yin in ajch'oj chawij.
Kin-an na chi kewalij k'iyal nimaq taq tinimit chawij,
re kki'an ch'oj chawij,
keje pacha ku'an uwi i mar are kwalij b'ololik,
4xaq chkiwulijsaj atapial,
xaq chkiwulijsaj i nimaq taq tak'taq ja chi o awu'.
Lik ronojel ne uk'aj ulew kinmes b'ik,
kinya kanoq pacha jun pelpik ab'aj.
5Punik'ajal i mar kkanaj na
pacha jun k'ijib'al ipa kesa' wi atraya chaqijsab'al re.
Yin in Ajwal, kinb'ij.
I tinimit Tiro kel-ax nu b'i ub'itaq re kumal i nimaq taq tinimit,
6i ral taq utinimit chi naj je o wi che i mar,
kekamsax ru' ch'ich' chi k'ulala o uware.
Are uri kketamaj na chi Yin in Ajwal.
7Yin in Ajwal, kinb'ij:
Kin-an na chi pa moxab' kpe ni ma Nabucodonosor,
ajawinel re i tinimit Babilonia,
are ajawinel chi lik nim ucho'ab',
keje ile ku'an ch'oj chrij i tinimit Tiro.
Keuk'am na li kaway, kareta xaq i achiyab' chi je ajrij taq kaway
xaq ru' k'iyal tzob'ajil taq ajch'oj.
8Lik ru' uware ch'ich' chi k'ulala o uware keukamsaj
ral taq atinimit chi naj je o wi che i mar;
kuyak ni jun tapial chawij chawach,
kuyak ni k'iyal taq anb'al re anb'al ch'oj chawij,
xaq keutaq b'i i achiyab' chi je yij che i ch'oj chawij, lik kuk'am b'i kitob'al kib'.
9Kkik'aq ni atapial pulew ru' nimaq taq che' ch'ich' utzam
xaq ru' ch'ich' kkitzaqsaj nimaq taq tak'taq ja chi awe yet.
10Are kok b'i ajawinel re i tinimit Babilonia che taq uchija re awachoch keje
pacha okik che jun tinimit chi lik kk'am pa ch'oj,
lik je k'i ni kaway
chi are keb'inik, lik kkinojsaj awij ru' ulew chi kkipuk'ek'ej;
i atapial lik kesiksat ni
rumal uch'awb'al kib'inik i kikareta xaq i k'iyal taq kikaway;
11I kisapak kaway
kkiya'ya ni xol taq ab'e.
Kukamsaj ni atinimit ru' ch'ich' chi k'ulala o uware,
xaq kuk'aq ni pulew ni'pa taq i kuya ucho'ab' awachoch.
12Katkiya kanoq nti chik ab'eyomal,
kkel-aj nu b'i ak'ay,
kkiwulijsaj nu b'i atapial chi lik pim uwach
xaq kkik'aq ni pulew ni'pa nimaq taq awachoch chomiq;
kkik'aq b'i ab'aj pa mar,
et xaq i ronojel ni'pa xkanaj kanoq re awachoch.
13Keje ile kinsach ni uwach i sik'inik re b'ix,
xaq lik ktataj ti chik uqulil i usonil i a-arpa.
14Kin-an ni chawe pacha at jun ab'aj pelpik,
che jun k'ijib'al ipa kechaqijsax wi i atraya,
xaq lik katyijb'ax ti chik.
Yin in Ajwal, inb'im;
Yin in Ajwal, xinb'ij ile.
15Yin in Ajwal, kinb'ij che i tinimit Tiro: Ni'pa taq tinimit chi je o chuchi' i mar kesiksat na are kkita atzaqik, kumal i kijilawik chi je soktajnaq xaq i kikamik awinaq. 16Konojel ni'pa taq ajawinelab' ke i tinimit chi je o chuchi' i mar kkiya kan kikub'ib'al chi o u'ij xaq kkesaj ni kichaket xaq i ki'u' chi t'isom ru' chomiq taq t'is; lik ru' nim laj xib'rikil kekub'i ni pulew, lik kkimayij ti chik i siksatik xaq lik kkixij kib' are katkilo. 17Te'uri kkib'ixaj ni jun b'ix chawe chi are i b'ix re muqunik:
¡B'uchak xsachsax awach,
b'uchak xatsach pa mar, tinimit chi o a'ij!
¡Yet ku' awinaq lik o te a'ij chuchi' i mar
xwiri xatik i kamik xib'rikil chwach ronojel i jyub' ta'aj!
18Wo'or chi at tzaqnaq chik,
ni'pa taq tinimit chi je o chuchi' i mar lik kesiksat rumal kixib'rikil.
Wo'or chi at sachnaq chik,
ni'pa taq i ulew chi o ya chrij chwach re i mar, lik kixim kib'.
19Man iri are kinb'ij Yin in Ajwal: Lik kinsach ni awach, pacha taq i tinimit chi nti winaq chupam. Kin-an ni chawe chi katsach b'i pa ya k'a chupam li mar, 20lik chatsach nu b'i k'a chuxe' ipa je o wi i kamnaq, ile je are i winaq chi xek'asi ujer. Katink'aq b'i pa jul k'a chuxe' ulew, che i tinimit chi nti uk'isik i k'ax, i katjeqi chila chkixol i je kamnaq chik. Lik kek'iji ti chik awinaq, xaq katyaktaj ti chik chwach ulew ipa je o wi i je k'aslik. 21Kin-an ni jun b'iroxik chawe chi lik xib'in ib', lik ksach ni awach. Katkitzukuj na, xwiri lik katkiriq ti chik. Yin in Ajwal, xinb'ij.
Currently Selected:
Ezequiel 26: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
