Ezequiel 25

Tzijonik chkij aj Amón

1I Ajwal xlapan wu' xaq xub'ij chwe: 2Yet, winaq, jat chik ku' aj Amón, chatlapan pinb'i chkij ike. 3Chab'ij chke chi chkikojo retalil i tzij chi Ajwal kub'ij chke: Yix xixsik'in rumal i kikotemal are xiwilo chi i wachoch xqajsax u'ij, i tinimit Israel wulijnaq xaq i winaq aj Judá xe'elsax b'i pa cho'ab' chwach kulew. 4B'ay, rumali kinjach pi'ab' yix i cho'ab' re i tinimit chi o chila ipa kel wa li ij, keje ile ike kkimaj ni iwulew chiwe, xaq kkiyak kachoch wu'waq xaq kejeqi ni chila. Ike le kkitij ni uwach i tikon yix xaq kkitu' ni i leche. 5Kin-an ni che i jyub' Rabá chi kik'ijib'al taq kamey, i tinimit Amón che jun ta'aj re kiwayb'al chij. Are uri kiwetamaj ni yix chi Yin in Ajwal.

6Yin in Ajwal, kinb'ij: Yix ix aj Amón ipok'pam pi'ab' xaq xixsak'lin rumal i kikotemal, xaq lik ixutum i tinimit Israel. 7Rumali kinyak in-ab' chiwij re yab'al utojb'alil imak xaq kixinjach chke i nimaq taq tinimit, keje ile kkimaj chiwe ni'pa taq o iwu'. Lik kixwesaj na li pa taq tinimit, kinsachsaj iwach pa nimaq taq tinimit, lik kinsachsaj iwach iwonojel. Keje ile kiwetamaj na chi Yin in Ajwal.

Tzijonik chkij aj Moab

8Yin in Ajwal, kinb'ij: I tinimit Moab, xaq i tinimit Seir, kkib'ij chi i tinimit Judá xaqjun pacha i jub'an chik nimaq taq tinimit. 9Rumali kinjaq jun ch'ut b'e putzal i tinimit Moab, kinjeq b'i usachik uwach che jun uchi' i tinimit k'a che i jun chik uchi' ipa kk'is wi, i tinimit: Bet-jesimot, Baal-meón xaq i Quiriataim chi je are i chomiq taq ab'aj re wiqb'al ib' re i tinimit le. 10Kin-an na chi i tinimit chi je o chila ipa kel wa li ij, kkik'am ni kulew, xwi ta la ile xaq kkik'am ni kulew aj Amón, man keje ile, chkixol i nimaq taq tinimit kk'un ti chik chkik'ux i tinimit Amón. 11Kinya ni utojb'alil pkiwi aj Moab, te'uri kketamaj na chi Yin in Ajwal.

Tzijonik chkij aj Edom

12Yin in Ajwal, kinb'ij: I tinimit Edom, xu'an uk'exel i k'ax che i tinimit Judá, rumal ile lik nim umak xutz'ab'ij chrij. 13Rumali Yin in Ajwal, kinb'ij: Kinyak ni in-ab' chrij i tinimit Edom re kinya utojb'alil umak, kinsach ni kiwach uwinaq xaq uchikop. Lik kinsach kiwach. Kjeqan b'i ru' i tinimit Temán k'a keuk'isa che i tinimit Dedán, konojel i winaq kekamsax ni ru' ch'ich' chi k'ulala o uware. 14Kin-an ni uk'exel i k'ax che i tinimit Edom, xwiri are intinimit Israel k-anaw che; ire ku'an ni che i tinimit Edom chrij pacha i unimal i woywal. Keje ile kketamaj na wach utojik kki'an chwe. Yin in Ajwal, xinb'ij.

Tzijonik chkij aj Filistea

15Yin in Ajwal, kinb'ij: I aj Filistea xkitzalij uwach i k'ax chi antal chke, lik xkitzalij uwach ru' nim laj oywal pkik'ux; lik arewi k-e ij saq chkij lik je ajch'oj ku' aj Israel, lik kiya'om kib' chu'anik i sachanik. 16Rumali, Yin in Ajwal, kinb'ij: Kinyak ni in-ab' pkiwi aj Filistea yab'al utojb'alil kimak, lik kinsach kiwach aj Creta xaq kinsach ni kiwach ni'pa je o kan chunaqaj i mar. 17Ru' nim laj woywal kintzalij ni uwach chke wach ki'anom chwe; kinya ni utojb'alil chke ru' nim laj woywal. Are kin-an iri, kketamaj ni uri chi Yin in Ajwal.

Currently Selected:

Ezequiel 25: ACHICUB

Highlight

Copy

Compare