Ezequiel 21

Ch'ich' chi k'ulala o uware re i Ajwal

1Are uri i Ajwal xlapan wu' xaq xub'ij chwe: 2Yet, winaq, jat pa tinimit Jerusalén, chatch'aw chrij rachoch kitiox, chatch'aw pinb'i chrij i tinimit Israel, 3chab'ij che: Iri are kub'ij i Ajwal: Yin kinsaqij chawe chi in-ajch'oj chawij. Kwesaj li inch'ich' chi k'ulala o uware re keinkamsaj i winaq chi o kimak xaq i winaq chi nti kimak. 4Qatzij, kwesaj na li inch'ich' chi k'ulala o uware, lik xaqjunam kikamsaxik kin-ano, nti k-ono we je utz laj taq winaq o je makunel, kinjeq li pa moxab', keink'isa k'a pa wiqab' re uwach i jyub' ta'aj. 5Konojel uri i winaq re uwach i jyub' ta'aj kketamaj na chi Yin in Ajwal, xwesaj li inch'ich' chi k'ulala o uware i lik kink'ol taj.

6Yet, winaq, lik chato' ru' ronojel uk'axk'ol xaq lik ru' ronojel uk'axk'ol awanima chatsiqsat che o'ej chkiwach i winaq re i tinimit. 7Moqxa kkitz'onoj chawe b'uchak kato'ik, chab'ij chke chi rumal jun tzij xata chi lik ya k-antaj na, chi konojel i winaq re uwach i jyub' ta'aj kekanaj na chi nti chik ukowil kik'ux; xaq lik kqaj ni ucho'ab' i kiteleb', mijun kkanaj na we o taq ukowil, konojel kb'arb'at ni pkich'ek rumal kixib'rikil. Ya kuriq i ij xaq ya k-antajik. Yin in Ajwal, kinb'ij.

8Are uri i Ajwal xlapan wu' xaq xub'ij chwe: 9Yet, winaq chatch'aw pinb'i Yin xaq chab'ij chi Yin in Ajwal, at intaqom chub'ixkil:

¡I ch'ich' chi k'ulala o uware, i ch'ich' chi k'ulala o uware!

Lik antal chik uware xaq uytal chik rij.

10Anom uware re anb'al k'iyal kamik,

uytal chik rij man keje ile ktzijlajik.

11X-uy rij man keje ile utz umo'exik k-anik.

I ch'ich' chi k'ulala o uware lik antal chik uware

xaq lik uytal chik rij, yab'al re pu'ab' ajkamsanel.

12Yet winaq, ¡chatsik'inoq, chato'oq,

man lik ch'ob'tal chik ukamsaxik intinimit,

xaq konojel aj-ok'al utzam i jalajuj taq tinimit re Israel!

Lik yatal utojb'alil chke chi kekam ni junam ru' intinimit,

rumali lik chach'aya uwach ak'ux rumal i k'ax.

13Yin in Ajwal, kinb'ij.

14Yet, winaq, chatch'aw pinb'i Yin;

i chapok'ij pa'ab' che i ch'ich' chi k'ulala o uware che i sokonik

ru' ukamul oxmul oywal.

Are jun ch'ich' chi k'ulala o uware re kamsanik,

lik are b'isb'al laj ch'ich' re kamik

chi keuxib'ij konojel i tinimit chi xaipa je o wi.

15Ire lik keuxib'ij na,

ku'an k'iyal taq kamik.

Che konojel i kachoch

inkojom i ch'ich' chi k'ulala o uware re kamsanik.

Are i ch'ich' chi k'ulala o uware chi uyum rij re ktzijlajik,

antal uware re kamsanik.

16¡Lik antal aware katwaj,

pa wiqab'im xaq pa moxim,

keje ile katsokon k'ulala!

17Xaq Yin lik kinpok'pa ni pin-ab'

k'a kinkub'saj ni uk'ux i woywal le.

Yin in Ajwal, xinb'ij.

18I Ajwal xlapan wu' xaq xub'ij chwe: 19Cha'ana keb' b'e man keje ile i ajawinel re Babilonia kik'aw ru' uch'ich' chi k'ulala o uware. I keb' b'e le rajwaxik chi che jun chi tinimit ke'el wi b'ik, pa jeqb'al b'i re chke jujunal i b'e le rajwaxik kakoj jun k'utb'al chi kub'ij pa chke i tinimit k-e wi. 20Cha'ana jun b'e, ipa kik'aw wi i ajawinel ru' uch'ich' chi k'ulala o uware. I tinimit are iri: Rabá chi je aj Amón xaq i tinimit Jerusalén, chi sutim rij ru' tapial nim uwach re i Judá. 21I ajawinel re Babilonia tak'al chik chila ipa kejeqan wi keb' b'e, kupajo pa chke k-e wi: Rumali kok che pajanik, kresaj li uch'ab' k'ulala, keupiskila pu'ab', xaq kutz'onoj uno'oj chke u-dios chi xaril je antalik, xaq kril chupam kiseseb' chikop, ilb'al re pachike b'e kumaj b'ik. 22Che u'ab' wiqab'im xel wi ch'ab' chi kuk'ut pa Jerusalén, ile ke'eloq chi ku'an ch'oj chrij ru' ch'ojb'al xaq taqanik che i kamsanik, sik'inik re i ch'oj, keuwulijsaj uchija, kyijb'ax jun elb'al b'ik keje ile kkisutij rij ronojel. 23Xwiri i winaq aj Jerusalén kkich'ob'o chi iri saqil ti laj tzijonik, rumal i trat chi ki'anom. Xwiri saq laj tzij lik are jun ukojik kimak chrij i kimak atzalal chi ki'anom, xaq jun tzijonik re chapb'al ke. 24Rumali Yin in Ajwal, kinb'ij: Ni'pa i utz taj xaq i kamsanik chi xi'an yix lik xel chisaq; ni'pa taq imak atzalal chi kixtijin chu'anik lik x-aljinik. Rumali lik kixchaptaj na. 25Yet, ajawinel re Israel, chi lik at itzel laj ajkamsanel, ya kk'un i ij chi kya' i k'isb'al utojb'alil chawe. 26Yin in Ajwal, kinb'ij: Kkesaj nu b'i pasb'al ajolom, xaq kkimaj nu b'i akoron, lik ronojel kjaltaj na, ¡Kupon ni k'a tzam jyub' naj uwi ronojel i o chwa ta'aj, xaq ktzaq na li chwa ta'aj ronojel i o tzam jyub' naj uwi! 27Ronojel kin-an che chi kewulijik, wulijnaq chik xaq kwulij mas. Xwiri iri xwi k-antaj na are kk'un i jun chi intaqom li Yin, chi inya'om chuqul chi ku'an i atb'al tzij.

Utojb'alil pkiwi aj Amón

28Yet, winaq, chatch'aw pinb'i xaq chab'ij intzij chke aj Amón chi kkiyo'ya i tinimit Israel, i ch'ich' chi k'ulala o uware elsam chal prachoch: Yij chik che i kamsanik xaq uytal chik rij re urepratik che i kamsanik. 29Ni'pa i kilom pkiwach saqil taj, xaq ni'pa i kib'im, xa t'oronik. I ch'ich' chi k'ulala o uware ktzaq ni rij kiqul itzel laj taq je ajkamsanel le. Ya kk'un i ij chi kya' i k'isb'al utojb'alil chawe.

30¡Ch'ich' chi k'ulala o aware, chattzalij chik pa k'olb'al awe! Yin kin-at ni tzij pawi chila ipa xatinyijb'a wi, che ulew ipa xatalax wi, 31lik kwo'taj ni pawi i nim laj woywal chi pacha jun k'atanik a' chi lik xib'in ib' ru'; katinya ni pki'ab' i winaq chi ne te utz chi xaq je ajkamsanel. 32Katk'atsax na, katwulijsax na; i akik'el klemem ni pa ronojel i tinimit, mijun katk'un chik chuk'ux. Yin in Ajwal, inb'im.

Currently Selected:

Ezequiel 21: ACHICUB

Highlight

Copy

Compare