Ezequiel 20
20
Suk'ul k'uxij re i Dios xaq uqelanik i tinimit Israel
1Che i lajuj ij re i ujo' ik' re uwuq junab', jub'an rijab' re i tinimit Israel, xeupon pa tz'onb'enik ru' i Ajwal, xaq xekub'i chinwach yin. 2I Ajwal xlapan wu' xaq xub'ij chwe: 3Yet, winaq, chatlapan ku' i nimaq taq winaq aj Israel, i chab'ij chke: Iri are kub'ij i Ajwal: ¿Yix kixk'unik kiwaj ki'an jun tz'onb'enik chwe? Xwiri, Yin in Ajwal, kinsaqij pub'i ink'aslemal chi Yin kinya ti chiwe chi ki'an tz'onb'enik chwe. 4Cha'ata ni tzij yet pkiwi, at winaq; cha'ata tzij pkiwi, chaya retamaxik chke chi kiqajaw kichuch xemakun chu'anik i b'iroxik chi ch'am taj. 5Chab'ij chke: Iri are kub'ij i Ajwal: Are xein-ul aj Israel, xinya jun kuxtanik puwi i tzij chke i kimuq kixikin, xaq xink'ut wib' chke pa tinimit Egipto. Xwi xinsaqij chke chi Yin in Ajwal chi in ki-Dios. 6Che i ij le, xinya intzij chke chi kewesaj li pa tinimit Egipto, i keink'am b'i che i nim laj tinimit chi yin intzukum chke, ile are jun tinimit chi leche xaq i uwa'al kab' klememik pacha ku'an i ya. ¡Are jun tinimit chi lik mas chom chkiwach i jub'an chik! 7Lik mijun we xinb'ij ti che, lik konojel xeintaq che, chi chkikanaj kan ni'pa taq i b'iroxik chi ki'anom ki-dios che, xaq mkitz'ij kib' ku' i tiox chi xaril je antalik re i tinimit Egipto, man Yin in Ajwal are in ki-Dios.
8Xwiri ike xa xinkiqelo, xkaj ti xinkita; lik xkaj ti uya'ik kan ile ni'pa ki'anom ki-dios che, xaq xkijek' ti kib' ku' i tiox aj Egipto chi xaril je antalik. Rumali Yin xinch'ob'o chi kinya li woywal pkiwi, lik kinya ni utojb'alil chke chila pa Egipto, lik k'a kkub'i ni uk'ux i woywal. 9Xwiri xin-an ile rumal unimal u'ij inb'i, man keje ile kinkanaj utz chkiwach i nimaq taq tinimit chkixol ipa je jeqel wi, man chkiwach i nimaq taq tinimit le xink'ut wi wib', i xinya intzij chke chi kewesaj li pa Egipto. 10Yin xewesaj li pa Egipto i xeink'am b'i pa tz'inilik jyub' chaqij; 11chila xinya wi retamaxik in-atb'al tzij xaq ni'pa intzij inpixab' chi kuya uk'aslemal pachin jun kraj chi ku'an ile puk'aslemal. 12Xaq xinya retamaxik i ij sábado chke, chi kmajaw te'eq re jun k'utb'al chkixol ike wu' yin, xaq jun kuxtab'al chke, chi Yin in Ajwal, in-anom te ch'am chke man je we Yin. 13Xwiri xinkiqel Yin are je o pa tz'inilik jyub' chaqij, lik xkikoj ti in-atb'al tzij, xaq xkixutuj intzij inpixab' chi inya'om te'eq chke chi kki'ano, man keje ile kek'asi na, xwiri lik xa xkiqajsaj u'ij i ij sábado. Rumali xinch'ob'o chi lik kin-an ni woywal chke, lik kinsach ni kiwach pa tz'inilik jyub' chaqij, 14xwiri rumal unimal u'ij inb'i xin-an taj, keje ile tzel ti kinkil i nimaq taq tinimit chi xkilo wach u'anik xin-ano are xewesaj li pa Egipto.
15Xaq chila pa tz'inilik jyub' chaqij lik xinsaqij chke chi kinya ti chke chi ke'ok che i tinimit chi insujum te chke chi lik mas chom chkiwach jub'an chik tinimit, che i tinimit le i leche xaq i uwa'al kab' lik klememik pacha k-on i ya, 16¿B'uchak xkixutuj intzij inpixab'? Xekojon ti che in-atb'al tzij, xkiqajsaj u'ij i ij sábado, man i kanima xa teren chkij i kitiox chi xaril je antalik. 17Xwiri xwil tob'al kiwach rumali xinsach ti kiwach, lik xeinkamsaj ti pa tz'inilik jyub' chaqij. 18Rumali xinb'ij chke i kak'al ike pa tz'inilik jyub' chaqij, chi mki'ano wach taq kekitaq i kiqajaw chu'anik, i ronojel kitaqanik ike le mki'ano, xaq mkiya kiwach chukojik ki'ij i tiox chi kkikoj ki'ij ike chi xaril je antalik. 19Xinb'ij chke: Yin in Iwajwal Dios. Lik chi'ana pacha tz'ib'tal chupam in-atb'al tzij xaq intaqanik. 20Lik chi'ana che, chi o u'ij i lo'laj ij sábado, man ile are jun k'utb'al chqaxol iwu' yix, man keje ile kiwetamaj na chi Yin in are Iwajwal Dios.
21Xaq keje i kak'al ike xinkiqelo. Xekojon ti che in-atb'al tzij xaq xki'an taj wach kub'ij intzij inpixab' chi kuya uk'aslemal pachin k-on ile puk'aslemal, xaq xkiqajsaj u'ij i ij sábado. Xinch'ob'o chi lik kwesaj woywal chke xaq kinsach kiwach chila pa tz'inilik jyub' chaqij, elsab'al i woywal. 22Xwiri xin-atij wib' rumal u'ij inb'i, keje ile tzel ti kinkil i nimaq taq tinimit chi xkilo wach u'anik xin-ano are xewesaj li pa Egipto. 23Pa tz'inilik jyub' chaqij lik pinb'i xinb'ij chke chi keinkichersaj b'i pa nimaq taq tinimit re uwach i jyub' ta'aj, 24man xekojon ti che intzij inpixab' chi je intaqom chu'anik, man xkiqel intaqanik, xkiqajsaj u'ij i ij sábado, xwi xkikoj retalil che i kitiox i kiqajaw kichuch. 25Xaq xinya ne atb'al tzij chke chi utz taj, xaq tzij pixab' chi kkiriq ti kik'aslemal ru'. 26Xinya chke chi xkitzij kib' chuk'amik b'i sipon chkiwach i tiox chi xaril je antalik xaq xkiporoj i kak'al atzib' pa a' chkiwach. Ile xin-ano xib'b'al ke xaq re kketamaj na chi Yin in Ajwal.
27Yet, winaq, chab'ij chke aj Israel: Iri are kub'ij i Ajwal: Xaq keje i qajaw yix xkipetsaj woywal; lik xki'an i utz taj chinwach. 28Are Yin xin-an chiwe chi xixok che i jyub' chi inb'im pub'i intzij are xinsujuj chiwe, xaqpachalo xiwil pan jun jyub' naj uwi o we ntaj jun chom laj che' rojrik uxaq, chila xixel wi chusujuxik i sipon chi kiporoj, ipa ki'an wi i sujunik chi lik tzel kwilo. Xaq kikoj kunb'al muy xaq kijam sipon re uwa'al uva muqb'am puwi. 29Yin xintz'onoj chke: ¿Pachike taq lo'laj k'ijib'al ke i tiox chi nti u'ij ipa kixupon wi yix? Xaq xkanaj kan pub'i lo'laj K'ijib'al ke i tiox, k'a are kb'ix che wo'or.
30Chab'ij che i tinimit Israel: Iri are kub'ij i Ajwal, ¿B'uchak yix kiwaj kiwitzij iwib' ru' i utz taj xaqjun pacha xki'an iwatit imam ujer? ¿B'uchak ijikb'am ti ik'ux chwe, xa are kikoj ki'ij i tiox le chi xaril je antalik chi lik je ch'am taj? 31Are kisujuj i sipon xaq are kisujuj iwak'al chi kiporoj, yix k'a kiwitzij iwib' ku' taq i tiox chi xaril je antalik. ¿Keje ile kiwaj yix tinimit Israel kixk'un wu' chutz'onoxik i no'oj chwe? Yin in Ajwal, kinsaqij pink'aslemal, chi kinya taj chi ki'an i tz'onb'enik chwe. 32Yix uminom rib' pijolom chi ix keje pacha taq i jub'an chik nimaq taq tinimit re uwach i jyub' ta'aj chi kkikoj u'ij i che' xaq i ab'aj, xwiri keje ti ile. 33Yin in Ajwal, kinsaqij pink'aslemal chi lik ru' nim laj incho'ab' xaq ru' nim laj woywal kinya utojb'alil chiwe, keje ile kinrajawin ni piwi yix. 34Yin kinmol na li ichi' chkixol i tinimit xaq nimaq taq tinimit ipa ix kichernaq wi b'ik, ru' nim laj incho'ab' xaq ru' nim laj woywal kinya utojb'alil chiwe. 35-36Kixink'am nu b'i pa taq tz'inilik jyub' chaqij ke i tinimit, lik chila kqil wi qib' are kixinsik'ij re kin-at tzij piwi. Xaq keje pacha xin-an chke iqajaw ichuch are xin-at tzij pkiwi chila pa tz'inilik jyub' chaqij re Egipto. Yin in Ajwal, kinb'ij. 37Yin kixinsolij na pacha ku'an jun ajyu'ul chij are kerajlaj uchij, xaq kin-an ni chiwe chi ki'an na pacha kub'ij intrat. 38I je qelqel laj taq winaq xaq to' je ajtzukul tzij, kewesaj na li chixol yix, xaq kixwesaj na li yix che ulew chi iwe taj ipa ix jeqel wi wo'or; xwiri ike ke'ok ti pa ulew re Israel. Are uri yix kiwetamaj na chi Yin in Ajwal.
39Tinimit Israel, iri are kub'ij i Ajwal: ¡Jix chukojik ki'ij i tiox! ¡Xwiri k-on panoq yix kixkojon ni chwe, lik kiqajsaj ti chik u'ij i lo'laj inb'i chi ki'an taq i sujunik le xaq ukojik ki'ij i tiox! 40Ronojel i tinimit Israel kukoj ni in-ij che i lo'laj injyub' naj uwi, che i jyub' chi lik naj uwi re Israel chi o che i nim laj intinimit. Yin in Ajwal, lik kinb'ij. Chila kixink'ulaj wi ru' ronojel ink'ux. Chila kintz'onoj ni chiwe chi kiya i sipon chwe, xaq re kik'am na li nab'e taq uwach i tikon chwe xaq ronojel ni'pa kisujuj chinwach, yab'al in-ij. 41Are kinmol ni ichi' che taq i tinimit xaq che i nimaq taq tinimit ipa ix kichernaq wi b'ik, wo'or kink'ut ni unimal in-ij chixol, chkiwach konojel i tinimit, te'uri kink'am ni i sipon chiwe chi lik muy ruxlab'.
42Yin, are kin-an chiwe chi kixok che i tinimit Israel chi are i tinimit chi lik insujum te chke iwatit imam ujer, te'uri kiwetamaj na chi Yin in Ajwal. 43Chila kk'un ni chik'ux ronojel ni'pa taq i utz ti laj ik'aslemal chi xiqajsaj i'ij ru', xaq lik kmuluw ni ik'ux che iwib' rumal k'iyal taq imak i'anom. 44Tinimit Israel, are kin-at tzij piwi, chi kinkoj ti pajil i utz ti laj ik'aslemal xaq i utz ti laj taq anik chi ki'ano, xwiri we kixtijin chukojik u'ij inb'i, are uri kiwetamaj na chi Yin in Ajwal. Yin in Ajwal kinb'ij.
Tojb'alil pkiwi i winaq chi je o pa wiqab'
45I Ajwal xlapan wu' xaq xub'ij chwe:
46Yet, winaq, chattzalij chub'i pa Jerusalén, xaq chab'ij atzij chrij i rachoch i utiox; chatch'aw pinb'i chrij i nim laj tinimit Israel. 47Lik chab'ij che: Iri are kub'ij i Ajwal: Yin kinnak' nu b'i a' chawe k'achelaj chi kuk'at b'i ronojel ache' rax xaq i chaqij; i a' lik kjuluw na, lik kchup taj xaq kuk'at ni kipalaj ni'pa i winaq chi je o awu' yet, pa moxab' k'a pa wiqab'. 48Konojel i winaq re uwach i jyub' ta'aj kkil na chi Yin in Ajwal are xinnak'aw a' che. I a' le lik kchup taj.
49Yin xinla' uwach che: ¡Ay, Ajwal, i winaq ketijin chub'ixkil chi yin kinb'ij i b'iroxik chi mijun kuta ub'e!
Currently Selected:
Ezequiel 20: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
