Ezequiel 22
22
Kamsanik re i tinimit Jerusalén
1I Ajwal xlapan wu' xaq xub'ij chwe: 2Yet, winaq, ka'at ni tzij puwi i tinimit ajkamsanel. Kakoj ni umak rumal ni'pa taq i b'iroxik u'anom chi ch'am taj, 3i keje iri kab'ij che: Iri are i Ajwal kb'inik: Tinimit chi keakamsaj awinaq, xaq kea'an i tiox re karitzij awib' ku', ¡Ya xuriq i or re utojb'alil! 4Ru' ni'pa taq i kamsanik chi a'anom, lik at ajmak a'anom che awib', xaq ni'pa taq i tiox chi je a'anom, xaritzij awib' ku'; a'anom che i ij re utojb'alil chi ktijin uniqajab'ik, chi xaq ya xk'un i k'isb'al ij re sachb'al awach. Keje uri ile kin-an na chi ni'pa taq i tinimit kkib'ij k'ax chawe, xaq i nimaq taq tinimit katkiyo'ya na. 5Ni'pa i je o naj xaq i je o naqaj, katkiyo'ya na, at are jun tinimit chi nim a'ij kumal atiox chi je a'anom xaq rumal i xaqmanal ka'ano. 6Chila je o wi i je aj-ok'al utzam i tinimit Israel chi je jeqel chaxol, chi kki'an i kamsanik chi ketiki che. 7I je awinaq kkikoj ti ki'ij kiqajaw kichuch, xaq kkib'ij k'ax chke i je aj naj, lik kki'an k'ax chke i ak'alab' chi nti chik kiqajaw kichuch xaq ni'pa i malkanib'. 8Kkikoj ti u'ij ink'ijib'al chi o u'ij xaq kkikoj ti u'ij i ij sábado chi we Yin. 9Rumal kit'oronik, jujun chke awinaq chi ajmakib' jub'an chik ke kamik; keupon pa wa'im re i nima'ij chi k-an tzam taq jyub' naj uwi re kojb'al ki'ij i tiox xaq kki'an b'iroxik chi ch'am taj. 10O jujun kkimin kib' ru' rixoqil kiqajaw, xaq kkimin kib' ru' jun ixoq are o prik'il. 11O jujun kkimin kib' ru' rixoqil kilok'anij chi je k'ulannaq, xaq o kkimin kib' ku' i kalib' chi lik mas k'ixb'al, xaq ku'an i utz taj ru' jun ranab' chi rak'al utat xwiri junam ti kinan. 12Jujun chke awinaq kkik'ayij kib' re kkikamsaj jun chik. Kkiya mer pa cha'im xwiri lik k'i alaj kkitz'onoj xaq kki'an k'ax che i kilok'anij xaq kkiya puyej, kinkisach chkik'ux. Yin in Ajwal, kinb'ij.
13Yin lik mi'naq woywal rumal ronojel i k'ax xaq i kamsanik chi ka'ano. 14Mach'ob' yet moq kattiki chupek'ik awib' wu' che i cho'ab' are kin-at tzij pawi. Yin in Ajwal, inb'im i lik kin-an na: 15Kinkichersaj b'i awach pa nimaq taq tinimit, xaq kinkichersaj b'i awach pa taq tinimit, lik katinjos-ij na che ni'pa i ch'am taj chi a'anom. 16Kaya ni ink'ix chkiwach ni'pa i jub'an chik nimaq taq tinimit, xwiri kawetamaj na chi Yin in Ajwal.
17I Ajwal xlapan wu' yin xaq xub'ij chwe: 18I tinimit Israel keje chwe Yin pacha uqax taq ch'ich' chi utz ti chik chi kkanajik are kikoj ch'ich' pacha taq iri: Estaño, ch'ich' xaq i raxch'ich' o saq-o'oj chi kya' pa orno. 19Rumali, Yin in Ajwal, kinb'ij: Man iwonojel yix xi'an che iwib' chi ix uqax ile chi nti chik kixajwax wi, kinmol ni ichi' pa nik'aj che i tinimit Jerusalén. 20Keje pacha i saq-o'oj, kaqkoj ch'ich', ch'ich', raxch'ich' xaq i estaño chi junam ke'oksax pa orno, xaq keya' pa a' man keje ile keyayurik, keje kin-an yin ile chiwe rumal i nim laj woywal, kinmol ichi' xaq kixinyayursaj ni pa 'a. 21Qatzij, lik kinnuk' ni a' rumal i woywal, xaq kinmol ni ichi' yix re kixinyayursaj ni pa 'a punik'ajal i tinimit. 22Keje pacha uk'atsaxik i saq-o'oj pa orno, xaq keje k-an ile chiwe yix punik'ajal i tinimit, keje ile kiwetamaj na chi Yin in Ajwal, xwo'taj li woywal piwi.
23I Ajwal xlapan wu' xaq xub'ij chwe: 24Yet, winaq, chab'ij che i tinimit Israel: Yet at are jun tinimit chi kpe uyej pawi man ku'an ti chik jab' pawi xaq nti chik uri, ya, 25are jun tinimit chi i keok'aw utzam je keje pacha taq i koj, chi keyererik xaq kki'an ch'aqa taq che i kiti' chi kkichapo; xaq i pa kulew lik kekitij i winaq, kkel-aj ub'itaq ke xaq i kib'eyomal xaq kki'an kan malkan chke k'iyal taq ixoqib'. 26I ajsujul sipon re i tinimiti kkijech'ab'saj usuk' ink'utunik xaq kkiqajsaj ki'ij ni'pa taq i b'iroxik chi Yin inya'om ki'ij; lik kkil ti ub'e pachike o u'ij o nti u'ij, xaq kkik'ut ti chke i jub'an chik chrilik ub'e pachike i ch'am xaq i ch'am taj. Kkikoj ti retalil che ni'pa taq i ij sábado we Yin. Xaq kkikoj ti in-ij. 27I je aj-ok'al utzam re i tinimiti je keje pacha taq utiw chi kki'an ch'aqa taq che i kiti' chi kkichapo, lik je yij chujamik kik' rumal i kamik chi kki'ano xaq kkikamsaj i winaq anb'al b'eyom che kib'. 28I je profeta kkuwaj uwach i saq laj tzij, keje pacha taq utz'ajik jun tapial; kkib'ij chi o kkil pkiwach xaq kkitzijoj i b'iroxik chi saqil taj. Lik kkib'ij chi pinb'i Yin kech'aw wi, xwiri saq laj tzij Yin nti inb'im. 29I winaq re tinimit are kkiya kib' chu'anik i utz taj xaq i el-anik, kkimaj ub'itaq re i nib'a' xaq ronojel i o rajwaxik che, xaq kki'an ch'oj xaq kki'an i suk'ul taj chke aj naj. 30Yin intzukum jun chkixol i winaq le chi ku'an jub'i' utz che i tinimit xaq kch'aw chkij chinwach Yin, keje ile i Yin kinsach ti kiwach, xwiri inriqom taj. 31Rumali xinya li woywal pkiwi xaq xinsach kiwach ru' u'a'ul i woywal, anb'al re chke chi kkitoj ni'pa xki'an pkik'aslemal. Yin in Ajwal, xinb'ij.
Currently Selected:
Ezequiel 22: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
