Ezequiel 16

Suk'ul ti laj k'uxij re i tinimit Jerusalén

1I Ajwal xlapan wu' xaq xub'ij chwe: 2Yet, winaq, chab'ij usuk' che i tinimit Jerusalén chi ni'pa i b'iroxik u'anom, lik ch'am taj. 3Chab'ij che: Iri are kub'ij i Ajwal: Are i axeb'al chi at petnaq wi, yet, Jerusalén, at aj Canaán man chila xatalax wi, atat aj pa Hamor i anan aj Het. 4Che i ij are xatalaxik xk'upix ti amuxux, xatatinsax taj, xaq xatjik ti ru' atz'am, xaq xkikoj ti ak'amsut. 5Lik mijun xril tob'al awach xaq mijun xk'achir chu'anik i b'iroxik le chawe. Che i ij are xatalaxik, xatkik'aq kan pa taq es man kmuluw kik'ux chawe. 6Yin xinik'aw chatzal, are uri xatwilo katulta awib' chupam akik'el, are uri xinch'ob'o chi katk'asi na. 7Xatink'iysaj pacha uk'iysaxik jun es aj pa taq es. Xatchomarik, xatu'on nim, lik xatu'on ixoq. I atz'um lik xek'iyik, i awismal xe'alax loq. Xwiri lik at ch'anal te'eq.

8Xinik'aw chik julaj chatzal, xatwilo; lik at o chik che ajunab' chi krayix awach. Xinrip ink'ul pawi, xinch'uq ach'akul chi ch'analik, xinya intzij chawe; xin-an jun trat awu' i xatu'on we Yin. Yin in Ajwal, kinb'ij. 9Xatwatinsaj, xwesaj b'i kik' chawij i xinkoj kunb'al muy chawij; 10xaq xinkoj jun a'u' chom chi lik k'iyal taq utzunb'al xaq i axajab' lik are saqil tz'um; xinya jun ximb'al apam re lino xaq jun a'u' chi lik utz ujitz'ik antalik; 11xatinwiq ru' chomiq taq ab'aj re wiqb'al ib', xinkoj uwiqb'al ateleb', xaq jun uwaj chaqul; 12xinkoj jun b'aq che atzam, arit che axikin xaq xinkoj jun chom laj koron che ajolom. 13Lik xch'uqtaj kan awij ru' an-o'oj xaq saq-o'oj; i a'u' lik re lino, lik utz ujitz'ik antalik re i k'ul chi lik chomiq taq utzunb'al. Lik are xatij i wa lejom re trigo chi paqal rajil, ru' uwa'al kab' xaq ru' aceite re oliva. Lik xatu'on chom: Xaq lik xatu'on jun ati ajawinel. 14Lik o a'ij chkixol nimaq taq tinimit rumal achomal, man lik utz xel achomal rumal awiqik chi xin-ano. Yin in Ajwal, kinb'ij.

15Xwiri lik xakub'a ak'ux che i achomal xaq lik cha xaya awib' chukojik a'ij, rumali xa'an che awib' chi chwach ach'akul xach'ak wi amer, xajach ach'akul chke konojel ni'pa keik'awik. 16Ru' a'u' xa'an i ja wu'waq xaq xakoj ki'ij i tiox chi xaril je antalik i xa'an jun nim laj nima'ij to' re uwach i jyub' ta'aj chwi taq jyub', xaq chupam ile xak'ayij wi ach'akul. 17Ni'pa taq i an-o'oj xaq i saq-o'oj chi xinsipaj te chawe, ru' ile xa'an kik'exwach achiyab' re kojb'al ki'ij; 18xakoj a'u' chke chi lik k'iyal taq utzunb'al xaq xasujuj i aceite, pom chke chi we yin te'eq. 19I wa lejom re trigo chi inya'om te yin chawe, chi lik antal che i wajim jok'om trigo, i aceite xaq uwa'al kab' chi at intzuqum te yin ru', xasujuj chke ike pacha jun asipon chi lik muy ruxlab'. Yin in Ajwal, xinb'ij ile.

20Xaq xeak'am ink'ojol xaq inmi'al chi xealax awu', i xeasujuj chkiwach i tiox le pacha tzuqb'al ke. ¿Chom b'a taq ile, chi xakoj ki'ij i tiox chi xaril je antalik, 21chi xaq xeaporoj i wak'al sujb'al ke chkiwach i tiox re kojb'al ki'ij i tiox le? 22Ru' i ch'am ti laj ak'aslemal chi kak'ayij ach'akul wo'or kk'un ti chik chak'ux are at ral ali xaq are lik at ch'anal te'eq, chi xaq lik katulta te awib' chupam akik'el.

23Iri kinb'ij Yin, chi in Ajwal: ¡To' awach yet! Rumal ronojel i utz taj chi xa'ano, 24xaq xayijb'a awib' che ronojel taq k'ijib'al chi xaq ipa kakoj wi ki'ij i tiox xaq lik xa'an che awib' chi lik pacha chwach ach'akul kach'ak wi amer. 25Lik pa k'isb'al re taq b'e, xe'ayijb'a i k'ijib'al le, i xa'an che achomal chi lik ch'am taj, xasujuj ach'akul chke ni'pa keik'awik, anb'al re i ch'am taj ru' ach'akul. 26Xak'ayij ach'akul chke i awachalal ni'pa je o chawij chawach, ku' winaq aj Egipto chi lik o kicho'ab' chu'anik urayijb'al kich'akul, xaq xapetsaj i woywal ru' ronojel ni'pa i ch'am taj chi xa'ano.

27Rumali xinyak in-ab' chawij yab'al utojb'alil amak: Xinya reqb'alil chawe xaq xatinjach b'i pki'ab' i tinimit aj Filistea, chi ktitat kipam chawe xaq tzel katkilo rumal ni'pa taq ka'an pak'aslemal chi lik k'ixb'alil. 28Xwiri xatkikot ti ru' ile, lik xaya chik ach'akul chke i winaq aj Asiria; xaq mitene ru' ile xkub'i ti ak'ux. 29Xaq xaya chik ach'akul chke i winaq aj Babilonia, k'ijib'al ke ajk'ayinel; xaq mitene ru' ile xkub'i ti ak'ux che. 30Yin in Ajwal, kinb'ij: ¡Lik ch'am ti te'eq u'anom awanima are xa'an ni'pa i ch'am taj ru' ach'akul chi lik k'ixb'alil! 31Pa k'isb'al taq b'e xaq che ronojel taq k'ijib'al chi tolan uwach, xayijb'a jun sujb'al sipon ipa kakoj wi ki'ij i tiox xaq xajach awib' chuk'ayixik ach'akul. Xwiri yet are ti ka'ano pacha kki'an ixoqib' chi kkik'ayij kich'akul: ¡yet lik kak'am ti rajil ach'akul!

32Jun ixoq chi jik ti unojb'al che i rachijil, keuk'ulaj i winaq chi reta'am ti kiwach. 33Konojel ixoqib' chi kki'an i ch'am taj ru' kich'akul lik kya' jun rajil chke; xwiri xa are ne yet kaya kisipon konojel i je awe ani'al ni'pa kkimin kib' awu' xaq lik xeatojo man keje ile kek'un awu' xaipa taq kepe wi re kolki'ana kimak awu'. 34Che i ch'am taj chi ka'an ru' ach'akul, junwi u'ankil ka'an yet che chkiwach jub'an chik ixoqib': Mijun katutzukuj re anb'al umak awu', xaq ike katkitoj ti yet, xa are yet keatoj ike. ¡Xwi che ile at junwi chkiwach ike!

35Rumali, chata wach kinb'ij chawe ixoq chi chwach ach'akul kach'ak wi amer, chata intzij: 36Yin in Ajwal, kinb'ij chawe: Yet lik nti ak'ix, xach'anb'a ach'akul man xajach awib' che i ch'am taj ru' ach'akul ku' achiyab' chi je awe ani'al xaq i ukojik ki'ij konojel i atiox chi xaril je antalik, xaq ajamom kikik'el i awak'al are xeaporoj chkiwach. 37Rumali, Yin kinmol ni kichi' konojel i achiyab' chi je awe ani'al chi akub'sam kik'ux, chi aya'om kirayijb'al, xaq konojel ni'pa k'ax xeana'o xaq konojel ni'pa tzel xeawilo; keinmol ni kichi' chawij chawach xaq chkiwach ike katinch'anb'a na man keje ile katkilo chi lik at ch'analik. 38Kin-at ni tzij pawi rumal xa'an i ch'am taj ru' ach'akul ku' jub'an chik achiyab' xaq rumal i kamsanik chi xa'ano, rumali lik ru' woywal xaq ru' i selosil katinjach ni pu'ab' i kamik. 39Katinya ni kan pki'ab' ike, man keje ile kkisach uwach i ak'ijib'al ipa ka'an wi i ch'am taj ru' ach'akul xaq ukojik ki'ij i tiox chi xaril je antalik. Kkiraqch'ij ni a'u' xaq chomiq taq awiqb'al, xaq katkikanaj ni kanoq at ch'analik. 40Kkiyak ni tinimit chawij, katkik'aq ni che ab'aj xaq katkikamsaj ni ru' kich'ich' chi k'ulala o uware. 41Kkinak' ni a' chke i awachoch xaq kkich'ik ni utojb'alil pawi chkiwach uk'iyal taq ixoqib'. Kink'is ni uwach ni'pa i xaqmanal ka'an ru' ach'akul, xaq lik keatoj ti chik i achiyab' chi kkimin kib' awu'. 42Te'uri i woywal chawe kkub'i ni uk'ux che xaq in-ab'anik kin-an ti chik; lik kinuxlan na xaq lik kmi' ti chik woywal. 43Yet xsach chak'ux are at apoj te'eq, xaq lik xami'saj i woywal ru' ni'pa i ch'am ti laj taq xaqmanal xa'ano; rumali Yin kinya ni utojb'alil re chawe ni'pa xa'an pak'aslemal. Yin in Ajwal, kinb'ij.

Pacha i uchuch xaq keje i ralit

44Konojel ni'pa i kkaj ub'ixkil i tzij chi o ke'eloq, kkib'ij ni tziji chawij yet: Pacha uchuch xaq keje ralit. 45Yet at ralit jun ixoq chi lik tzel xril i rachijil xaq tzel xeril i rak'al, chi xaq je keje i awatz lik tzel xkil i kachijil xaq tzel xekil i kak'al. I ichuch iwonojel yix aj pa tinimit Het i iqajaw aj pa tinimit Hamor. 46Pa moxab' jeqel wi awatz re tinimit Samaria xaq ni'pa i ukomon; pa wiqab' jeqel wi acha', tinimit re i Sodoma, xaq ni'pa ukomon. 47Yet xatterej chrij ni'pa xu'ano xaq xa'an ch'am ti laj taq xaqmanal pacha xu'an ire. Xaq kkub'i ti ak'ux ru' ile ni'pa i utz taj chi xa'an pak'aslemal, lik mas xe'ik'aw tan chik chwach ke ike. 48Yin in Ajwal, kinsaqij rumal ink'aslemal: Xaq mitene acha' Sodoma xaq ni'pa taq ukomon xki'an ti ile chi pacha xa'an yet junam ru' akomon. 49Iri are umak acha', Sodoma: Ire i ukomon lik xki'an nim che kib' rumal lik k'i i tijawik re o ku', rumali lik utz kkina'o, xwiri lik xekito ti i nib'a'ib' xaq konojel i o rajwaxik chke. 50Lik xki'an nim che kib' xaq xki'an i b'iroxik chi ch'am taj chi yin tzel kwilo; rumali lik xinsach kiwach pacha i xawilo. 51Tan chik i Samaria, lik xupon ti che pa nik'aj ni'pa taq amak xa'ano. Yet lik k'i i ch'am ti laj taq amak xa'an chkiwach ike; lik k'i amak ke'eloq chi chak'ulel yet, ike pacha taq nti kimak. 52Yet lik kakuy ni uqajsaxik a'ij chi k-anik, man rumal uk'iyal amak xa'ano chi lik mas ch'am taj chkiwach awatz acha', xa'an chke chi xe'eloq pacha taq nti kimak. Yet lik katij ni uyej rumal k'ixb'alil xaq kakuy ni uqajsaxik a'ij, man xa'ano chi xe'eloq pacha taq nti kimak awatz acha'.

53Yin kintzalij chik i utz laj k'aslemal pkiwi aj Sodoma xaq pkiwi aj Samaria, xaq ni'pa taq i kikomon; xaq keje chawe yet kinya chik i utz olem. 54Xwiri kakuy ni uqajsaxik a'ij xaq i k'ixb'alil rumal ni'pa xa'ano, keje ile katel chke ike pacha taq at kub'sanel k'uxij. 55Are i Sodoma xaq i Samaria xaq ni'pa taq kikomon ke'on tan chik pacha ujer, xaq keje yet i akomon kix-on tan chik pacha ujer. 56Yet kayo'ya te acha' Sodoma rumal i k'ax chi xutijo, are lik nim a'ij kana yet 57are k'amaja kel amak chisaq; xwiri wo'or i tinimit je aj Edom xaq i je aj Filistea, ni'pa i je o chawij chawach, katkiyo'ya; ¡Ronojel uwach i jyub' ta'aj katkixutuj! 58Wo'or chach'ija ni k'ax rumal utojb'alil ni'pa taq i ch'am taj chi xa'ano. Yin in Ajwal, xinb'ij.

59Yin in Ajwal, kinb'ij: Lik kinya ni utojb'alil chawe pacha i kmajawik, man xatramtaj che atzij, xaq xa'an taj pacha kub'ij i trat chi xa'ano. 60Xwiri, Yin kk'un chink'ux i trat chi in-anom awu' are k'a at ali, rumali kin-an jun trat awu' chi lik nti uk'isik. 61Xwiri are kinya ni awatz xaq i acha' chawe pacha je awak'al, tupu nti chupam qatrat, are uri i yet kk'un ni chak'ux ni'pa taq i utz taj chi a'anom pak'aslemal, te'uri katk'ix ni che. 62Yin kin-an ni k'ak' che intrat awu', xaq kawetamaj ut chi Yin in Ajwal. 63Yet kk'un ni chak'ux, i lik katk'ix ni che, xaq lik kana'o chi qajnaq ni a'ij, xaq lik kajaq ti chik achi' are kinkuy ni ronojel amak chi a'anom. Yin in Ajwal, xinb'ij.

Currently Selected:

Ezequiel 16: ACHICUB

Highlight

Copy

Compare