Ezequiel 17
17
I kotxik xaq i raxk'am re i uva
1I Ajwal xlapan wu' xaq xub'ij chwe: 2Yet, winaq, chab'ij jun junamsanik che i tinimit Israel. 3Chab'ij chke:
Iri are kub'ij i Ajwal:
Jun nim laj kotxik xupon che i jyub' Líbano;
i uxik' lik nimaq chi lik naj kel wi chikaj,
chi lik k'i rismal olik xaq lik k'iyal taq utzunb'al.
Xuk'am jun runum che' chi chakalte' ub'i,
4xuk'atzij u'ab' che' chi mas naj uwi
i xeutika che jun tinimit ipa je o wi i je ajk'ay b'iroxik,
jun tinimit chi lik k'iyal uwach taq k'ayij olik.
5Te'uri xuk'am jun ija pulew
xaq xutika che jun ulew re tikonb'al,
chutzal jun raqana
chi k'i ya o che.
6I ija xalaxik,
xu'on jun chom laj raxk'am uva; tupu naj ti rij
xwiri lik rax uxaq xaq lik yelyik,
xeusuk'b'a b'i u'ab' ipa o wi i kotxik,
tz'aqat ktijin b'i uqajik i ra' chupam ulew.
Xu'on jun raxk'am;
xpe utux xaq xpe u'ab'.
7Xwiri o jun chik nim laj kotxik
lik nimaq uxik' xaq lik k'i uxik' chrij.
Are uri i raxk'am re i uva xusuk'b'a b'i ra'
xaq xusuk'b'a b'i u'ab' pusuk' i kotxik le,
keje ile kya' ni mas ya che,
naj che i k'ijib'al ipa tiktal wi.
8Tupu tiktal pa jun utz laj ulew,
chutzal taq uk'iyal ya,
ipa lik kpe ni k'iyal taq u'ab' xaq kwachin na
xaq lik k-on na pacha jun chom laj raxk'am uva.
9Chab'ij uri chke pinb'i yin:
Iri are kub'ij i Ajwal:
I raxk'ami kk'iy taj.
I kotxik nab'e kumich' nu b'i ra',
i k-on che chi kpuq li uwach;
ru' jub'i' ucho'ab' i ru' ti uk'iyal i winaq
kumich' na li k'a pra'
xaq kechaqij ni ronojel ral taq utux k'ak'.
10Tupu kutik chik, kel ti chali utux;
kchaqij ni rumal i ruxlab' tew are kk'un puwi chi upetik prelb'al ij;
kchaqij ni che k'ijib'al ipa kel wi te li utux.
11I Ajwal xlapan wu' xaq xub'ij chwe: 12Chatz'onoj che i qelqel laj tinimiti we reta'am wach ke'el usuk' i junamsaniki. Chab'ij: I ajawinel re Babilonia xk'un pa Jerusalén, xuchap b'i ajawinel re Judá xaq i rajpatanib', xaq xeuk'am b'i ru' pa Babilonia. 13Te'uri xuk'am jun uk'ojol chke i ralk'uwal che jun saqil laj ajawinel i xu'an jun trat ru', lik xutaq chub'ixkil chi kt'oron taj, xaq xeuk'am b'i ni'pa i winaq chi lik o te ki'ij pa tinimit. 14Man keje ile i tinimit Judá kkanajik nti chik ucho'ab', lik kuch'ij ti chik walijik, tupu kraj ku'an i trat pacha kib'im, man keje ile ksach ti uwach. 15Xwiri uk'ojol i saqil laj ajawinel le xuqel i trat chi xki'an ru' i ajawinel re Babilonia xaq xeutaq b'i uwinaq chi je ajtaqon pa Egipto re kkitz'onoj uk'iyal taq kaway xaq uk'iyal taq achiyab'. ¿Kikoj yix ile chi chrijil ile kel chisaq xaq kuch'ij anmajik i kk'asi na? ¿Ktiki nawi jun che anmajik we kutz'aqatsaj ti utrat chi xu'ano? 16Yin in Ajwal, kinsaqij pub'i ink'aslemal, chi kkam ni pa Babilonia i jun chi xuyo'ya inkuxtanik puwi intzij xaq xu'an taj pacha kub'ij i trat chi xu'an ru' i ajawinel chi xukub'a pa kub'ib'al chi o u'ij. 17Are i ajawinel re Babilonia ku'an ch'oj chrij xaq kuyak i elb'al b'ik xaq i tapial chrij chwach i tinimit, xaq keukamsaj i k'iyal winaq, ma faraón kutaq tu b'i k'iyal achiyab' chi je yij che i ch'oj chkito'ik xaq mitene uk'iyal to' winaq, 18man ire xuyo'ya i kuxtanik puwi i tzij i xu'an taj pacha kub'ij i trat chi xki'ano; chi xuya te rib' chu'anik, xwiri lik xu'on ronojel iri. Rumali ktiki ti chuto'ik uk'aslemal.
19Yin in Ajwal, kinsaqij pub'i ink'aslemal: Ire xuyo'ya i kuxtanik puwi i tzij chi uya'om chwe, xaq xu'an taj pacha kub'ij i trat chi u'anom wu' yin; rumali yin kintz'onoj che ni'pa u'anom puk'aslemal. 20Rumali keink'aq ni ink'at puwi ire, ru' ile ktzaq ni pin-ab'; kink'am chub'i pa tinimit Babilonia, chila kin-at ni tzij puwi rumal xkojon ti chwe. 21Ni'pa i je utz laj taq uwinaq chi lik je yij che i ch'oj kekam pa ch'oj, xaq ni'pa kek'asi kanoq kekichersax nu b'i che kajib' k'ulala re uwach i jyub' ta'aj. Te'uri kiwetamaj ni yix chi Yin in Ajwal, xinb'ij iri.
22Yin in Ajwal, kinb'ij: Xaq keje yin kink'am ni utux che' re chakalte' chi o li k'a puwi; kinch'up ni jun utux ch'u' che u'ab' chi lik naj uwi; xaq lik yin kintik ni che jun jyub' naj uwi, 23che i jyub' mas naj uwi re Israel. Kek'iyar ni u'ab', kuya ni uwach xaq k-on ni jun chom laj che' chakalte'. Ni'pa k'iyal taq chikop kemujan ni chuxe' i che' le, xaq ni'pa k'iyal kiwach tz'ikin kki'an ni kisok xol taq u'ab' i che' le. 24Konojel i che' chi je o pa taq es kketamaj na chi Yin in Ajwal. Yin kink'atzij ni i che' chi lik kukoj u'ij xaq kin-an ni che i che' ch'utin kk'iyik. Yin kinchaqijsaj i che' rax i kin-an rax che i che' chaqij. Yin in Ajwal, kinb'ij xaq lik kin-ano.
Currently Selected:
Ezequiel 17: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
