Deuteronomio 33
33
Ma Moisés xuya utzil chomal pkiwi kitzob'ajil aj Israel
1Chuxe'el ukamik ma Moisés, chi rajpatan i Dios, xuya kan utzil chomal pkiwi aj Israel ru' i tziji:
2I Ajwal xel li chila pa Sinaí,
are xqaj pa Seir lik xtzun li u'ij uchomal pqawi,
lik xtzun li u'ij uchomal pqawi pa taq jyub' Parán,
xaq xumaj b'i Meriba de Cades; puwiqab'im xuk'am wa li a' re i atb'al tzij.
3I Ajwal lik k'ax kuna utinimit,
keuchajij konojel ni'pa i kijachom kik'aslemal pu'ab' i Dios
man ike lik keb'in ni pub'e
xaq lik kekojon ni che utaqanik.
4I ma Moisés xuya i atb'al tzij,
pacha jun kuxtab'al utinimit i ma Jacob
5xaq xik'aw jun ajawinel pa Jesurún
are xkimol kib' unimaqil re i tinimit.
Xkimol kib' junam ku' kitzob'ajil aj Israel.
6Te'uri ma Moisés xub'ij chke utzob'ajil ma Rubén:
Chk'asi ni ma Rubén, mkam taq
tupu lik je k'i ti uwinaq chi je yij che i ch'oj.
7Xaq xub'ij chke utzob'ajil ma Judá:
Ajwal Dios, chata kitzij aj Judá.
Cha'ana chke chi kkimol kib' pa kitinimit.
Cheato ru' acho'ab'.
Cheato chkiwach ajch'oj chkij.
8Xaq xub'ij chke utzob'ajil ma Leví:
Ajwal, awe yet ronojel i Tumim xaq i Urim,
awe yet xaq ke i winaq chi lik kijikb'am kik'ux chawe,
chi xak'am kipam chila Masah
chi xmi' awoywal chke chi taq ya Meriba.
9Chi xub'ij chke uqajaw uchuch:
Lik wilom ti iwach, xaq xub'ij chke ratz ucha': Weta'am ti iwach,
xaq xub'ij chke i rak'al: Weta'am taj ix pachinoq.
Ike kki'ano pacha kub'ij atzij
lik kijachom kib' che atrat.
10Ike kkik'ut ni ataqanik che ma Jacob,
xaq kkik'ut ni a atb'al tzij che ma Israel
kkikoj ni pom chawach yet
xaq kkiporoj ni chikop puwi sujb'al asipon.
11Ajwal chaya utzil chomal puwi kicho'ab',
xaq chak'ama kichak ru' ronojel ak'ux.
Cha'ana raqraq che uchel kij ajch'oj chkij
xaq mewalij chik i ktitat kipam chke.
12Xaq xub'ij chke utzob'ajil ma Benjamín:
I winaq chi k'ax kna' rumal i Ajwal lik arewi utz olik.
I nim laj Dios arewi kuchajij,
lik kchajix ni rumal i Ajwal.
13Xaq xub'ij chke, utzob'ajil ma José:
Chuya ni utzil chomal i Ajwal puwi iwulew
ru' i lo'laj musmul chi kpe chikaj
xaq ru' i lo'laj ya chi o li k'a chuxe' ulew,
14ru' chomiq taq molonik re i junab' junab',
xaq ru' i chomiq taq uwach itikon re ik' ik'.
15Ru' i rutzil taq b'iroxik chi kuya i ujer taq jyub'
xaq ru' ni'pa i utz chi kuya i nimaq taq jyub' chi k-e ij saq chrij,
16Ru' chomiq taq uwach tikon chi kuya ulew,
xaq ru' rutzil uk'ux i jun chi jeqel chila chupam i k'ix,
chqaj ni ronojel ile puwi ma José,
chi x-uli chkixol ratz ucha'.
17Lik chom pacha ktzun nab'e rak'al jun toro,
lik o ucho'ab' pacha ucho'ab' jun búfalo
chi keuto' nu b'i konojel i winaq
lik k'a naj k-e wi b'ik.
I kik'iyal keje na pacha kik'iyal utzob'ajil ma Efraín
xaq pacha kik'iyal utzob'ajil ma Manasés.
18Che utzob'ajil ma Zabulón xaq che utzob'ajil ma Isacar xub'ij i tziji:
Chatkikotoq ma Zabulón rumal awelik b'ik pa malkatik,
xaq chatkikotoq ma Isacar chupam i jalajuj taq awachoch wu'waq.
19Keisik'ij ni nimaq taq tinimit chwi jyub',
chila kisujuj wi i sipon re u'anik i suk'ulik;
Chi lik kiwechb'ej na ni'pa i b'eyomal re i mar
xaq i b'eyomal chi uwam pa taq seneb' chila chi taq mar.
20Che utzob'ajil ma Gad xub'ij iri:
Lik nim u'ij i Dios chi xuya i nimaq taq ulew chawe
keje pacha jun ati koj chi keuraqch'ij i kiteleb'
xaq kijolom i ajch'oj chrij.
21Xkanaj kan i rutzil ulew pa'ab'
chi ke i je aj-atzil.
Xaq xok b'i chkiwach i tinimit,
x-on i suk'ul laj atb'al tzij chwach i Ajwal
xaq keje x-on ku' aj Israel.
22Che utzob'ajil ma Dan xub'ij iri:
“Yet, ma Dan, at keje pacha jun ral koj ma,
chi krab'lajik xpe pa Basán.”
23Che utzob'ajil ma Neftalí xub'ij iri:
Yet, ma Neftalí, lik k'ax katna' rumal i Ajwal,
lik o i jalajuj taq utzil chomal re Ire pawi,
at rajaw i ya k'a chuchi' jela pa wiqab'.
24Che utzob'ajil ma Aser xub'ij iri:
Lik kk'iji ni utzil chomal pawi, ma Aser, chkixol i rak'al ma Jacob,
lik k'ax ni katna' kumal i awatz acha'
xaq kb'ak ni awaqan pa lo'laj aceite.
25Ronojel uchi' awachoch lik ch'ich' xaq anch'ich' ni i chapb'al re,
lik kkowin ni ucho'ab' pacha ukowinik uk'aslemal.
26Lik nti chik jun Dios pacha i Dios re i tinimit Jesurún
chi kk'un pa sutz'
chato'ik ru' nim laj u'ij uchomal.
27I Dios chi k-e ij saq chrij are ire katchajiwik,
katuto ni ru' nim laj ucho'ab'.
Keroqtaj nu b'i ajch'oj chawij,
yet katutaq chusachik kiwach.
28Yet at aj Israel, katk'achir taj ipa katjeqi wi
xaq amuq axikin lik utz na kek'iji'ik,
i kulew lik kuya ni trigo xaq i uva
xaq lik kramtaj ti jab' aj chikaj.
29Lik utz awe yet, Israel,
¿Pachin taq wa kupaj rib' awu'?
Lik are i Ajwal xatuto. Ire katuchajij xaq katuto.
¡Ire keje pacha ach'ich' chi lik nim u'ij!
I ajch'oj chawij kkijach ni kib' pa'ab', yet
lik kaqajsaj ni ki'ij.
Currently Selected:
Deuteronomio 33: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
