Deuteronomio 32

1Kaj, chinata man kinch'awik;

ulew chamaja usuk' intzij.

2Ink'utunik keje na pacha i jab' chi ktzaq loq,

ni'pa i tzij chi kinb'ij keje na pacha uxaq k'aj,

keje na pacha i musmul puwi i es,

xaq keje na pacha ukirkatik i jab' puwi i k'im.

3Kinb'ij ni ub'i i Ajwal

¡Xaq kiwetamaj ni usuk' i nim laj u'ij uchomal i qa-Dios!

4Ire are kojtowik;

ni'pa uchak u'anom lik utz elnaq,

ni'pa i ku'ano lik suk'ulik.

Ire are i Dios re i saq laj tzij,

Ire lik ku'an ti b'iroxik chi suk'ul taj,

Ire lik suk'ul laj Dios xaq lik saqil.

5Lik je utz ti laj taq winaq xaq je qelqel,

chi ki'anom i utz taj chwach i Dios, lik kmajaw ti chke chi je rak'al Ire;

6¿Keje b'ari utojik ile ki'an yix che i Ajwal?

Yix lik ix b'uy laj taq winaq xaq nti ino'oj,

¿Are ti wa Ire iqajaw chi xix-anawik?

¡Are Ire xixu'ano xaq xuya ik'aslemal!

7Chik'unsaj pe jub'i' chik'ux ni'pa re ujer,

chich'ob'o pe ni'pa lemajil je ik'awnaq chik;

chitz'onoj chke iqajaw ichuch man kkib'ij chiwe,

jix ku' i nimaq taq winaq man kkilap chiwe.

8Are i jun, chi nim ucho'ab', xujach ulew chke i winaq,

xaq chke i nimaq taq tinimit,

xukoj mojon che uchi' i jalajuj taq tinimit,

xaq i aj Israel xuya kan kuxtab'al chrij ni'pa kak'al olik.

9Man i winaq lik je re i Ajwal,

i winaq le je are utinimit ma Jacob.

10Xeuriq pa tz'inilik jyub' chaqij

chi lik kjuk'uk' tew chwach,

xeutz'ulej, xeupixb'aj

xaq xeuto pacha uto'ik utioxil ub'a'wach.

11I Ajwal keje pacha jun kotxik chi lik uch'uqum uwi usok ru' uxik',

xaq kuk'ut i rupupik chke i rak'al.

Keje xu'an i Ajwal ile, xurip uxik'

te'uri xeuk'am b'i aj Israel puwi uxik' le.

12I Ajwal xerok'aj, nti chik jun xeok'awik;

¡Mijun taq dios chi etamam ti uwach!

13Xeuk'am b'i che i b'e re i ch'akanik,

xaq chwi nimaq taq jyub' re i tinimit,

xeutzuq ru' i jalajuj taq echa' aj pa taq es,

xresaj li uwa'al kab' chwach ab'aj re kkitu'u

xaq xresaj li aceite che chik jun ko laj ab'aj re kkitijo.

14Xkitij i kexu xaq xkitu' i leche chi xkesaj chke i chikop,

xaq xkitij i rutzil ti'ij chij,

xaq xkitij mama'ib' taq chij xaq mamaib' taq chab'at aj Basán.

Xkitij i rutzil trigo,

xaq xkitu' rutzil uwa'al uva muqb'am.

15Xwiri i winaq chi aj Jesurún, chi aj Israel, lik xeti'ojirik xaq xeb'uyerik,

(rumal kiti'ojil lik to' kwalch'in chik kij)

xaq xko'taj kan i ki-Dios chi xe'anawik;

lik xkixutuj i tol ke.

16Xkipetsaj roywal i Ajwal

are xkikoj ki'ij i tiox chi xa je antalik.

17Ike xkisujuj kisipon chke i je raqan u'ab' itzel,

xaq chke i jalajuj taq tiox chi xa je antalik, xaq lik keta'am ti kiwach,

ile xa je k'ak' laj taq dios chi k'ate xkik'am b'i pkitinimit,

i dios le lik xoksax ti ki'ij kumal kiqajaw kichuch ujer.

18Ix, aj Israel, xsach iqajaw chik'ux chi tol iwe;

xsach i Dios chik'ux chi xuya ik'aslemal.

19Are uri i Dios xpe roywal are xril ile,

rumali xujek' rib' ku' ik'ojol xaq ku' imi'al.

20Are uri i Ajwal xub'ij: wo'or Kinya uchel wij chke,

¡Chkila uri wach ke'el wi ru'!

Man lik saq laj tzij ike le je utz ti laj taq winaq,

lik je qelqel laj taq alk'uwalxelab', xaq lik kkub'i ti ak'ux chke.

21Xkipetsaj woywal rumal ukojik u'ij jun dios chi dios taj,

man ru' xki'ano le xkiqajsaj in-ij.

Xaq keje Yin uri kinpetsaj koywal ru' jun chik tinimit chi tinimit taj,

ru' jun tinimit chi lik kkita ti ub'e.

22Lik mi'naq jun woywal pacha jun a',

lik kuk'at nu b'i ronojel uwach ulew naj kqaj wi k'a pa jyub',

xaq kuk'at nu b'i ulew xaq ni'pa uwach chi kuya'o,

xaq kuk'at nu b'i uxeb'al i nimaq taq jyub'.

23Kinqajsaj ni jalajuj taq k'ax pkiwi,

xaq keink'aq ni ru' inch'ab'.

24Kekam ni rumal numik xaq rumal i a' tew chkij;

jun nim laj yob'il kekamsaw na.

Keintaq nu b'i jalajuj itzel taq chikop chkij

xaq i b'enen laj taq kumatz.

25Kekamsax ni kak'al ru' ch'ich' pa taq b'e,

o ni nim laj xib'rikil pa taq kachoch;

kekam ni alab'om xaq altom,

rijab' xaq ak'alab' chi lik k'a ketz'umanik.

26Yin lik inch'ob'om te'eq keinkichersaj b'ik

xaq kinchup kiwach chwach i jyub' ta'aj.

27Xwiri xwaj ti uch'ijik kiyo'yanik ajch'oj chkij,

xwaj taj chi kkikoj taq ki'ij ajch'oj le,

xaq we kkib'ij taq: Are ti Ajwal x-anaw ile,

lik yoj xoj-anaw ru' qacho'ab'.

28I tinimit Israel are jun tinimit chi lik kekojon taj

xaq nti kino'oj.

29Wetene je b'iw laj taq winaq, lik kkita ni uri ub'e;

xaq lik kkich'ob' ub'e uri ipa kekik'isa wi ru' i kki'ano le.

30¿Wach u'ankil ile chi xa jun chi winaq xe'anmaj b'i lajujwinaq kamo' (1,000) ajch'oj pu'ab'?

¿Wach u'ankil ile chi xa keb' chi winaq xe'anmaj b'i jo'mo' juchiy (10,000) ajch'oj pki'ab'?

¡Ile rumal i Ajwal, chi tol ke,

xeujach ajch'oj le pki'ab', rumali chi xech'akanik!

31Man i ke'anaw ch'oj chqij keta'am

chi tol ke ike ktiki ti chujunamsaxik rib' ru' i Tol qe yoj.

32Ike le je kimuq kixikin i winaq

aj Sodoma xaq aj Gomorra,

je keje pacha utz ti laj taq tikon chi lik k'a uwach kuya'o, chi xaq lik xa b'enen.

33Uwa'al ki-uva muqb'am lik keje pacha ub'enenil kumatz,

¡lik kamsanel laj b'enen pacha ke i kumatz!

34Ronojel ile kintijin yin chuk'olik pink'ux,

kintijin chuk'olik pacha uk'olik jun b'iroxik chi lik paqal rajil chupam jun kaxa,

35re are kuriqa i ij chi kin-an ni uk'exel chiwe,

man keje ile are kuriqa i ij chi kixtzaqik

lik xa naqaj chik uri o wi i ij re usachik iwach.

¡Lik xa naqaj chik o wi i or!

36I Ajwal keuto ni utinimit,

are krilo chi nti chik kicho'ab',

i Ajwal kril ni tob'al kiwach i rajpatan, are krilo chi nti chik kicho'ab', xaq lik mijun chik kukowij uwach chke.

37Are uri kub'ij ni Ajwal: ¿Ipa o wi ki-dios,

chi kikub'am te'eq kik'ux chke?

38Chi xkisujuj i xepu chkiwach

xaq xkisujuj uwa'al uva muqb'am chkiwach,

¡Chepet uri chito'ik wo'or!

39Man xwi Yin in-Dios,

nti chik jun dios pacha Yin,

Pin-ab' o wi uya'ik k'aslemal xaq pin-ab' o wi relsaxik;

Yin kinyaw yob'il puwi jun winaq xaq Yin kinkunawik.

¡Lik mijun kresaj rib' chwach incho'ab'!

40Kinyak in-ab' chikaj

xaq kinsaqij chi yin k-e ij saq chrij ink'aslemal,

41are kin-an uware inch'ich',

are kinjeq u'anik i atb'al tzij,

are uri kin-an ni uk'exel chke ajch'oj chwij,

xaq kinya ni utojb'alil chke i tzel kinkilo.

42Inch'ab' lik keinmub'a ni chupam i kik', inch'ich' lik kuk'is ni kiwach ajch'oj chwij, are kikik'el ajprex xaq kikik'el ajch'oj; kikik'el i kaj-atzil ajch'oj chi lik nimaq kiwi.

43¡Nimaq taq tinimit, chixkikot ru' utinimit i Dios,!

Ire ku'an ni uk'exel chke ajch'oj chi xekamsaw i je rajpatan,

lik ku'an ni uk'exel chke ajch'oj chkij

xaq kukuy ni kimak utinimit chila ipa je o wi pa kulew.

K'isb'al taq upixb'anik ma Moisés

44-45Ma Moisés xuk'ut rib' chwach ronojel i tinimit Israel, junam ru' i ma Josué chi uk'ojol ma Nun, xub'ixaj i b'ixi xujeqo xaq lik k'a xuk'iso.

46Xub'ij chke: “Chich'ob'o ronojel ni'pa o chupam i atb'al tzij chi xinb'ij chiwe wo'or, chik'utu chke konojel iwak'al chi chki'ana ronojel i tzij re i atb'al tziji. 47Man iri are ti jun b'iroxik chi to' ki'an la anoq, i atb'al tziji lik k'aslemal chiwe yix xaq rumal ile naj na kixk'asi chwach ulew chi o ch'aqa ya Jordán chi kik'am ni kanoq iwe yix.”

I Dios xuya che ma Moisés chi xril pan uwach ulew chi usujum che

48Che i ij le i Ajwal xlapan ru' ma Moisés, xub'ij che:

49“Jat chwi taq jyub' Abarim, te'uri chatel b'i chwi jyub' Nebo chi o pa kulew aj Moab, chi o chwach i Jericó. Chila kawil wi pan ulew Canaán chi kinya ni chke aj Israel re kek'iji chwach. 50I jyub' chi katel b'i puwi le, chila katkam wi kanoq, kat-e ku' atinimit, keje pacha xu'an awatz ma Aarón chi xkam chila puwi i jyub' Hor chi xaq x-e ku' utinimit. 51Yix chixkeb' xixkojon ti chwe man xikoj ti in-ij chkiwach konojel aj Israel are ix o chila pa ralaxb'al ya chi Meriba de Cades ub'i; chila pa tz'inilik jyub' chaqij Zin, lik xikoj ti in-ij chkiwach ike 52Rumali, chinaj kataqej wi pan ulew chi kinya chke aj Israel, xwiri yet katok ti chik chwach.”

Currently Selected:

Deuteronomio 32: ACHICUB

Highlight

Copy

Compare