Deuteronomio 31
31
Ma Josué kkanaj puk'exel ma Moisés
1Ma Moisés xlapan chik ku' aj Israel, xub'ij chke:
2Yin o chik waqwinaq (120) junab' chwe, nti chik incho'ab' re to' kin-e taq k'ulala, xwi ta la ile xaq i Ajwal ub'im chwe chi kin-axuj ti i raqana Jordán. 3Xwiri Iwajwal Dios knab'ej nu b'i chiwach yix, kuchup ni kiwach konojel i winaq pa jalajuj nimaq taq tinimit ipa kixik'aw wi man kixk'iji ni chwach kulew. Ma Josué knab'ej nu b'i chiwach yix pacha iwaj-atzil, chrij pacha ub'im i Ajwal. 4I Ajwal ku'an ni chke i winaq pa jalajuj taq tinimit pacha xu'an chke ma Sehón xaq i ma Og, chi je ajawinel pkiwi aj Hamor; chi xchup uwach kitinimit rumal i Ajwal. 5I Ajwal are ujachom chik i jalajuj taq tinimit le piwi, chi'ana ronojel ni'pa inb'im chiwe. 6Chikowij iwib', chikub'a ik'ux xaq mixij iwib' are kixok chu'anik ch'oj ku' ike, man Iwajwal Dios o iwu' yix, lik kixro'taj ti kan itukel.
7Chrijil chik ile ma Moisés xusik'ij ma Josué, xub'ij i tziji che chkiwach konojel aj Israel:
“Chakowij ak'ux xaq lik chakowij awach. Man yet kak'am nu b'i i tinimiti che i ulew chi xusujuj i Ajwal chke iwatit imam ujer, lik chaqul yet o wi chi kkik'am kan kulew ike le. 8Lik are i Ajwal knab'ej b'i chawach lik kk'iji ni awu' xaq lik katro'taj taj, rumali chakowij ak'ux xaq maxij awib'.”
Rajlaxik uwach u'atb'al tzij i Ajwal che i junab' re i kuyb'al taq k'as
9Ma Moisés xutz'ib'aj i atb'al tziji, te'uri xujach chke aj Leví chi je ajsujul sipon chi je are kek'amaw b'i kaxa chi o utrat i Ajwal chupam xaq chke konojel knimaqil aj Israel. 10Are uri ma Moisés xuya i taqaniki:
“Pa taq wuqub' junab', are kuriqa i junab' chi re kuyb'al k'as, che i nima'ij ke i mujb'al re es 11xaq are kimol iwib' iwonojel yix ix aj Israel chwach Iwajwal Dios che i k'ijib'al chi ku'ul ni Ire, chila kawajlaj wi uwach i atb'al tziji chwach i tinimit Israel. 12Konojel i winaq, achiyab', ixoqib', ak'alab' xaq aj naj chi je o pitinimit, rajwaxik chi iwonojel kimol iwib' man kita rajlaxik u'atb'al tzij i Dios man kixnaw ni chuya'ik u'ij xaq keje ile kixkojon na xaq ki'an na chrij pacha kub'ij i atb'al tzij le. 13Man keje ile iwak'al yix, chi keta'am taj, xaq kkita na wach kub'ij u'atb'al tzij Iwajwal Dios xaq kenaw ni chukojik u'ij xaq kekojon ni che i Ajwal ronojel ij re kik'aslemal chwach ulew, chi kixk'iji ni yix chwach are i'axum chik i raqana Jordán.”
K'isb'al taq utzij i Ajwal che ma Moisés
14Are uri i Ajwal xub'ij che ma Moisés:
“Chata pe', yet ya kuriq i ij chi katkamik, rumali chasik'ij ma Josué, i chixkeb' jix chila pa ja re riqb'al ib' ru' i Dios, man Yin kinya intaqanik che ire chila.”
Are uri ma Moisés xaq i ma Josué xe'e pa ja re riqb'al ib' ru' i Dios. 15Chila xuk'ut wi rib' i Ajwal chke chupam jurab'aj sutz', xk'iji chila puwi i okb'al che i ja re i molb'al ib'. 16Are uri i Ajwal xub'ij che ma Moisés:
Yet ya katkamik i winaqi xaqmanal ni ke'ok chu'anik, kkikoj ni ki'ij jub'an chik dios ke i winaq ipa kejeqi wi, are uri kinko'taj kanoq xaq kkiqel ni intrat chi in-anom ku'. 17Xwiri woywal ktzaq ni pkiwi ike, man are kki'an ile Yin lik kewo'taj ni kanoq, xaq lik kink'achir ti chik kumal, kpe ni jalajuj taq yob'il xaq jalajuj taq k'ax pkiwi, te'uri kkib'ij na: “¿Moqxa nti chik i Dios qu' rumali kqatij i jalajuj taq k'axi?” 18Xwiri are kuriqa i ij chi kkib'ij ile, Yin xane mas kinjek' wib' ku' rumal ronojel ni'pa i utz taj chi kki'ano xaq rumal kkikoj ki'ij i jub'an chik dios.
19Wo'or ut, chatz'ib'aj i b'ixi xaq chak'utu chke aj Israel re kkib'ixaj na re saqinel tzij, xaq re ilb'al re chkij ike. 20Man are je inya'om chik chwach ulew chi xinsujuj chke katit kimam ujer, chi are ulew chi lik o leche xaq o uwa'al kab' chwach chi lik kb'inik pacha i ya, xaq chila kkitzuq wi kib' k'a kenoj na xaq k'a keti'ojir na, are uri xa keterej chkij i jub'an chik dios, xaq kkikoj ki'ij, are uri kkik'aq b'i in-ij Yin xaq kkiqel intrat. 21Xwiri are kpe ronojel ni'pa i jalajuj taq k'ax xaq i uyej pkiwi, are uri i b'ixi kusaqij ni chke chi utz ti kki'ano, man i kimuq kixikin kk'un ni chkik'ux xaq kkib'ixaj na are k'amaja kin-an chke chi ke'ok chwach ulew chi insujum chke, man lik weta'am chik wach i kich'ob'onik.
22Lik che i ij le, i ma Moisés xutz'ib'aj i b'ix xaq xeutijoj aj Israel chub'ixaxik.
23I Ajwal xub'ij che ma Josué, chi uk'ojol ma Nun:
“Chakowij ak'ux xaq lik chakowij awach man yet kak'am nu b'i i tinimiti che i ulew chi xinsujuj chke, Yin lik katwo'taj taj.”
24I ma Moisés are xutzin chutz'ib'axik i atb'al tzij rumal, chupam jun wuj, 25are uri xub'ij chke aj Leví chi je are kek'amaw b'i i kaxa re utrat i Ajwal:
26“Chik'ama i wuji chi re i atb'al tzij, chiya junam ru' i lo'laj ukaxa Iwajwal Dios, man kuriq uchak re kkuxtaj chiwe we utz ti ki'ano. 27Man yin weta'am chi yix ix jun tinimit chi lik ix qelqel che i Ajwal, we keje ki'an ile chi k'a in k'aslik, ¿Wach nawi uri ki'ano are in kamnaq chik? 28Cheik'ama li waral konojel unimaqil xaq aj-atzil ke i tzob'ajil, man yin kinlap ni iri chke xaq are ni kaj xaq i ulew krilo xaq kuta wach kinb'ij chke. 29Man yin weta'am chi chrijil chik inkamik, yix xaqmanal kixok chu'anik xaq kiwo'taj kan i b'e chi inb'im chiwe chi kixb'in che; xaq weta'am chi k-on panoq kpe ni jalajuj taq tojpen piwi rumal i utz taj chi ki'an chwach i Ajwal, xaq rumal ile ki'an che chi kpe roywal.”
B'ix re ma Moisés
30Are uri i ma Moisés ko xub'ixaj i b'ixi, xujeqo xaq xuk'is ub'ixkil, chkiwach konojel i aj Israel chi kimolom kib'.
Currently Selected:
Deuteronomio 31: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
