Deuteronomio 30

Wach rajwaxik k-anik man ktzalij chik utzil chomal

1Ma Moisés xub'ij chik: Are kpe piwi ronojel ni'pa xintzijoj chiwe, utzil chomal xaq i k'oqb'al, lik chixch'ob'on chrij ile, are ix o pa taq tinimit ipa xixutaq wi b'i i Ajwal are xixresaj b'ik. 2We kixtzalij chik ru' i Ajwal xaq we kixkojon che ru' ronojel ik'ux, yix xaq keje iwak'al pacha kixintaq che wo'or, 3are uri Iwajwal Dios kujalwachij ik'aslemal, kresaj i utz taj, kuya i utz puk'exel xaq kril ni tob'al iwach; xaq kumol chik ichi' che i tinimit ipa xixresaj wi b'i te'eq. 4Tupu yix lik naj ix kichersam b'i chwach i jyub' ta'aj, k'a chila kupon wi Iwajwal Dios chitzukuxik xaq kixuk'am chal pitinimit. 5Iwajwal Dios ku'an ni chiwe chi kixtzalij chik chwach iwulew ipa xejeqi wi iwatit imam, ku'an ni chiwe chi kixel chisaq xaq lik kek'iyar ni iwak'al yix chkiwach iwatit imam. 6I Ajwal kukoj ni ilb'al re i trat pik'ux yix xaq pkik'ux imuq ixikin, man keje ile k'ax ni kina ru' ronojel ik'ux xaq keje ile o ni ik'aslemal. 7Iwajwal Dios yix ku'an na chi ktzaq ronojel ni'pa i k'oqonik pkiwi ajch'oj chiwij, xaq pkiwi konojel ni'pa i tzel kixkilo. 8Are uri yix kiya chik ik'ux che i Ajwal, xaq kixkojon ni che xaq ki'an ni ronojel wach kub'ij utzij upixab' chi kuya Ire chiwe wo'or. 9Are uri i Ajwal kuya ni utzil chomal piwi che ronojel ni'pa ki'ano, xaq kuya ni utzil chomal pkiwi iwak'al, pkiwi i kak'al ichikop xaq keje che i jalajuj taq tikon chi kuya ulew chiwe. Qatzij Iwajwal Dios lik kkikot tan chik chuya'ik utzil chomal piwi pacha uya'ik utzil chomal xu'an pkiwi iwatit imam. 10Xwiri we kixkojon che Iwajwal Dios xaq we ki'ano pacha kub'ij utzij upixab' xaq u'atb'al tzij chi tz'ib'tal chupam i wuji re i atb'al tzij, xaq we kixtzalij chik ru' I Ajwal ru' ronojel ik'ux xaq ru' ronojel iwanima.

11I utzij upixab' i Ajwal chi kinya chiwe wo'or lik k'ax ti k-an chiwe man lik kixtiki chu'anik. 12Chikaj taj o wi man kib'ij taq keje iri: “¿Pachin taq wa kel b'i chikaj man kuqajsaj li chqe man kqetamaj wach kub'ij te'uri kojok chu'anik?” 13Xaq ch'aqa mar taj o wi man kib'ij taq keje iri: “¿Pachin taq wa ku'axuj i mar man kuk'ama chqe man kqetamaj wach kub'ij, te'uri kojok chu'anik?” 14Keje ti ile, man utzij upixab' i Ajwal naj ti o wi chiwe, xa pichi' xaq pinojb'al man keje ile kixtiki chu'anik.

15Chita pe', wo'or kinya chiwe, ki'ulu pachike kiwaj we are k'aslemal rachi'ilam i utz, xaq we are i kamik rachi'ilam i utz taj. 16We kixkojon che wach kixintaq che wo'or, xaq we k'ax kina Iwajwal Dios, we kixb'in pub'e, xaq we ki'ano pacha kub'ij utzij upixab', u'atb'al tzij xaq utaqanik lik kixk'asi ni uri, xaq lik k'i ni iwak'al uri kealax na. I Ajwal kuya ni uri utzil chomal piwi chwach ulew ipa kix-e wi pa jeqelem. 17Xwiri we kikoj ti retalil che ronojel ni'pa ile, xa kiya iwib' chi kixt'or chukojik ki'ij jub'an chik dios xaq kixxuki taq chkiwach ike, 18lik wo'or kinsaqij chiwe chi kixkam na xaq lik naj taj kixk'asi chwach ulew chi kimaj kanoq are i'axum chik i raqana Jordán. 19Wo'or kinkoj i kaj xaq i ulew chi je are ni ike je saqinel tzij chiwij xaq xkita chi Yin xinya chiwe chi ki'ulu pachike kumaj iwach, we are k'aslemal xaq we are i kamik, we are utzil chomal xaq we are i k'oqonik. Yin kinsaqij chiwe chi utz ki'ul i k'aslemal man keje ile kixk'asi na, kek'asi ni uwi imam xaq konojel ilemajil. 20K'ax china Iwajwal Dios, chixkojon che xaq chiya ik'ux che, man rumal ile o ni ik'aslemal yix xaq lik naj ni kixk'asi chwach ulew chi xusuj chke iwatit imam chi mam Abraham, mam Isaac xaq mam Jacob.

Currently Selected:

Deuteronomio 30: ACHICUB

Highlight

Copy

Compare