Deuteronomio 26
26
Sipon re i nab'e taq uwach i tikon
1Are at oknaq chik chwach ulew chi kuya Awajwal Dios chawe xaq are at o chik chwach, 2kawesaj ni nab'e taq uwach i jalajuj taq atikon chi kuya i ulew chawe, kak'am b'i chupam jun chikach, kaya chila che i k'ijib'al chi ku'ul Awajwal Dios chawe re kojb'al u'ij ub'i. 3Chila kak'utu wi awib' chwach i ajsujul sipon chi o pupatan che i ij le, kab'ij ni che: “Yin kinsaqij wo'or, chwach i Wajwal Dios, chi in o chik chwach ulew chi lik xusujuj chke i qatit qamam re kuya chqe.” 4Are uri i ajsujul sipon kuk'am ni chikach chi kaya che, te'uri kuya ni chwach i sujb'al sipon re Awajwal Dios. 5Te'uri kab'ij ni tziji chwach Awajwal Dios:
“Watit imam ike je are jutzob'aj chi je k'i taj chi je aj Aram, chi to' xeb'inik. Xeupon chila pa Egipto, chila xejeqi wi kanoq, xaq chila che i k'ijib'al le xek'iyar wi xaq lik xkowir kiwach. 6Xwiri aj Egipto xek'iji pqawi xaq xki'an k'ax chqe man xojkiya chupam i k'ax laj taq chak. 7Are uri xqatz'onoj che i Ajwal chi ki-Dios qaqajaw qachuch chi kojuto xaq i Ajwal le xojuta wach xqatz'onoj che, man Ire xril i nim laj b'is xaq i k'ax laj taq chak chi xya' chqe. 8I Ajwal le xuk'ut i nim laj ucho'ab' xaq i nim laj roywal, xaq lik ru' nimaq taq il xojresaj li pa Egipto. 9Xojuk'am li che i k'ijib'ali xaq xuya ulewi chqe chi lik o i leche xaq lik o uwa'al kab' chwach, chi lik keje pacha i ya kb'inik. 10Rumali wo'or xqak'am li i nab'e taq uwach i jalajuj taq tikon chi xuya ulew chqe chi xuya i Ajwal chqe.”
Chrijil chik ub'ixkil ile kaya kan achikach chila chwach i Ajwal; te'uri katxuki ni chwach Ire. 11Te'uri ka'an ni nima'ij rumal ronojel ni'pa i utzil chomal chi uya'om i Ajwal chawe xaq che awalk'uwal. Xaq che i nima'ij le o ni ke aj Leví che xaq i aj naj chi je o chixol.
Sipon lajuj che ronojel i ch'akanik
12Are kuriqa i urox junab' chi are i junab' le kya' i sipon lajuj che i ch'akanik re ronojel ni'pa utzil chomal chi kuya i Dios, xaq are awesam chik i sipon lajuj che i ch'akanik re ronojel uwach atikon, xaq are aya'om chik chke aj Leví, xaq chke aj naj chi je o pitinimit, chke i ak'alab' chi nti chik kiqajaw kichuch, ixoqib' malkanib', man kkitij ni ni'pa kkaj chila pitinimit. 13Te'uri kab'ij ni chwach i Awajwal Dios:
“Wesam chik insipon lajuj che i xinch'ako chi lik awe Yet, injachom chke aj Leví, chke aj naj, chke ak'alab' chi nti chik kiqajaw kichuch xaq chke i je malkanib' chi je o pqatinimit. Keje ile in-anom chrij pacha ataqom ub'ixkil. Keje ile kqaqel ti tzij pixab' xaq lik sachnaq ti chqak'ux. 14Are in o chupam i b'is xaq are in o chupam i ch'am taj xintij ti ni'pa awe Yet, mitene xinsujuj taq chkiwach i kamnaq, Qajwal Dios yin in kojonnaq chawe, xaq in-anom ronojel ni'pa i xab'ij chwe. 15Chawila li chila chikaj, chawila li chila che i chom laj ak'ijib'al ipa at o wi, chaya li utzil chomal pqawi yoj chi oj atinimit Israel xaq puwi ulew chi xaya chqe chi lik o i leche xaq i uwa'al kab' chwach kb'inik pacha i ya, chrij pacha xasujuj chke i qatit qamam.”
Israel are jun tinimit chi jachtal pu'ab' i Ajwal
16Awajwal Dios wo'or katutaq che chi cha'ana wach kub'ij i atb'al tziji xaq i utzij upixab' lik cha'ana ru' ronojel ak'ux xaq ru' ronojel awanima. 17Wo'or asaqim chi Ajwal lik are a-Dios, xaq ab'im chi katb'in ni che ub'e xaq ka'an ni ronojel wach kub'ij u'atb'al tzij, utzij upixab' xaq utaqanik lik arewi katkojon ni che. 18Xaq i Ajwal usaqim chi yet at aj Israel lik at utinimit chi lik o a'ij chrij pacha xub'ij chke awatit amam, rumali rajwaxik chi wo'or ka'an na chrij pacha kub'ij utzij upixab'. 19I Ajwal ku'an ni jun nim laj tinimit chawe, chi lik nim a'ij chkiwach i jub'an nimaq taq tinimit, xaq lik o a'ij kumal i winaq, xaq lik ke'el na pacha ub'im Ire, chi lik are jun tinimit jachtal pu'ab' Awajwal Dios.
Currently Selected:
Deuteronomio 26: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
