Deuteronomio 20
20
Atb'al tzij chrij u'anik ch'oj
1Yix are kix-e chu'anik ch'oj xaq are kiwilo chi je ajch'oj chiwij o k'i kikaway, ch'ich' re ch'oj, xaq lik je k'i achiyab' chi je yij che i ch'oj chwach iwe yix, lik mixij iwib' chke, man o Iwajwal Dios iwu' chi xixresaj li pa Egipto. 2Are kuriq i or re i ch'oj, i ajsujul sipon k-e pan ku' achiyab' chi je yij che i ch'oj, 3kub'ij ni chke: Chita iri, yix ix aj Israel, wo'or ki'an ni ch'oj ku' i ajch'oj chiwij, mqaj ik'ux, mixij iwib', mixsiksat rumal ixib'rikil, xaq mixok il, 4man Iwajwal Dios o iwu'; Ire ku'an ni ch'oj pik'exel ku' ajch'oj chiwij xaq ku'an ni chiwe chi kixch'akanik.
5Te'uri kech'aw chik i aj-atzil, kkib'ij chke i winaq: We o jun chiwe yix u'anom jun rachoch k'ak' xaq k'ijinaq ti chupam, su' oj uri chi rachoch wo'or man moqxa kkam taq kan pa ch'oj, jun chik uri kk'iji kan chupam i rachoch k'ak'. 6We o jun chiwe yix o rulew chi utikom uva chwach, we utijom ti uwach i uva le, su' oj uri chi rachoch wo'or man moqxa kkam taq kan pa ch'oj, jun chik uri kmolow uwach i uva. 7We o jun chiwe yix uch'ikom chik i ij chi kk'uli'ik, su' oj uri chi rachoch man kk'uli'ik, man moqxa kkam taq kan pa ch'oj, jun chik uri kk'uli ru' i ali.
8Te'uri i aj-atzil kkib'ij chik chke achiyab' chi je yij che i ch'oj: We o jun chiwe yix kuxij rib' xaq nti ukowil uk'ux, su' oj uri chi rachoch man keje ile keritzij ti rachi'il. 9I aj-atzil are keutzin che i lapanik ku' achiyab' chi je yij che i ch'oj, are uri i keok'aw utzam i ajch'oj le, kenab'ej b'i chkiwach.
10Yix are kixupon che jun tinimit chu'anik ch'oj, i nab'e chi ki'ano are uchomaxik iwib' ku' ike. 11I winaq chi je o che i tinimit le we kkaj uchomaxik kib' iwu', kkiya uri chiwe chi kixok ku' pa tinimit, lik ki'an ni uri chke chi kki'an k'ax laj taq ichak yix xaq ki'an ni winaq chke chi je o pa k'ax iwumal yix. 12Xwiri we kkaj ti uchomaxik kib' iwu', man lik xwi ch'oj kkaj, kisutij rij uri i tinimit xaq lik kixok uri chu'anik ch'oj ku'. 13Iwajwal Dios ku'an ni chke chi ketzaq ni pi'ab' yix, are uri yix kikamsaj ni konojel ike le ru' ch'ich' chi o uware k'ulala. 14Ixoqib', ak'alab', jalajuj taq chikop xaq ronojel ni'pa i jalajuj taq b'iroxik chi o pa tinimit, lik iwe yix ni uri, xaq lik china ujelal ronojel ni'pa kuya Iwajwal Dios chiwe chi ke te'eq i ajch'oj chiwij. 15Xaq keje ile chi'ana chke konojel i tinimit chi naj je o wi chiwe, chi xaqjunam ti kiwach ku' i tinimit chi je o chik pi'ab'. 16Xwiri mijun winaq kik'asb'a kan chila pa taq tinimit chi kuya Iwajwal Dios chiwe chi lik iwe yix na; 17are ki'ano, kichup ni kiwach konojel i winaq, ke'eloq pacha jun sipon chi kiporoj chwach i Ajwal, ike le je are ni konojel aj Het, aj Hamor, aj Canaán, aj Ferez, aj Jiw xaq aj Jebus, chrij pacha utaqom u'anik i Ajwal. 18Man kkik'ut ti chiwe ronojel ni'pa jalajuj taq i ch'am taj chi kki'an ike kojb'al ki'ij i jalajuj taq dios, chi xaq ku'an ni chiwe chi kixmakun chwach Iwajwal Dios.
19Are kisutij rij jun tinimit, we kixnajtin chu'anik ch'oj chrij k'amb'al kan re ulew, lik michet taq uche'lal echa' ru' ikaj man kuriq uchak chiwe, i uwach kajwax chiwe re kitijo, xaq i che' le je winaq taj man kkito taq kib' chiwach. 20Xwi i che' chi kuya ti uwach utz kik'aq pulew, xaq kajwax ni chiwe re kisutij rij i nim laj tinimit chi ki'an ch'oj chkij, k'a ketzaq ni pi'ab' konojel.
Currently Selected:
Deuteronomio 20: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
