Deuteronomio 19
19
I nimaq taq tinimit re tob'al ib'
1Iwajwal Dios are uchupum chik kiwach konojel i winaq chi je o pa jalajuj taq tinimit xaq are kuya kulew chiwe chi ke ike wo'or, xaq are ix jeqel chik yix chwach kitinimit xaq chupam i kachoch; 2ki'ul ni oxib' nimaq taq tinimit chke i ulew le chi kuya i Ajwal Dios chiwe. 3Kyijb'ax ni i b'e chi kok che oxib' nimaq taq tinimit le, xaq keje ile ki'an ni oxib' che ulew chi kuya i Ajwal Dios chiwe chi lik iwe yix na, man keje ile we jun kukamsaj jun winaq chila uri kuto wi rib' che i jun chke i oxib' tinimit le. 4Jun winaq we xu'an i kamik utz uri kuto rib' chila, tob'al re uk'aslemal we lik qatzij chi chu'anik taj xu'an i kamik; xaq we nti jun kich'oj chkiwach. 5Pacha wa iri: Jun we x-e ru' i rachi'il pa taq es chutzukuxik si', xwiri are kok chuchetik i si' ru' ikaj, xaqte'et i ikaj le kel che i raqan, kumaja i rachi'il xaq we su' xkamik, k-e uri i xkamsanik le che jun chke i nimaq taq tinimit chi re tob'al ib', chila kuto wi uk'aslemal. 6Xwiri i nim laj tinimit re i tob'al ib', we lik naj o wi, kriqtaj uri pa b'e rumal jun rachalal i kamnaq chi naqaj o wi, we kterej b'i chrij kukamsaj uri, xwiri i achi le kmajaw taj chi kkamsaxik man chu'anik taj xu'an i kamik, man lik nti kich'oj ru' i jun chi xkamik. 7Rumali kixintaq chu'ulik oxib' nimaq taq tinimit, 8xaq are kunimarsaj iwulew Iwajwal Dios xaq are kuya ronojel ulew le chiwe chrij pacha usujum chke iwatit imam ujer, 9are uri yix ki'ul chik oxib' nimaq taq tinimit re tob'al ib' puwi i oxib' chi i'ulum chik; xwiri yix lik k'ax china i Ajwal Dios, chi'ana pacha kub'ij utzij upixab' xaq chixkojon che utzij upixab'. 10Man keje ile i winaq chi nti umak to' ti kkamsax pa tinimit chi kuya Iwajwal Dios chiwe chi lik iwe yix na, xaq nti jun kamik k-ab'ax chiwij.
11Xwiri jun we ajch'oj chrij jun chik xaq are kuk'ulaj, kukamsaj, te'uri k-e la chuto'ik rib' che jun chke i nimaq taq tinimit chi re tob'al ib', 12are uri unimaqil re i nim laj tinimit kkitaq uchapik, te'uri kkiya pu'ab' i rachalal i jun chi xkamik, man keje ile kkamsax na. 13Lik miwil pich' tob'al uwach, man keje ile ki'atij ni kamik chke i winaq chi nti kimak chila pa Israel, we keje ile ki'ano is utz uri kixel ru' ni'pa i ki'ano.
14Are kixok chila che i ulew chi kuya Iwajwal Dios chiwe, lik kiyoj ti umojon i iwachalal che chi o chuchi' iwulew, lik chiya kan chila chrij pacha ki'anom kan iwatit imam che.
Atb'al tzij chkij i ajsaqinel tzij chi qatzij ti kkib'ij
15We xa jun ajsaqinel tzij kukoj umak jun winaq chi ili'om, ajch'oj o we ajkamsanel, lik koksax ti uri pajil, xwi koksax pajil we je keb' o je oxib' ajsaqinel tzij chi kkikoj umak jun winaq.
16We o jun utz ti laj winaq kuponik pacha ajsaqinel tzij chi qatzij ti kub'ij, kch'aw chrij jun lok'anij to' kunuk' an umak, lik kub'ij taq chi ajmak, 17are uri i keb' winaq le chi je o pa ch'oj ke'e chwach i Ajwal, chkiwach i ajsujul sipon xaq chkiwach aj-atol tzij chi je o pa kipatan che taq i ij le. 18I aj-atol tzij kkik'am ni upam wach mer usuk' u'anom i tzij le, we xe'eloq chi xa unojim i tzij chrij ulok'anij, 19kya' ni uri utojb'alil che pacha kraj te'eq ire che i jun chik rachi'il. Keje ile kk'is ni uri i utz taj chi o chixol yix. 20Are kketamaj i jub'an chik winaq ile, lik kkixij ni kib' uri chu'anik jun t'oronik pacha x-on jun achi le chi lik utz taj. 21Lik miwil pich' tob'al wachij: We jun xukamsaj jun winaq, xaq kkamsax chik uri ire; we xupuch' ub'a'wach jun chik lok'anij, xaq kpuch' chik ub'a'wach ire uri; we xub'oq uware i rachi'il, xaq kb'oq chik uri uware ire; we xupatz' u'ab' i rachi'il, xaq kpatz' chik uri u'ab' ire; xaq we xupatz' raqan i rachi'il che, xaq kpatz' chik uri i raqan ire che.
Currently Selected:
Deuteronomio 19: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
