Deuteronomio 11
11
I unimal u'ij uchomal i Ajwal
1Lik ij ij k'ax china Iwajwal Dios, xaq chi'ana chrij pacha kub'ij u'atb'al tzij, utaqanik xaq utzij upixab'. 2Chk'un chik'ux xaq lik chik'ama i jek'anik chi ku'an Iwajwal Dios, nimaq taq tojpen, ronojel ni'pa u'ij uchomal xaq i nim laj ucho'ab' Iwajwal Dios chi xuk'ut chiwe yix chi xkil ti iwak'al, 3xaq xiwil ronojel ni'pa i nimaq taq il chi xu'an i Ajwal chila pa Egipto che ma faraón xaq chke konojel utinimit. 4Xaq wach xu'an chke uwinaq chi je yij che i ch'oj, chke konojel kikaway xaq chke kikareta chi xeumuq b'i konojel chuxe' i nim laj mar Kaq are ix kiterb'em yix. I Ajwal su' chila xuchup wi kiwach konojel. 5Xaq chk'un chik'ux ronojel ni'pa xu'an i Ajwal chiwe are ix o pa tz'inilik jyub' chaqij, lik k'a xixk'un ni waral; 6xaq ni'pa xu'an che ma Datán xaq che ma Abiram, chi je rak'al ma Eliab, chi je umuq uxikin ma Rubén, xaq chk'un chik'ux wach ujaqik rib' ulew xu'ano are xeub'ib'i junam ru' i ralk'uwal, xaq junam ru' kimujb'al xaq ronojel ni'pa ub'itaq ke, ile xuk'ulmaj chkiwach konojel aj Israel. 7Yix lik iweta'am man xiwil i nimaq taq il chi xu'an i Ajwal.
Utzil chomal re ulew sujtalik
8Chi'ana ronojel ni'pa kub'ij intzij inpixab' chi inya'om chiwe, keje ile lik kpe icho'ab' xaq kixupon chila i lik kik'am i ulew chi lik iwe yix, 9man keje ile k'iyal junab' uri kixk'asi ni chwach ulewi chi xusujuj i Ajwal chke iwatit imam xaq chke kimuq kixikin; ulew chi lik o leche xaq lik o uwa'al kab' chwach chi lik kk'is taj. 10I ulew chi kimajo keje taj pacha i ulew pa Egipto ipa xixel wa loq, man chila Egipto yix kitik i ija xaq yix kija'aj chik ru' iwaqan, pacha k-an pa taq tikonb'al. 11I ulew chi kixjeqi yix chwach lik are jun ulew chi lik o i ta'aj che xaq lik o i jyub' che, chi lik rax rumal i jab' man lik olik. 12I ulew le are i Ajwal kchajiwik, lo'laj ub'a'wach lik arewi kresaj ti puwi ulew le ronojel junab'.
13Yix we ki'ano chrij pacha kub'ij i tzij pixab' chi xinya chiwe wo'or, xaq we lik k'ax kina Iwajwal Dios, xaq kikoj u'ij ru' ronojel ik'ux xaq ru' ronojel iwanima, 14I Ajwal ku'an ni che i jab' chi kpe pu'ijlal, are kjeqan i alaj xaq are kk'isik, man keje ile yix lik kimol ni i trigo, uwa'al uva muqb'am xaq i aceite. 15I Dios xaq ku'an na chi kk'iy i es pa taq es re kiwa i chikop, xaq yix lik k'i ni iwa olik re kitijo. 16Xwiri lik chi'ana kwent iwib' mixt'ortajik, miwo'taj kan i Ajwal Dios rumal ukojik ki'ij i jub'an chik dios; xaq mixxuki taq chkiwach, 17man i Ajwal kpe roywal chiwe yix iwonojel xaq kutaq ti chali jab' pu'ijlal, are uri i ulew kuya ti chik uwach i tikon chi kitik chwach, rumali yix kixkam ni chwach i chom laj ulew le chi kuya ni Ajwal chiwe.
18Chik'olo i tziji pinojb'al xaq pik'ux, re k'utb'al re, chixima che uqul i'ab', xaq chinak'a chwach ikrusil. 19Chib'ij i tzij le chke iwak'al, chi iwachoch xaq pa taq b'e, are kixwarik xaq are kixwalijik. 20Chitz'ib'aj che i aqan xaq chwach taq uchija re iwachoch, 21man keje ile yix xaq iwak'al lik naj na kixk'asi chwach ulew chi xusujuj i Ajwal chke iwatit imam, ik'aslemal le keje na pacha i kaj chi naj uwach puwi ulew.
22Yix we ki'ano chrij pacha kub'ij ronojel utzij upixab' chi kixintaq chu'anik wo'or, xaq we k'ax kina Iwajwal Dios xaq kijek' ti iwib' che i ub'e, 23I Ajwal lik chiwach yix keresaj nu b'i konojel i winaq, xaq yix kimaj ni kan i tinimit chke i winaq chi lik je k'i chi xaq lik o kicho'ab' chiwach yix. 24Ipa kixik'aw wi lik chila kkanaj ni i uchi' iwulew pi'ab' yix; kjeqan b'i che i tz'inilik jyub' chaqij, kupon k'a che i ulew Líbano xaq kjeqan chub'i uchi' che i raqana Éufrates, kupon k'a chuchi' i mar Mediterráneo. 25Mijun tinimit kuch'ij taq u'anik ch'oj iwu' man Iwajwal Dios kuya ni xib'rikil pkiwi konojel i winaq pa jalajuj taq tinimit ipa kixik'aw wi, chrij pacha ub'im i Ajwal chiwe.
26Che i iji, kinya chiwe kicha upam pachike kiwaj che i keb' tziji: Are utzil chomal o are i k'oqb'al. 27Kya' ni utzil chomal chiwe we kixkojon che utzij upixab' Iwajwal Dios, chi xixintaq che wo'or. 28Kya' ni k'oqb'al chiwe we kixterej chkij i jub'an chik dios chi etamam ti kiwach, xaq we kiqel utzij upixab' Iwajwal Dios, xaq we kijek' iwib' che i b'e chi xixintaq che wo'or.
29Are ix roksam chub'i Iwajwal Dios chwach ulew chi kimaj kanoq, i utzil chomal kiya ni puwi i jyub' Gerizim xaq i k'oqb'al kiya ni puwi i jyub' Ebal. 30I keb' jyub' le o chila ch'aqa ya che i raqana Jordán, pusuk' b'i i b'e chi k-e puqajb'al ij chupam kulew aj Canaán, chi je o chila chwa ta'aj chi Arabá ub'i, chwach i tinimit Gilgal xaq naqaj che i nimaq taq che' sik'al chi More ub'i. 31Yix lik ya ki'axuj i raqana Jordán xaq ya kimaj kan ulew chi kuya kan Iwajwal Dios chiwe. Are imajom chik ulew le xaq lik ix jeqel chik chwach, 32lik chi'ana ronojel pacha kub'ij u'atb'al tzij xaq utaqanik i Dios chi xinya chiwe wo'or.
Currently Selected:
Deuteronomio 11: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
