Deuteronomio 10
10
Ujalwachixik i trat
1Are uri i Ajwal xub'ij chwe: “Chayijb'a chik keb' tz'alam ab'aj pacha i keb' chi xapaxij nab'e, xaq cha'ana jun kaxa che', te'uri chatel li chwi jyub'i. 2Yin kintz'ib'aj chik i tzij chwach i tz'alam ab'aj le chi o te'eq chwach keb' nab'e chi xapaxij yet, te'uri kak'ol chupam i kaxa.”
3Are uri xin-an jun kaxa che' chi che uche'lal suj xwesaj wi, xaq xinyijb'a keb' tz'alam ab'aj, te'uri xink'am b'i chwi jyub' Horeb. 4I Ajwal xutz'ib'aj i lajuj utzij upixab' chwach i keb' tz'alam ab'aj, chrij pacha xu'an che i nab'e are xixu'ijla chila chupam i a' chi ktoqow chwi jyub' Horeb, are qamolom qib' qonojel. I Ajwal xuya chali i keb' tz'alam ab'aj chwe 5te'uri xinqaj li chwi jyub', inya'om li i tz'alam ab'aj chupam i kaxa chrij pacha xub'ij i Ajwal chwe; i keb' tz'alam ab'aj le k'a o chupam i kaxa le wo'or.
6I aj Israel xe'el chila pa Beerot-bene-jaacán xe'e chila pa Mosera. Chila xkam wi ma Aarón xaq chila xmuq wi kanoq, rumali chi are uk'ojol chi ma Eleazar xkanaj puk'exel chi ajsujul sipon. 7Te'uri xe'el chila ipa je o wi xe'e pa Gudgoda, kelik chila pa Gudgoda, xe'e pa Jotbata, che i k'ijib'al le lik k'i ya olik. 8Chila x-ul wi ulemajil ma Leví rumal i Ajwal re kkik'amb'ej b'i kaxa re utrat i Ajwal, man keje ile kkiya chwach i Ajwal are kkikoj u'ij xaq are kkiya utzil chomal pkiwi aj Israel pub'i i Ajwal pacha k'a kki'an wo'or. 9Rumali aj Leví nti kulew xya'ik pacha xya' chke iwach aj tinimit, man i kulew ike are i Ajwal, chrij pacha ub'im i Ajwal.
10Yin xink'iji chwi jyub' kawinaq (40) ij xaq kawinaq (40) a'ab' pacha xin-an nab'e mul, xaq wo'or i Ajwal xinuta man xraj ti usachik iwach yix iwonojel. 11I Ajwal xub'ij chwe: Chayijb'a awib' man katnab'ej b'i chkiwach i winaq man kix-e chumajik ulew chi usujum i Ajwal chke iwatit imam.
Wach kraj i Dios chi yix ki'ano
12Wo'or ix aj Israel ¿Wach taq mas wa kutz'onoj Iwajwal Dios chiwe? Xwi chiya u'ij xaq lik chixb'in pub'e, k'ax china xaq chikojo u'ij ru' ronojel ik'ux, ru' ronojel iwanima, 13xaq chi'ana pacha kub'ij utzij upixab' xaq u'atb'al tzij, man keje ile lik utz kixel ru' ronojel ni'pa ki'ano. 14Chikojo retalil chi Iwajwal Dios re Ire ronojel i kaj xaq ronojel ni'pa o puwi i kaj, xaq ronojel ni'pa jyub' ta'aj xaq ronojel ni'pa o chwach. 15Xwiri i Ajwal xeu'ul iwatit imam xaq lik k'ax xeuna'o, te'uri xeu'ul kimuq kixikin ike le chi ix are yix, chi xixu'ul chkixol i jub'an chik tinimit, lik pacha kqil wo'or.
16Lik chik'olo piwanima i k'utb'al chi re i trat chi xu'an Iwajwal iwu' mi'an chik ile chi lik ix b'uy laj taq winaq, 17man Iwajwal Dios lik are Ire Dios pkiwi konojel i k'iyal taq dios, xaq are Ire Ajwal pkiwi i k'iyal taq ajwal, Ire lik are i Dios chi o puwi ronojel ni'pa i olik lik nim ucho'ab', xaq lik rajwaxik chi kikoj u'ij, Ire kuya ti uwach ru' jun chik xaq kuk'ayij ti rib' rumal jun sipon. 18Ire lik suk'ul i atb'al tzij ku'an chke i ak'alab' chi nti chik kiqajaw kichuch xaq chke i je malkan, k'ax knanik, kuya uwa xaq kukoj u'u' i ajposar chi je o chixol yix. 19Rumali yix lik k'ax cheina i aj naj chi je o chixol, man chk'un chik'ux chi yix xaq ix keje te'eq pacha ike chi ix aj naj chkixol aj Egipto.
20Chiya u'ij Iwajwal Dios xaq lik xwi Ire chikojo u'ij; lik chikub'a ik'ux che Ire, we kiwaj kisujuj jun b'iroxik, chi'ana pub'i i Ajwal. 21Rumal Ire kixb'ixanik man are Ire i Dios, chi u'anom nimaq taq anik iwumal yix xaq lik iwilom i lo'laj uchomal. 22Iwatit imam are xeupon pa Egipto, ike xa je lajuj oxwinaq (70) konojel, xwiri wo'or Iwajwal Dios xixuk'iyarsaj pacha uk'iyal ch'umil chi je o chwa taq kaj.
Currently Selected:
Deuteronomio 10: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
