Am%F3s 7
7
Ilik pa wachij ke i sak'
1Iri are xuk'ut i Ajwal chwe: Are k'a te ktijin li upo'ik i tikon re ukab' molonik chi pen xtikik, chi k-ani chrij i nab'e molonik re i ajawinel, xwil i Ajwal ktijin chuyijb'axik k'iyal taq sak'. 2I sak' are ketijin ru' i k'isb'al taq es xinb'ij:
—¡Ajwal, chakuyu qamak! ¿Wach nawi uch'ijik ku'an atinimit Jacob, chi lik nim taj?
3Are uri i Ajwal xu'atij i wach te'eq uch'ob'om u'anik, xub'ij:
—¡Ile lik kk'ulmax taj!
Ilik pa wachij re i a'
4Iri are xuk'ut i Ajwal chwe: Xwilo chi xutaq li jun uyej chi lik are jun a' chi xuk'at b'i ronojel, xuchaqijsaj i nim laj mar chi lik cho upam xaq lik ktijin chuk'isik uwach ni'pa taq i es. 5Yin xinb'ij:
—¡Chamayij, Ajwal, kintz'onoj utzil chawe! ¿Wach nawi uch'ijik ku'an atinimit Jacob, chi lik nim taj?
6Are uri i Ajwal xu'atij i wach te'eq uch'ob'om u'anik, xub'ij:
—¡Xaq iri lik kk'ulmax taj!
Ilik pa wachij re i ploma
7I Ajwal xuk'ut chik iri chwe: Ire o te chuk'ulel jun tapial, i rok'am jun ploma pu'ab' re jun ajyakol ja. 8Xaq xutz'onoj chwe:
—¿Wach kawilo, Amós?
—Jun ploma re jun ajyakol ja —xinla' uwach che.
Are uri xub'ij chwe:
—Man ru' i ploma ri re jun ajyakol ja kwilb'ej we lik suk'ul uk'aslemal intinimit Israel. Man lik kinkuy ti chik juyak umak. 9I lo'laj k'ijib'al re i ma Isaac kewulijsax na; xaq keje i k'ijib'al ipa kkikoj wi ki'ij i kitiox aj Israel kewulijsax na. ¡Kinwalij ni ru' ch'ich' chi k'ulala o uware chkij i ralk'uwal i ma Jeroboam!
I ma Amós kutak'b'a rib' chwach i ma Amasías
10Ma Amasías, ajsujul sipon re i Betel, xutaq ub'ixkil che ma Jeroboam, ajawinel re Israel: “Ma Amós kb'in chkixol i winaq aj Israel, kutzukuj tzij chawij yet, Nim laj Winaq. I tinimit ya xrix uk'ux chutayik wach kub'ij, kraj ti chik utayik utzij. 11Man to' ktijin taq chub'ixkil: Ma Jeroboam kkam ni ru' ch'ich' chi k'ulala o uware, xaq ronojel i tinimit Israel kelsax nu b'i pa cho'ab' chwach rulew.”
12Te'uri, ma Amasías xuya i taqaniki che ma Amós:
—¡Chatel b'i waral, profeta! We kawaj kach'ak ak'aslemal rumal ub'ixkil utzij i Dios, jat pa Judá; 13xwiri mab'ij chik mas i tzijonik re i Dios waral pa Betel, man ile are i lo'laj k'ijib'al re i ajawinel xaq are i lo'laj k'ijib'al re i ajawinik.
14Xwiri i ma Amós xula' uwach che: Yin in profeta taj, xaq lik kwaj ti u'anik. Kinch'ak ink'aslemal chkichajixik i chij xaq chumolik higo aj pa taq es, 15xwiri i Ajwal xinresaj chkichajixik i chij, xaq xub'ij chwe: Jat i chatch'aw pinb'i che intinimit Israel. 16Rumali, chata utzij i Ajwal. Iri are i kab'ij yet: Lik match'aw pub'i i Ajwal chkij aj Israel, xaq mab'ij taq tzij chkij umuq uxikin i ma Isaac. 17Xwiri iri are kub'ij i Ajwal: I awixoqil kumin ni rib' ku' achiyab' chkiwach i winaq pa tinimit, i ak'ojol xaq i ami'al kekam ni ru' ch'ich' chi k'ulala o uware; awulew kkijach ni chkiwach ru' sakinik; yet lik katkam ni pkulew i winaq chi kkikoj ti Dios, i winaq aj Israel kechap nu b'ik, kek'am nu b'i naj che i kulew.
Currently Selected:
Am%F3s 7: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
