Am%F3s 5

Kisik'ixik man ketzalij chik ru' i Dios

1Chita intzij, ix aj Israel;

chita i tzij re i k'ax pink'ux chiwij yix:

2I chom xaq i ch'am laj tinimit Israel xtzaqik;

xtzaqik i lik kwalij ti chik.

Xjab'i kan chwach i rulew,

i lik nti jun pachin kyakawik.

3Keje iri kub'ij i Ajwal Dios chke aj Israel:

“We jun tinimit kutaq b'i lajujwinaq kamo' (1,000) achiyab' che i ch'oj,

xa je jo'winaq (100) ketzalij chaloq je k'aslik;

we jun tinimit keutaq b'i jo'winaq (100),

xa je lajuj ketzalij chaloq.”

4Keje iri kub'ij i Ajwal chke aj Israel:

“Chitzukuj itob'al wu' Yin, i kixk'asi na.

5Mix-e pa Betel,

xaq mix-e pa Gilgal xaq mixik'aw pa Beerseba,

man i Gilgal kro'taj ni kan rulew man kelsax b'i chwach pa cho'ab'

xaq i Betel kwulijsax na.”

6Chitzukuj itob'al ru' i Ajwal, i kixk'asi na;

man we ki'an taj, Ire kutaq na li a' puwi i ajawinik re Israel,

i lik mijun kriqtaj pa Betel chi ktiki ni chuchupik.

7¡To' iwach yix, chi ki'an ti atb'al tzij suk'ulik

xaq kik'aq kan i suk'ul laj anik pulew!

8-9I Ajwal, chi x-anaw i ab'ixb'al, xaq i Mutz ch'umil,

are Ire k-anaw che i cha'ab' chi ku'an pa'ij,

i pa'ij ku'an ni cha'ab' che chi lik equm;

are Ire keusik'ij i ya pa mar i kujam puwi ulew;

are Ire kujeq li upaxsaxik ni'pa i ku'an k'ax che taq i ja tak'taq

k'a kupon che i ukowil i ja.

I Ajwal, are ub'i ile.

10¡To' iwach yix, chi ktitat ipam che i jun chi kukowij rib' chuto'ik i jun chi nti umak i k-an k'ax che

xaq kik'aq b'i u'ij i ajsaqinel tzij chi ku'an i suk'ulik!

11Man xaq kiya'ya i nib'a' che aqan

xaq lik nim alkawal kitz'onoj chke rumal ki-trigo,

rumali kixjeqi ti chupam i ja re ab'aj chi kiyakom,

xaq kitu' ti uwa'al uva muqb'am che i uva chi kitikom.

12Yin weta'am ni'pa taq uk'iyal utz taj chi ki'anom

xaq kimak atzalal chi nti uk'isik:

Kki'an k'ax che i utz laj winaq, nab'e kkik'am mer chke i utz ti laj taq winaq

rumali are keupon i nib'a'ib' pa taq atb'al tzij k-an ti atb'al tzij chke, rumali kech'akan taj.

13Rumali i jun chi o unojb'al kch'aw taj,

man che taq i ij le kmajaw taj kch'awik man lik o i k'ax.

14Chitzukuj i utz, mitzukuj i utz taj, keje ile kixk'asi na;

keje ile kel ni qatzij pacha i kib'ij yix:

Chi Ajwal, Dios chi ronojel ktiki che, o iwu' yix.

15¡Tzel chiwila i utz taj! ¡K'ax china i utz!

Chikojo retalil chi pa taq atb'al tzij k-an i atb'al tzij;

moqxa keje ile i Ajwal, Dios chi ronojel ktiki che,

kuya ni k'axnab'al uk'ux chke i kek'asi ni kan pa tinimit Israel.

16Keje iri kub'ij i Ajwal Dios chi ronojel ktiki che:

“Pa ronojel taq k'eb'al o ni o'ej,

ronojel xol taq b'e o ni sik' re i k'axk'ol.

Kekisik'ij ni i winaq chi je ajchak pa taq es che i b'is,

xaq i je aj-o'ej winaq chi lik are kiwach ke'o'ik.

17Pa ronojel taq tikonb'al uva ke'o' na

are kink'un yin chuya'ik utojb'alil chke.”

Are i Ajwal kb'inik.

18¡To' kiwach ike chi kkirayij uk'unik i ij re i Ajwal!

¿Iweta'am yix wach kik'ulmaj che i ij le?

Are ni jun ij re equmal, re ti saq.

19Kuk'ulmaj che i ij le pacha are k-anmaj jun winaq chwach jun koj

i kuk'ulaj chwach jun yum,

xaq keje jun are kok prachoch,

ku'ayb'a rib' chwach xan,

i kraxix rumal jun kumatz.

20Qatzij, i ij re i Ajwal are ni equm, are ti saq;

lik tz'intz'ik equm, lik nti jub'i' saq che.

21Yin tzel kwilo xaq kinxutuj i nima'ij chi ki'an yix;

kumaj ti inwach are kimol iwib' chu'anik xaq lik kiya ik'ux che.

22Kwaj taj chi kisujuj taq uporoxik sipon chwe re kojb'al in-ij,

xaq mitene sipon ch'irajil;

lik kwaj ti ti'ojib' me'

chi kisujuj taq chinwach re chomb'al ib'.

23¡Chiwesaj b'i chinwach ni'pa taq i wojojik re i b'ix!

¡Lik kwaj ti utayik uch'awb'al taq i-arpa!

24Xwiri i atb'al tzij chlemem na pacha i ya,

xaq i suk'ul laj k'uxij pacha jun ralaxb'al ya chi ktzaj taj.

25Ix aj Israel, ¿Xatab'a che i kawinaq (40) junab' pa tz'inilik jyub' chaqij xisujuj i porom sipon xaq i mer re i sipon chwe? 26Wo'or, kiweqaj ni iwajawinel Sicut xaq i uch'umil Quiún, uk'exwach taq tiox chi yix ix anawnaq. 27Kixwesaj nu b'i yix pa cho'ab' chwach iwulew, kixinya mas naj che i Damasco. Are i Ajwal kb'iwik, i Dios chi ronojel ktiki che. Ile lik are ub'i.

Currently Selected:

Am%F3s 5: ACHICUB

Highlight

Compare

Copy