Am%F3s 4
4
1Chita i tziji, ix ixoqib' aj Samaria,
chi pacha taq ix b'akib' re Basán,
ixoqib' chi kkiya puyej i nib'a'ib',
ixoqib' chi kki'an k'ax chke i o rajwaxik chke,
chi lik kekitaq i kachijil ru' i tziji:
¡Chik'ama li uwa'al uva muqb'am re kqatu'u!
2I Ajwal Dios xusaqij pub'i rumal i lo'laj uch'amil:
“Kk'un ni ij chi yix
kixk'am b'i ru' xok ch'ich',
xaq iwak'al keya' ni chutzam xok ch'ich' chapb'al kar.
3Itususem iwib' kixel nu b'i pa taq ch'ut b'e,
i kixk'aq ni chila che i jyub' Hermón.”
I Ajwal xub'ij ile.
Jun pixb'anik ru' yo'yanik
4Jix pa Betel, xaq pa Gilgal;
¡Chixmakunoq, chitz'ab'ij iqelanik!
Chik'ama b'i isipon are ksaqirik
xaq i jun che i lajuj chi kich'ako pa taq urox ij.
5Chiporoj i wa re trigo chi nti kunb'al ru', isipon re tioxb'al,
xaq chitzijoj k'ulala isipon chi kiya ru' ronojel ik'ux,
chi lik are ile qus kiwil yix.
Are i Ajwal xub'ij ile.
I tinimit Israel tupu lik kya' utojb'alil che, knaw taj
6“Yin xin-an chiwe chi kitij i numik
che ronojel i nimaq taq itinimit;
yin xin-ano chi ksach uwach ronojel ni'pa tijawik kraj
che ronojel i tinimit.
¡Xwiri yix xixtzalij ti chik wu'!”
Are i Ajwal xub'ij ile.
7“Xaq xin-an chiwe chi xramtaj i jab'
che oxib' ik' chuxe'el i molonik.
Che jun tinimit xinya li jab', i che jun chik xinya taj;
che jun k'ijib'al pa taq es xu'an i jab', i che jun chik xchaqijik rumal nti jab';
8i winaq je enaq chutzukuxik i ya, kik'aw che jun tinimit ke'e che jun chik,
lik k'i taj kkiriqo re ik'awsab'al kik'atik.
¡Xwiri yix xixtzalij ti chik wu'!”
I Ajwal kub'ij.
9“Xinya ilo'xik ru' jun nim laj tew k'atan xaq ru' itzel taq k'ax,
xin-an chiwe chi xchup uwach i k'iyal taq itikon xaq xinchaqijsaj i tikb'al i-uva,
i sak' xutij b'i i-higo xaq i-olivo.
¡Xwiri yix xixtzalij ti chik wu'!”
Are i Ajwal kub'ij.
10“Xintaq b'i itzel laj taq k'ax piwi pacha xintaq b'i pkiwi aj Egipto;
xin-ano chi ik'ojol kekam pa taq es pa ch'oj
xaq xin-ano chi i ajch'oj chiwij ku'an re chke ikaway;
xin-an chiwe chi kisiq i chu laj taq kamnaq pa wu'waq taq ja,
¡Xwiri yix xixtzalij ti chik wu'!”
Are i Ajwal kub'ij.
11“Xinsach iwach ru' jun nim laj tojpen
pacha xintaq b'i pkiwi i Sodoma xaq i Gomorra;
i winaq kemajaw pacha ktzun a'al chi elsam li pa a',
¡Xwiri yix xixtzalij ti chik wu'!”
Are i Ajwal kub'ij.
12“Rumali, Israel, xaq keje ile kin-an chawe yet;
man lik kin-an na,
¡Chayijb'a awib' re kak'ulaj chwach a-Dios!”
13I Ajwal, chi k-anaw i jyub' xaq i tew,
chi kuya retamaxik che i winaq wach taq uch'ob'om u'anik,
chi ku'an i equm che i saq,
chi kb'in pa nimaq taq ulew naj uwi chwach i ulew,
i Ajwal Dios chi ronojel ktiki che: Lik are ub'i ile.
Currently Selected:
Am%F3s 4: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
