Am%F3s 3
3
I chak chi o chuqul i profeta
1Aj Israel, chita wach kub'ij i Ajwal chiwe chi ix utinimit chi xixresaj li pa Egipto:
2“Xwi yix ix incha'om
chkixol konojel taq i tinimit chwach i jyub' ta'aj.
Rumali lik kintz'onoj ni
ronojel i mak atzalal chi i'anom.”
3We je keb' keb'in junam alaj uri chi junam kiwach;
4we i koj kuraq puqul pa k'achelaj, alaj uri chi xuchap jun uti';
we i ral koj krawin li pa jul, alaj uri chi o tikinaq chuchapik;
5Jun tz'ikin we ktzaq pulew, alaj uri chi kojtal jun chapb'al re;
i chapb'al le we ksak'lin pulew, alaj uri chi o xtiki chuchapik;
6we i trompeta kch'aw pa tinimit, i winaq ke'ok uri chk'achirik;
we o jun utz taj kk'ulmax pa tinimit, alaj uri chi are i Ajwal utaqom loq.
7I Ajwal nti to' xaq ku'ano
we kuya ti retamaxik chke i rajchak chi je profeta.
8¿Pachin kb'arb'at ti rumal uxib'rikil we ksik'in i koj?
¿Pachin kch'aw ti pub'i i Ajwal we are Ire taqannaq?
Usachik uwach i Samaria
9Chiwesaj ub'ixkil yix pa nimaq taq ja ke i ajawinelab' re i Asdod
xaq i pa nimaq taq ja ke i ajawinelab' re i Egipto:
“Chixpet chwi taq jyub' re i Samaria;
chiwila i xaqmanal chi ktijin u'anik chupam i tinimit le
xaq i kamik chi ktijin u'anik chila.”
10I Ajwal kub'ij:
“Ike keta'am ti kki'an i suk'ulik;
xa kkik'ol pa nimaq taq ja ke ajawinelab' ni'pa i kkel-aj pa taq ch'oj.”
11Rumali, keje iri kub'ij i Ajwal Dios:
“Jun ajch'oj kusutij ni rij i nim laj tinimit,
kuwulijsaj ni ronojel i tob'al awib'
xaq kel-an b'i chupam i nimaq taq awachoch.”
12Keje iri kub'ij i Ajwal:
“Keje pacha i ajyu'ul chij chi
kresaj li keb' aqanij o we utzam jun xikinaj puchi' i koj,
keje uri k-on i ki'anmajik i aj Israel
ile chi je jeqel pa Samaria,
ike le chi kki'ayb'a kib' che chomiq taq kotz'ib'al re i Damasco.”
13I Ajwal Dios, chi ronojel ktiki che, kub'ij:
“Chita yix xaq chiya utzijol chrij i tinimit re i ma Jacob,
14che i ij le are kintz'onoj che i tinimit Israel ronojel umak,
kinwulijsaj ni k'ijib'al re sujb'al sipon re i Betel; xaq i ok'a' chi o che i sujb'al sipon kk'upix na xaq ketzaq ni pulew.
15Kinwulijsaj ni ja re i alaj xaq re i sa'ij,
lik kinsachsaj ni kiwach i ja re marfil
xaq keinwulijsaj ni i nimaq taq ja ke ajawinelab'.”
I Ajwal xub'ij ile.
Currently Selected:
Am%F3s 3: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
