Hechos 21

U'enam ma Pablo pa Jerusalén

1Are xeqaya kan i qachalal chwach i Cristo, xoj-an b'i pa barco xoj-e suk'ulik pa tinimit Cos, chukab' ij xoj-e pa Rodas, are uri xojel chik chila xoj-e pa Pátara. 2Chila pa Pátara xqariq jun barco chi k-e pa Fenicia, are uri xojok b'i chupam. 3Are oj o puwi i ya, xqil pan i ulew Chipre chi setel chwi i mar, xkanaj kan pa moxim chqe, keje ile k'a xojupon pa tinimit Siria. Xwiri i barco o eqan kuya kan chila chuchi' i mar pa tinimit Tiro, rumali chi xojok b'i pa tinimit le. 4Chila xeqariq wi i jutzob'aj re i Dios are uri xojkanaj kan wuqub' ij ku'. Ike xkib'ij che ma Pablo chi i Lo'laj Utewal i Dios ub'im chke chi k-e ti pa Jerusalén. 5Xwiri, are xik'aw wuqub' ij, xojel b'i chila. Konojel achiyab' ixoqib' xaq i ak'alab' xojkachi'ilaj b'i k'a tzam ja re i tinimit; are xojupon chuchi' i mar xojxuki che i lapanik ru' i Dios. 6Te'uri xeqa'ijla kanoq, xaq xoj-an b'i pa barco, xaq ike xetzalij chik chi kachoch.

7Xqamaj chub'i qab'e chwi mar, pa Tiro chi xoj-e k'a pa tinimit Tolemaida; chila xeqa'ijla i qachalal chwach i Cristo are uri xojkanaj kan ku' jun ij. 8Chukab' ij, xojel chila xoj-e k'a pa tinimit Cesarea. Are xojupon chila xoj-e chi rachoch ma Felipe chi ajpaxsanel utz laj tzij k'ak' re i Dios, chi are jun chke i wuqub' chi ketow i apostolab', are uri xojkanaj kan chila ru'. 9I ma Felipe je o kajib' umi'al chi nti kachijil, ike le je profeta. 10O tan chi ij qa'olem chila, are uri xupon jun profeta chi ma Agabo ub'i, chi petnaq pa Judea. 11Are xupon chqawach, xuk'am i ximb'al upam ma Pablo, xuyut' che i raqan xaq che i u'ab', te'uri xub'ij:

—I Lo'laj Utewal i Dios kub'ij, chi chila pa Jerusalén keje iri kki'an ni aj Judío che i rajaw i ximb'al pamaji xaq kkijach ni pki'ab' i ne te aj Judío —xcha ma Agabo.

12Are xqata yoj ile junam ku' i jutzob'aj chi kekojon che i Dios aj Cesarea, lik xqatij qa'ij chub'ixkil che ma Pablo chi k-e ti pa Jerusalén. 13Xwiri i ma Pablo xub'ij chqe:

¿B'uchak kixo'ik xaq lik kipetsaj inb'is? Rumal i Ajwal Jesús yin lik kinya wib' chke kinkiyut'u xaq kinya ne wib' chke we kinkikamsaj pa Jerusalén.

14Xwiri yoj xojtiki ti chu'atixik, rumali xqaya b'i che chi k-ek xaq xqab'ij che:

—Chu'ana ni Ajwal, chrij pacha i kraj.

15Chrijil chik ile, xqayijb'a qib' xaq xqamaj b'i qab'e pa Jerusalén. 16Xojkachi'ilaj b'i jujun chke jutzob'aj chi kekojon che i Dios aj Cesarea, ike le xojkik'am b'i chi rachoch jun achi aj Chipre chi ma Mnasón ub'i, ire ya ujer tan ukojom utzij i Dios xaq xuya chqe chi xojkanaj ru' chi rachoch.

Ma Pablo kusolij i ma Santiago

17Are xojupon pa Jerusalén, i qachalal chwach i Cristo lik xojkik'ulaj ku' ru' kikotemal. 18Chukab' ij, i ma Pablo x-e qu' chusolixik ma Santiago xaq chila je o wi i unimaqil ke i jutzob'aj chi kekojon che i Dios. 19I ma Pablo xuya rutzil kiwach, te'uri xok chulapik chke ronojel ni'pa u'anom i Dios rumal ire ku' i ne te aj Judío. 20Are xkita ile, xkikoj u'ij i Dios. Xaq xkib'ij che:

—B'ay, wachalal chwach i Cristo, pacha iwilom chi chkixol aj Judío lik je k'i chi kijachom kib' pu'ab' i Ajwal, xwiri konojel ike is kkib'ij chi lik o uchak kqa'ano chrij pacha u'atb'al tzij i mam Moisés. 21Xaq b'ital chke chi konojel aj Judío chi je jeqel naj, yet ak'utum chke chi kkiqel i u'atb'al tzij i ma Moisés, man xab'ij chke chi nti uchak chi k-an i circuncisión chke i kak'al, xaq mitene kki'an i jalajuj taq anoj chi kqa'an yoj; xecha. 22¿Qatzij uri ile ni'pa i kb'ixik le? Man wo'or i winaq lik kketamaj na chi xatk'unik. 23Are utz cha'ana iri: Je o kajib' achiyab' chqaxol chi ki'anom jun sujun chwach i Dios chi lik o rajwaxik kki'an che taq i iji. 24Cheak'ama b'i awu', i junam chi'ana li ch'am che iwib' xaq chatojo ronojel ni'pa kkisacho man keje ile ike kkesaj kiwi.#21.24 I jutzob'aj aj Nazareo je are i winaq chi kiya'om kib' che u'anik upatan i Dios. Rumali chi kkitij ti uva xaq ronojel ni'pa kel che i uva, xwiri are kk'is u'anik upatan utz ku'ano pacha jub'an chik chi nti kipatan. Chawila che i Números 6.1-21. Man keje uri ile kkil ub'e chi qatzij taj ni'pa i kitom chawij, man ru' ile, kkilo chi xaq yet ka'an ronojel chrij pacha u'atb'al tzij i ma Moisés. 25Xwiri, i qachalal chi ne te aj Judío chi xkikoj utzij i Dios, qataqom chub'i jun wuj ku', chi xqatz'ib'aj b'i chupam ni'pa xqach'ob'o chi are iri kki'ano: Mkitij i ti'ij chi sujtal chkiwach taq tiox, mkitij i kik' xaq mkitij i chikop we xa je jitz'am xaq i jun mumin rib' ru' jun we k'ulinaq ti ru'.

Uchapik i ma Pablo pa rachoch i Dios

26Are uri ma Pablo xeuk'am b'i kajib' achiyab' ru', xaq chukab' ij junam xki'an ch'am che kib'; te'uri xok b'i prachoch i Dios chub'ixkil chke junpa kk'is i ij re u'anik wach taq kisujum chwach i Dios, chi ke'eloq junpa kkisujuj kisipon chkijujunal chwach i Dios.

27Are ya kk'is i wuqub' ij, o jujun chke aj Judío chi je aj pa tinimit Asia, xkil uwach i ma Pablo prachoch i Dios are uri xe'ok chkich'ujersaxik konojel i winaq. I xkichap i ma Pablo 28xaq xesik'in chub'ixkil i tziji: “¡Ix aj Israel, chojito! Are i achi iri, chi xaipa ktijin wi chuk'utik chke i winaq chi xa kupetsaj i ch'oj pqatinimit xaq i uk'utunik lik kch'ojin chrij u'atb'al tzij mam Moisés xaq chrij i chom laj rachoch i Diosi. Xwi ta la ile, xaq je uk'amom li jub'an achiyab' aj Grecia prachoch i Dios chuqajsaxik u'ij i Lo'laj k'ijib'al re i Dios.”

29Keje ile kkib'ij man ujer kilom uwach ru' ma Trófimo chi aj Éfeso, rumali xkich'ob' ike chi ma Pablo uk'amom b'i ru' prachoch i Dios.

30Are uri konojel i winaq re i tinimit xkijeq ch'oqowik xaq lik konojel xkimol la kib'. Are uri xkichap i ma Pablo xaq xkicharej b'i chwaja che i rachoch i Dios, juntir uri xkitz'ap la li uchija. 31Are ya kkikamsaj i ma Pablo, xupon utzijol ru' i aj-ok'al utzam chke i achiyab' chi je yij che i ch'oj, chi konojel i winaq aj Jerusalén lik pacha taq je ch'ujernaq. 32Are uri chi xumol la kichi' i achiyab' chi je yij che i ch'oj xaq i kaj-atzil, juntir xe'e pa'anem k'a chila ipa kimolom wi kib' i winaq. I winaq are xkil i achiyab' chi je yij che i ch'oj xaq i aj-ok'al utzam chke, xkimayij uri uch'ayik ma Pablo. 33Are uri i aj-ok'al utzam chke i achiyab' chi je yij che i ch'oj, xtejeb' pan ru' ma Pablo xuchapo xaq xutaq uximik ru' keb' karena. Te'uri xutz'onoj chke i winaq pachin ire le xaq wach umak u'anom. 34Xwiri, o jujun kkib'ij jun tzij xaq o jub'an chik kkib'ij junwi tan chik tzij, rumali chi i aj-ok'al utzam chke i achiyab' chi je yij che i ch'oj xumaj ti usuk' wach taq uchak xki'an i ch'oqowik le; rumali xub'ij chke chi kkik'am b'i chila pkik'ijib'al i achiyab' chi je yij che i ch'oj. 35Are xeupon che i cholchol re i k'ijib'al ipa ke'uxlan wi i achiyab' chi je yij che i ch'oj, xkeq la b'i ma Pablo chel kij man i winaq lik kkaj ukamsaxik; 36man konojel je teren b'i chkij kesik'in chub'ixkil i tziji: ¡Chkamsaxoq!

Ulapanik i ma Pablo chkiwach i winaq

37Are ya koksax b'i pa k'ijib'al ke i achiyab' chi je yij che i ch'oj i ma Pablo xutz'onoj che i atz laj aj-ok'al utzam:

—¿Kaya chwe kinlapan jub'i' awu'?

I atz laj aj-ok'al utzam le xub'ij che:

—¿Kariq b'awa ch'awik pa ch'ab'al griego? 38¿Yet ti b'ari at aj Egipto chi jela kanoq xajeq jun ch'oj, xaq xeak'am b'i lajujmo' (4,000) achiyab' chi ajkamsanelab' pa tz'inilik jyub' chaqij?

39I ma Pablo xub'ij che:

—Yin taj. Yin in aj Judío, in alaxel pa tinimit Tarso chi are jun tinimit lik nim u'ij re i nim laj tinimit Cilicia; xwiri kintz'onoj utzil chawe chi chaya chwe kinlapan ku' i winaq.

40I aj-ok'al utzam chke i achiyab' chi je yij che i ch'oj, xuya che chi klapan ku' i winaq, are uri ma Pablo xtak'i an che i cholchol xaq ru' u'ab' xuk'ut chke i winaq chi mech'aw chik. Are xkimayij i ch'oqowik, xeu'ijla pkich'ab'al aj Judío#21.40 I kich'ab'al i aj Judío, hebreo ub'i. chi are i hebreo, xub'ij:

Currently Selected:

Hechos 21: ACHICUB

Highlight

Copy