Hechos 22

1Ix, wachalal chwach i Cristo xaq ix qajawxelab', chita iri chi kinb'ij chiwe tob'al wib'.

2Are xkita chi ma Pablo xch'aw pa ch'ab'al Hebreo xech'aw ti chik, rumali lik xkikoj retalil che utzij. I ma Pablo xujeq chik ub'ixkil:

3Yin in aj Judío. Xinalax pa tinimit Tarso, chi ukwenta i ulew Cilicia; xwiri xink'iy chi pa Jerusalén xaq chi xintijoj wi wib' ru' i nim laj tijonel mam Gamaliel, chrij pacha kub'ij i atb'al tzij ke i qatit qamam. Lik arewi kwaj u'anik inpatan chrij i Dios ru' ronojel ink'ux, keje pacha kixtijin yix chu'anik wo'or. 4Yin ujer lik xin-an ch'oj chkij i winaq chi kekojon che utzij i Dios; xintzukuj kikamsaxik, xeinchapo xaq xeinmin prexil, che achiyab' xaq che ixoqib'. 5I kaj-atzil i rajpatan i Dios xaq i je uwi ujolom i tinimit keta'am chi ni'pa i kinb'iji lik qatzij. Xkiya b'i wuj chwe, k'utb'al re chke i qachalal chwach i Cristo chi aj Judío pa tinimit Damasco xaq xin-e chila chkichapik i winaq chi kekojon che i Dios, man keink'am li pa Jerusalén chu'anik k'ax chke rumal ni'pa i kki'ano.

6Xwiri are kintijin che i b'e, lik naqaj chik che i Damasco, kolo tik'il ij, xaqte'et jun utzunb'al a' aj chikaj xrep kan chwij chinwach, 7are uri xintzaq pulew. Xaq xinta jun ch'awb'al chikaj chi xub'ij: “¡Ma Saulo! ¡Ma Saulo! ¿B'uchak kattijin chu'anik ch'oj chwij?” 8Are uri xintz'onoj che: “¿At pachin yet, Nim laj Winaq?” Are uri xub'ij chwe: “Yin in Jesús aj Nazaret xaq yin ile chi kattijin chu'anik ch'oj chwij.” Xcha. 9Ni'pa je enaq wu' xkil i a' le chi xrepkanik, xwiri xkita ti uch'awb'al i jun chi xlapan wu'. 10Yin xintz'onoj chik che: ¿Wach rajwaxik kin-ano Ajwal? I Ajwal xub'ij chwe: Chatwalijoq xaq chamaja chub'i ab'e pa Damasco. Chila kb'ix wi chawe ronojel wach rajwaxik ka'ano; xcha. 11Xwiri i urep a' le xu'an kan potz' chwe, rumali chi i wachi'il xkichap b'i che in-ab' k'a pa Damasco.

12Chila jeqel wi jun achi chi ma Ananías ub'i, ire le lik uya'om uk'ux chu'anik ronojel u'atb'al tzij i mam Moisés; konojel aj Judío chi je jeqel chila pa Damasco kkib'ij utz laj taq tzij chrij ire. 13I ma Ananías le xupon chinsolixik, are xuponik xub'ij chwe: Wachalal ma Saulo, ¡Chattzun chik! Xcha. Are xb'itaj ile lik juntir xintzunik, are uri xwil uwach. 14Te'uri xub'ij chik chwe: I ki-Dios qaqajaw qachuch, xatu'ul yet chretamaxik wach kraj ire xaq chrilik uwach i Jun chi lik suk'ulik xaq chutayik utzij upixab'. 15Xwiri are ni yet kalap Ire, chkiwach i winaq chwach ronojel uwach i jyub' ta'aj xaq kalap ni chke ni'pa awilom xaq atom. 16Wo'or lik mab'ay chik mas awib'. Chatwalijoq xaq chatz'onoj uqajsaxik ya pawi pub'i i Ajwal Jesús, man keje ile kkuytaj ni amak. Keje ile xub'ij ma Ananías chwe.

I ma Pablo Kulapo wach u'enam ku' i ne te aj Judío

17Are xintzalij li pa Jerusalén, xin-e prachoch i Dios che i lapanik ru', are uri xwil jun ilanik pinwach. 18Xwil i Ajwal chi xub'ij chwe: Chab'isoj awelik pa Jerusalén, man mijun chke aj Judío kukoj retalil intzij chi kab'ij chke. Xcha i Ajwal. 19Are uri i yin xinb'ij che: Ajwal, ike keta'am chi yin xinupon pa taq ja re molb'al ib' ke i judío chkik'amik b'i prexil ni'pa i winaq chi kekojon chawe xaq xin-an k'ax chke, 20xaq are xkamsax i awajchak ma Esteban chi kub'ij atzij chke i winaq, yin lik xinya inwach ku' re ukamsaxik man chila in o wi xaq xinchajij ne ki'u' i xekamsawik. Xincha che i Ajwal. 21Xwiri i Ajwal xub'ij chwe: Chamaja b'i ab'e, man yin katintaq b'i pa nimaq taq tinimit k'a naj. Keje ile xub'ij i Ajwal chwe; xcha i ma Pablo chke i winaq.

I ma Pablo o pu'ab' i aj-ok'al utzam ke i achiyab' chi je yij che i ch'oj

22I winaq xwi i tzij le xkita che ma Pablo; te'uri xesik'in chub'ixkil iri: ¡I achi le kumaj taj kk'asi'ik! ¡Chichupu uwach waral chwach i jyub' ta'aj! 23I winaq xkimayij ti sik'inik, xkipuk'ij ki'u' xaq xkipuk'ij uk'aj ulew chikaj, 24rumali i aj-ok'al utzam chke i achiyab' chi je yij che i ch'oj xutaq uya'ik ma Pablo pa k'ijib'al ipa ke'uxlan wi i achiyab' je yij che i ch'oj xaq xub'ij chke chi kkiya ulo'xik man keje ile kub'ij wach uchak kesik'in i winaq chrij. 25Xwiri are ximtal chik man kkiya ulo'xik, i ma Pablo xub'ij che i kaj-atzil i achiyab' chi je yij che i ch'oj aj Roma:

—¿O b'ari pi'ab' yix uch'ayik jun winaq aj Roma we k'amaja ki'an atb'al tzij che?

26I kaj-atzil i achiyab' chi je yij che i ch'oj are xuta ile, xub'ij che i atz laj aj-ok'al utzam chke i achiyab' chi je yij che i ch'oj:

—¿Wach nawi ka'ano? Man achi le xaq aj Roma.

27Are uri i aj-ok'al utzam ke achiyab' chi je yij che i ch'oj, xutz'onoj che ma Pablo:

—¿Qatzij uri chi yet xaq at aj Roma? I ma Pablo xub'ij: Qatzij.

28I aj-ok'al utzam ke achiyab' chi je yij che i ch'oj xub'ij che:

—Yin lik nim i pwaq xinsacho elsab'al re inwuj are xinu'on jun winaq aj Roma.

I ma Pablo xub'ij che:

—Xwiri yin lik in aj Roma chwalaxik.

29Ike chi kkaj te uch'ayik ma Pablo, are xkita ile xe'el ru'; xaq i aj-ok'al utzam ke achiyab' je yij che i ch'oj, are xretamaj chi ma Pablo xaq aj Roma, lik xuxij rib' man ire xuxim ma Pablo ru' karena.

Ma Pablo o chkiwach i tzob'aj chi je aj-atol tzij aj Judío

30Chukab' ij, i aj-ok'al utzam ke achiyab' chi je yij che i ch'oj, lik kraj retamaxik wach uchak kech'oqow aj Judío chrij ma Pablo, rumali xresaj i karena che u'ab' ma Pablo, xutaq kik'amik i kaj-atzil i rajpatan i Dios xaq konojel i jutz'ob'aj unimaqil chi kki'at tzij pkitinimit aj Judío. Te'uri xresaj li ma Pablo i xutak'b'a chkiwach.

Currently Selected:

Hechos 22: ACHICUB

Highlight

Copy