Hechos 20

U'enam ma Pablo pa Macedonia xaq pa Grecia

1Are xuxlan i ch'oqowik, i ma Pablo xeusik'ij i winaq chi kekojon che i Dios man xeupixb'aj kanoq. Te'uri xeu'ijla kanoq xaq x-e pa Macedonia. 2Xeusolij i jalajuj taq k'ijib'al re i tinimit le chuya'ik kan ukowil kik'ux i qachalal chwach i Cristo, te'uri xupon pa Grecia, 3oxib' ik' xkanaj chila. Te'uri xuyijb'a rib' enam re pa ulew Siria. Are ya k-an pa barco, xretamaj chi aj Judío kiyijb'am chkiwach wach uchapik kki'an che. Rumali xuch'ob'o chi k-e ti pa barco, xtzalij chub'i chaqan xik'aw chik pa Macedonia. 4X-achnimax b'i kumal ma Sópater aj Berea chi uk'ojol ma Pirro; ma Aristarco, ma Segundo chi aj Tesalónica, ma Gayo aj Derbe, ma Timoteo, ma Tíquico xaq i ma Trófimo chi je aj pa taq tinimit Asia. 5I qachalal chwach i Cristo le, xenab'ej b'ik, xojkoy-ej k'a pa tinimit Troas. 6Chrijil chik rik'awik i nima'ij chi ktijaw i wa re trigo chi nti kunb'al ru', yoj xojel pa Filipos xoj-an b'i pa barco. Che i jo'ob' ij, xeqamaja i winaq chi je kojonnaq che i Dios chila Troas, xojkanaj wuqub' ij chila.

I ma Pablo k-e pa Troas

7Che i nab'e ij re i seman, xqamol qib' chujachik i wa re trigo chqawach, i ma Pablo xok che i lapanik ku' i winaq chi kekojon che i Dios, lik xnajtin che i lapanik ku', man chukab' ij o tan chik k-e wi, rumali k'a tik'il a'ab' xutzin che i lapanik. 8Yoj qamolom qib' chupam jun tasaj chi lik are mas naj uwi re i ja, chila k'i kantil tzijtalik; 9xaq o jun ala chi a Eutico ub'i, kul pa wantana. Ire xok li uwaram man i ma Pablo xnajtin che i lapanik, are uri i ala le xtzaq b'i k'a pulew relik che i urox le, are xkiyako lik kamnaq chik. 10Te'uri ma Pablo xqaj loq, xjupi puwi xaq xutz'ulej. Are uri xub'ij chke i qachalal chwach i Cristo:

—Mixij iwib'; ire k'aslik.

11I ma Pablo xel chub'ik, xujach i wa re trigo xaq xutij re ire, te'uri xok chik che i lapanik ku', k'a xsaqirik, te'uri x-ek. 12I ala chi xtzaq pa wantana, lik k'aslik xkik'am b'ik, ru' ile lik xu'an chke chi xkikowij kik'ux.

Relik ma Pablo pa Troas, x-e pa tinimit Mileto

13Xwiri yoj xojnab'ej b'ik, xoj-e pa barco k'a pa tinimit Asón man chila kqariq wi qib' ru' ma Pablo kqak'am b'ik, keje ile xqayijb'a chqawach, man ire xraj enam chaqan. 14Are xqariqa qib' ru' chila pa tinimit Asón, ire x-an b'i qu' pa barco, te'uri xoj-e pa tinimit Mitilene. 15Are xojel chila, chukab' ij xojik'aw chwach i ulew Quío chi o ya chrij chwach, churox ij xojupon pa Samos chi o ya chkij chwach, che chik jun ij xojupon pa ulew Mileto chi o ya chrij chwach. 16Keje ile xqa'ano man i ma Pablo xraj ti xub'ay rib' pa Asia, rumali xraj ti enam pa Éfeso; man kraj we' kupon pa Jerusalén man kraj krila i nima'ij Pentecostés.

Utzij ma Pablo chke uwi kijolom i qachalal pa Éfeso

17I ma Pablo are o pa Mileto, xutaq kisik'ixik i kiwi kijolom i jutzob'aj re i Dios pa tinimit Éfeso. 18Are xeuponik, xub'ij chke: Yix iweta'am chi in-anom i utz are xink'un nab'e mul waral pa tinimit Asia. 19Ronojel ij chi ink'ijinaq iwu' lik xinya wib' chu'anik uchak i Ajwal chixol yix xaq xin-an ti nim che wib', lik xintij k'iyal taq k'ax kumal aj Judío are xkaj inchapik. 20Xwiri, xinmayij ti utzijoxik i tzij chiwe chi lik rajwaxik che ik'aslemal, xink'ut chiwe chi taq iwachoch xaq chkiwach i winaq. 21Xinb'ij chke aj Judío xaq chke i ne te aj Judío chi chkijalwachij kik'aslemal chwach i Dios xaq chkikub'a kik'ux che i Qajwal Jesús. 22Wo'or, kin-e pa Jerusalén, man lik kinutaq b'i Lo'laj Utewal i Dios, tupu weta'am taj wach taq kink'ulmaj chila. 23Xwiri xwi weta'am chi xaipa kin-e wi pa taq tinimit, i Lo'laj Utewal i Dios kub'ij chwe chi kintij ni uyej xaq kin-e ni prexil. 24Xwiri kink'achir ti che ink'aslemal, man kwaj yin kin-an inchak ru' kikotemal, k'a kintiki ni che xaq kin-an ni ronojel ni'pa uya'om i Ajwal Jesús chinqul chi are upaxsaxik i utz laj tzij k'ak' re i k'axnab'al uk'ux i Dios.

25Wo'or lik saq laj tzij kinb'ij chi mijun chiwe yix chi ink'utum usuk' i ajawinik re i Dios che, kril chik inwach. 26Rumali, wo'or kwaj kinb'ij chiwe chi inmak ti chik yin, we o jun xukoj ti retalil che ronojel ni'pa i xinb'ij, 27man yin inb'im chik ronojel wach uch'ob'om i Dios xaq lik nti wuwam uwach chiwe. 28Rumali lik chixk'ask'atoq xaq chichajij i tzob'ajil re i Dios, man i Lo'laj Utewal i Dios xuya kan chiqul keichajij, pacha ix ajyu'unel, man lik keje ile kichajij i jutzob'aj re i Dios chi xulo' Ire ru' ukik'el Uk'ojol. 29Yin weta'am chi are kin-ek, je o tan chik kek'unik chi pacha taq je utiw chi kkaj ni uchupik uwach i jutzob'aj re i Dios. 30Xaq o ne kewalij chixol yix chi ke'ok che i t'oronik, man kkaj ike chi i kekojon che i Dios keterej ni chkij ike. 31Chichajij iwib'; xaq chk'un chik'ux chi oxib' junab' lik chipa'ij chicha'ab' xixinpixb'aj chijujunal, tupu olik lik xintij o'ej iwu'.

32Wo'or, wachalal chwach i Cristo, kixinya kan pu'ab' i Dios xaq pu'ab' utzij, chi are i k'axnab'al uk'ux. Ire o ucho'ab' chunimarsaxik ukub'ib'al ik'ux xaq chuya'ik ronojel ni'pa i usujum chke i uwinaq chi je ch'am. 33Yin inrayim ti uwach upwaq jun winaq, xaq mitene u'u' jun chik, 34are i xin-ano, are pacha iweta'am yix, chi yin xinchakun ru' in-ab' ch'akb'al re ni'pa i rajwaxik chwe xaq chke ni'pa je o wu'. 35Lik arewi xink'ut chiwe chi o uchak kojchakunik, keje ile chi'ana yix, chixchakunoq tob'al ke ni'pa i o rajwaxik chke, chk'un chqak'ux utzij i Ajwal Jesús are xub'ij: “Mas utz we kaya'o chwach we kak'amo.” Xcha.

36Are xb'itaj ile, i ma Pablo xxuki'ik xaq xlapan ru' i Dios junam ku' ike. 37Konojel xe'o'ik, xkitz'ulej i ma Pablo xaq xkitz'ub'aj. 38Lik keb'isonik, man ire xub'ij chke chi kkil ti chik uwach. Te'uri xkachi'ilaj b'ik, k'a chila ipa o wi i barco.

Currently Selected:

Hechos 20: ACHICUB

Highlight

Copy