2 Tesalonicenses 3
3
Lapanik ru' i Dios pqawi yoj
1Pa k'isb'al re, wachalal chwach i Cristo, chixlapan ru' i Dios pqawi yoj, man keje ile kpax ni uwach utz laj tzij re i Ajwal; xaq kqaj yoj lik utz ukojik kki'ano, keje pacha xi'an yix. 2Xaq chixlapan ru' i Dios man kojuto ni chkiwach i utz ti laj taq winaq chi lik kkaj ti i utz. Man lik konojel taj o ukub'ib'al kik'ux che i Ajwal. 3Xwiri i Ajwal lik ku'ano pacha ub'im, rumali xaq ku'an chiwe yix chi o ukub'ib'al ik'ux, xaq kixuto ni chwach i utz taj. 4I yoj kul qak'ux che i Ajwal chi yix kixtijin chu'ankil pacha i qab'im chiwe, xaq kimayij ti u'ankil. 5Lik are ni Ajwal chixuto chunimarsaxik i k'axnab'al ik'ux chke i jub'an chik, keje pacha i Dios lik k'ax keuna konojel, xaq chixuto chuch'ijik wach taq i kpe piwi, pacha xu'an i Cristo.
O uchak kojchakunik ch'akb'al re i qawa
6Qachalal chwach i Cristo, pub'i i Qajwal Jesucristo kqab'ij i tziji chiwe: Chijek'a iwib' ku' i qachalal chwach i Cristo chi kechakun taj, xaq kki'an taj pacha i k'utunik chi qab'im kan chiwe. 7Yix lik iweta'am chik wach i rajwaxik ki'an na re kixterej chrij wach i xqa'an yoj; lik xojchakunik, to' ti xqak'ayo are oj o iwu'. 8Lik xqatoj ronojel wach i xqatijo. Are i xqa'ano, lik xojchakun chipa'ij chicha'ab' man xqaj ti xqaya jun eqan chiqul yix. 9Tupu kmajawik chi kqatz'onoj te'eq qawa chiwe, xwiri xqatz'onoj taj. Are i xqa'ano, lik xojchakunik, k'utb'al re chiwe wach i utz ki'an ni yix, pacha i kqa'an yoj. 10Man are oj o wi iwu', xqab'ij i tziji chiwe: Pachin jun kraj ti kchakunik, xaq lik nti wa uri kutijo. 11Xwiri, wo'or qatom utzijol chi o jujun chixol yix chi to' je k'aslik, kkaj ti kechakunik; to' kkimin kib' che b'iroxik chi nti ke che. 12Keqapixb'aj pub'i i Qajwal Jesucristo, chi chechakunoq, man keje ile lik kkich'ak ni kiwa chkijujunal.
13Xwiri yix, wachalal chwach i Cristo, mb'a'krij ik'ux xaq mixkos chu'anik i utz. 14We o jun kkojon ti che wach i qatz'ib'am b'i chwach i wuji, chikojo retalil pachinoq; i chijek'a iwib' ru' keje ile kk'ix che. 15Xwiri, mi'an ajch'oj che iwib' ru' ire; are chi'ana chipixb'aj pacha jun qachalal chwach i Cristo.
I k'isb'al taq utzij i ma Pablo chke aj Tesalónica
16Kintz'onoj che i Ajwal chi chuya ni uxlanb'al k'uxij chiwe k-e ij saq chiwij chupam ronojel i kik'ulmaj. Man are ire uxeb'al i uxlanb'al k'uxij. Xaq lik chk'iji ni iwu' iwonojel.
17Yin chi in ma Pablo, ru' in-ab' xaq ru' intz'ib', kintz'ib'aj i tziji chiwe yab'al pan rutzil iwach. Keje kinb'ij ile chupam inwuj chi kintaq b'ik; keje utz'ib'axik ile kin-ano. 18I Qajwal Jesucristo chuya ni utz piwi yix iwonojel. (Keje ile kwaj) Amén.
Currently Selected:
2 Tesalonicenses 3: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
