2 Pedro 3
3
Uk'unik tan chik i Qajwal Jesucristo
1Ix, wachalal chwach i Cristo chi kixwaj, i wuji are ukab' kintz'ib'aj chiwe. Chupam i keb' wuj le in-anom pen ipixb'axik, man kixinto chusuk'b'axik inojb'al. 2Chik'unsaj chik'ux ni'pa i kib'im kan i je lo'laj profeta, xaq ni'pa i tzij pixab' chi ub'im kan i Ajwal chi Tol qe, chi i apostolab' xkik'ut kan chiwe yix.
3Nab'e o uchak chiwetamaj iri: Are ya kk'un i k'isb'al ij, kek'un ni ajyo'yanel re wach taq ikojom yix, xaq to' kki'an kirayijb'al ike chi utz taj. 4Kkitz'onoj ni chiwe: “¿Wach xuk'ulmaj i sujunik chi kib'ij chi kk'un tan chik i Jesucristo?”. “Man ya ne xekam i qaqajaw qachuch i lik k'a uwach wi u'anom k'a chuxeb'al loq. Xaq k'a are o wi wo'or”; kecha na. 5I winaq le, kkaj ti kkikoj retalil wach u'anom i Dios ujer; chuxeb'al, ire ru' uch'awb'al xuyijb'a i kaj xaq i jyub' ta'aj. Man i jyub' ta'aj xel che i ya, xaq uk'am rumal i ya.#3.5 Cf. Génesis 1.6-9; Salmos 24.2. 6Xaq x-on panoq, i Dios xusach uwach i jyub' ta'aj ru' jun nim laj ya.#3.6 Génesis 7.11-22; 2 Pedro 2.5. 7Xwiri i kaj xaq i jyub' ta'aj chi wo'or olik, je uk'am rumal utzij i Dios; ksachsax ti kiwach k'a kuriq ni ij are ku'at tzij i Dios. Are kk'un i ij le, ksachsax ni kiwach rumal i a', xaq ksachsax ni kiwach i winaq chi kikojom ti u'ij i Dios.#3.7 Cf. Isaías 66.15-16; Sofonías 1.18; 3.8; Apocalipsis 18.8.
8Wachalal chwach i Cristo chi kixwaj, chk'un chik'ux iri: I Ajwal, jun ij chwach ire, keje pacha jun lajujwinaq kamo' (1,000) junab'; xaq i lajujwinaq kamo' (1,000) chwach ire, keje pacha jun ij.#3.8 Salmos 90.4. 9O i kkich'ob'o chi i Ajwal lik b'aytajnaq chu'ankil wach ub'im ujer; xwiri ire lik b'aytajnaq taj. K'amaja kusach uwach i jyub' ta'aj, xa rumal unimal uk'ux chqe, man kraj ire chi mijun ksachsax ni uwach. Kraj ire chi konojel i winaq kkijach ni kib' pu'ab' ire tz'aqat k'a o i ij.
10Are kuriq i ij re i Ajwal, xaqte'et kk'unik, pacha uk'unb'al jun ili'om cha'ab'. Xwiri, che i ij le, i kaj ksach uwach ru' jun nim laj ch'awb'al chi lik xib'in ib'. I ij, i ik', i ch'umil kek'atik xaq kesachik; xaq i jyub' ta'aj kk'atik ru' ronojel ni'pa i o chwach.#3.10 Is 34.4; Apocalipsis 6.13-14.
11Yix ya iweta'am chik chi ronojel ile ksachik, lik o uchak uri ch'am chix-oloq, chom ik'aslemal; lik chiya ik'ux che i Dios. 12Keje ile chi'ana, tz'aqat kiwoy-ej uk'unik u'ij i Dios. Chitija i ij chu'ankil chi we' kk'unik. Qatzij, chupam i ij le i kaj kk'atik xaq ksachik. I ij, i ik', i ch'umil xaq kumaj a', lik kejarik. 13Te'uri yoj kqoy-ej ni kaj k'ak', xaq i jyub' ta'aj k'ak' chi ub'im i Dios chqe. Chupam i kaj k'ak' xaq chupam i jyub' ta'aj le, ronojel lik utz xaq lik suk'ulik.#3.13 Isaías 65.17; 66.22; Apocalipsis 21.1,27.
14Rumali, wachalal chwach i Cristo chi lik kixwaj, tz'aqat iwoy-em i nim laj ij le, chichomaj iwib' ru' i Dios xaq i chiwach yix; chib'isoj u'ankil ix ch'am pik'ux, man nti mak atzalal chiwij are kk'un i Ajwal. 15Chiwetamaj chi xa rumal unimal uk'ux i Qajwal oj roy-em, man kraj ire konojel i winaq ketotajik. Xaq i qachalal chwach i Cristo, chi ma Pablo, chi lik kqaj, keje ile utz'ib'am chiwe. Ni'pa i xutz'ib'aj chiwe, i nojb'al le lik ru' i Dios petnaq wi.#3.15 Cf. Romanos 2.4; 3.25-26; 9.22; 1 Tesalonisenses 4.13—5.11; 2 Tesalonisenses 1.7-10; 2.1-12. 16Laj ronojel uwuj ire, lik keje ile kub'ij. Qatzij, o jujun utzij, k'ax umajik usuk'. O i winaq chi qas ti kkita ub'e utzij i Dios xaq jikil ti kik'ux che; ike kkiyoj uri utzij i ma Pablo, keje pacha kkiyoj jub'an chik tzij chi tz'ib'tal chupam uwuj i Dios. Keje ile xa kitukel ike kkipetsaj i sachb'al kiwach.
K'isb'al taq tzij
17Rumali, wachalal chwach i Cristo chi kixwaj, iweta'am chik wach kpetik; rumali chichajij iwib' chke i utz ti laj taq ajt'oronel, moqxa kixkit'oro i kikanaj kan ikojonik che i saq laj tzij. 18Chi'ana pen kiwetamaj mas unojb'al i Qajwal Jesucristo chi Tol qe; chiya che ire ku'an ni uchak pik'ux. Choksax u'ij, xwi ti wo'or, xaq ronojel ij saq. Lik keje ile ch-antaj na.
Currently Selected:
2 Pedro 3: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
