1 Tesalonicenses 3
3
Utaqik b'i a Timoteo
1Are oj o pa tinimit Atenas, lik xqach'ij ti chik urayixik rilik iwach, are uri xqach'ob'o chi lik rajwaxik kojkanaj kan qatukel pa tinimit le, 2i xqataq b'i i qachalal chwach i Cristo a Timoteo iwu'. Ire le lik jun rajchak i Dios chi chakunnaq qu' yoj chub'ixkil i utz laj tzij k'ak' re i Cristo. Xqataq b'i iwu' man kuya ukub'ib'al ik'ux che i Cristo, xaq kuya ni ukowil ik'ux. 3Keje xqa'an ile, man keje ile mijun chiwe kusach ukub'ib'al uk'ux chwach taq i k'ax chi kixtijin che ik'awik chupam. Lik iweta'am yix chi rajwaxik kqatij i jalajuj taq k'ax pacha ile. 4Are k'a oj o te'eq iwu' yix xqab'ij chiwe chi kpe ni k'ax pqawi, xaq ya iwilom chik chi keje ile xe'eloq. 5Are uri, yin xinch'ij ti chik retamaxik wach i'anom yix, rumali xintaq b'i a Timoteo iwu' chretamaxik wach u'anom ukub'ib'al ik'ux. Man xinch'ob' yin moqxa xixumin i Itzel chupam i utz taj, xaq i qachak chixol moqxa usachsam chik uwach.
6Xwiri wo'or, i a Timoteo ya xixusolij, xaq xuk'am li utzijol chi yix utz u'anom ukub'ib'al ik'ux, xaq isachom ti uk'axnab'al ik'ux. Xaq xub'ij ire chi yix lik kojsach ti pik'ux, lik k'ax kojina'o. Xaq xub'ij chi kiwaj chik rilik qawach, pacha kqa'an yoj, kqaj chik rilik iwach yix. 7Rumali, qachalal chwach i Cristo, chupam ronojel i k'ax, chupam ronojel uyej chi kqatijo, lik yatal i ukub'ib'al qak'ux man qeta'am chi yix lik jikil ik'ux che i Ajwal. 8Are xqata utzijol chi lik jikil ik'ux che i Ajwal, lik xojkikot ni iwumal pacha jun k'ak' laj k'aslemal xqana'o. 9Kqariq ti chik wach utioxixik kqa'an chwach i Dios rumal i nim laj kikotemal chi kqana iwumal yix. 10Chipa'ij chicha'ab' kojtijin chutz'onoxik che i Dios chi kuya ni chqe kix-eqila; kqaj kqatz'aqatsaj wach i k'a kraj che ukub'ib'al ik'ux che i Ajwal.
Lapanik ru' i Dios
11Lik kqaj yoj chi i Qaqajaw Dios xaq i Qajwal Jesucristo kojkito man keje ile kix-eqasolij na. 12Kqaj chi i Ajwal ku'an chiwe chi kk'iyar mas i k'axnab'al ik'ux chiwach, xaq k'ax cheina konojel i winaq. Kqaj chi lik nim i k'axnab'al ik'ux yix pacha uk'axnab'al qak'ux yoj chiwe yix. 13Kqaj yoj chi i Ajwal ku'an chiwe lik kul ik'ux, lik ix ch'am, lik nti jun utz taj chiwe chwach i Qaqajaw Dios are ktzalij chali Qajwal Jesús ku' konojel ni'pa i je re Ire. Amén.
Currently Selected:
1 Tesalonicenses 3: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
