1 Pedro 5
5
Pixb'anik chke i ajk'amol utzam i jutaq tzob'aj re i Cristo
1Wo'or kwaj kinb'ij jun tzij chiwe yix ix ajk'amol utzam re i jutaq tzob'aj re i Dios. Xaq keje yin in ajk'amol utzam pacha yix, xwiri yin in saqinel tzij chrij i uyej chi xutij i Cristo waral chwach i jyub' ta'aj, xaq i yin o ni we che are k-aljinsax ni nim laj u'ij uchomal i Cristo k-on panoq. 2Lik kinb'ij chiwe: Cheichajij i jutzob'aj re i Dios chi je o pi'ab'; cheichajij pacha jun ajyu'ul chij keuchajij uchij. Chi'ana ru' ronojel ik'ux; man are kraj i Dios, mi'an to' pacha ch'akb'al ipwaq. Chi'ana ru' rutzil ik'ux man lik kiwaj kito'ik. 3Mi'ano chi to' keirajawij i je o pi'ab'. Chib'isoj u'ankil i utz chkiwach k'utb'al re chke wach i kmajawik kki'ano. 4We keje ile ki'ano are kk'un tan chik i atz laj ajyu'ul chij chi nim u'ij, are uri yix kik'am ni jun koron chi lik o u'ij xaq ksach ti uwach.
Chke konojel i winaq
5Xaq keje yix chi ix alab'om, chixkojon che kitzij i nimaq taq winaq. Iwonojel yix chikojo iwib' chiwach; mi'an nim che iwib', man i wuj re i Dios keje iri kub'ij:
“I Dios keu'atij i kki'an nim che kib',
xwiri ni'pa i kki'an ti nim che kib', i Dios keuto rumal i rutzil uk'ux chke.”#5.5 Proverbios 3.34 (gr.).
6Chiya uri che i Dios kuqajsaj ni i'ij; mi'an nim che iwib', man k-on panoq i Dios kunimarsaj ni i'ij. 7Wach taq i kixk'achir rumal, is chiya pu'ab' i Dios, man Ire utz ichajixik ku'ano.
8Chixk'ask'atoq, chichajij iwib', man i Itzel chi ajch'oj chiwij, ktijin chitzukuxik. Ire kmalkatik pacha jun koj, ko'ik kutzukuj pachin kutijo. 9Chich'ija; chijikb'a ukub'ib'al ik'ux che i Jesucristo. Are kpe i k'ax piwi, chk'un chik'ux chi i k'ax le lik kkitij konojel iwachalal chwach i Cristo chi je o chwach i jyub' ta'aj. 10Waral chwach i jyub' ta'aj, xa attal ij kitij ni k'ax; we xixel pa k'ax le, i Dios lik kixuto; ku'an utz chiwe, kujikb'a ik'ux, lik kuya ni icho'ab', xaq lik ko kixutak'b'a ni chupam ikojonik. Ire, lik nim i rutzil uk'ux chqe, oj usik'im ru' man kqatij i utz ru' chila chikaj, junam ru' i Jesucristo. 11Kqaj yoj o ni u'ij, o ni ucho'ab' ronojel ij saq. Lik keje ile ch-antaj na.
K'isb'al taq tzij xaq rutzil wachij
12I wuji chi xa jub'i' xintz'ib'aj b'i chwach, xinuto i ma Silvano chutz'ib'axik; yin wilom chi ire lik utz laj qachalal chwach i Cristo. Kintaq b'i chiwe, yab'al ukowil ik'ux man utz kiwetamaj iri: Ni'pa utzil chomal petnaq piwi, ku'aljinsaj chi i Dios lik k'ax kixuna'o. Chijikb'a ik'ux che ile.
13I jutzob'aj re i Dios chi je o pa Babilonia kkiya pan rutzil iwach. I Dios xaq je ucha'om ike pacha u'anom chiwe yix. Xaq i ma Marcos chi lik pacha wak'al, xaq kuya pan rutzil iwach. 14Chiya rutzil iwach ru' jun tz'ub'anik re k'axnab'al k'uxij.#5.14 Keje xki'an ile i je re i Dios, k'utb'al re chi o ki'ij chkiwach, xaq o i k'axnab'al kik'ux.
I Dios chuya ni i chomb'al ib' chiwe iwonojel yix chi ix re i Jesucristo. Keje ile kwaj (Amén).
Currently Selected:
1 Pedro 5: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
