2 Pedro 1
1
Rutzil wachij
1Yin in ma Simón Pedro, in rajchak xaq in apóstol re i Jesucristo, lik inya'om wib' pu'ab' ire. Kintz'ib'aj b'i wuji chiwe yix chi iriqom i ch'am xaq i ukub'ib'al ik'ux che i Qajwal Jesucristo, chi xaqjun ru' pacha ukub'ib'al qak'ux yoj. Keje ile petnaq pqawi man i Jesucristo chi qa-Dios, xaq Tol qe, lik suk'ul i ku'ano. 2Kintz'onoj che i Dios chi kuya ni uk'iyal utzil chomal piwi, xaq i chomb'al ib' pik'ux rumal i retamaxik unojb'al i Dios, xaq i Qajwal Jesucristo.
Qasik'ixik rumal i Dios xaq i taqanik
3I Dios, ru' i nim laj ucho'ab', uya'om chik ronojel wach i rajwaxik che i qak'aslemal, ronojel wach i rajwaxik che i qab'e chwach Ire. Keje ile xe'eloq are xu'an chqe chi kqetamaj uwach Ire chi xojusik'ij ru', rumal i nim laj u'ij uchomal, xaq i nimaq taq u'anoj. 4Keje ile u'anom chiwe, chi kixuto pacha usujum loq. Ile chi usujum, lik nim i rok'am, lik o uchak chiwe. Ire uya'om ile, man i inojb'al yix kel na pacha unojb'al Ire xaq kixel chupam i mak atzalal chi o chwach i jyub' ta'aj. Are uxeb'al i mak atzalal le are i utz ti laj taq rayijb'al qe yoj oj winaq chwach i jyub' ta'aj. 5Rumali, yix chi kul ik'ux che i Ajwal, chi'ana chi ix utz chkiwach i winaq; xaq xwi ti ile, xaq chib'isoj unawsaxik iwib' che i Dios, wach kraj Ire ki'ano; 6xaq chijek'a iwib' che taq i utz taj; xaq chib'isoj ukowil ik'ux chwach i k'ax, man kisach ti unimal ik'ux; xaq chich'ob'o i Dios. 7Xaq o uchak chich'ob'o iwachalal, chi iwatz icha' iwib' rumal i Cristo. We k'ax kina iwib' chiwach, xaq k'ax cheina i winaq.
8We ki'an ronojel taq ile, kikowij uri mas u'anik uchak i Ajwal, alaj uri chi o xu'on re chiwe are xiya iwib' pu'ab' i Qajwal Jesucristo. 9We o jun keje ti ku'an ile, ire xa keje uri pacha jun mawach, o xa ktzun ti k'a naj. Jun pacha ile, xsach uri chuk'ux chi i Dios resam chik umak chi u'anom ujer. 10Rumali wachalal chwach i Cristo, chi'ana chi k-aljin chiwe wach taq i ki'ano, chi qatzij ix sik'tal rumal i Dios xaq lik ix chatal rumal Ire. We ki'an ronojel taq ile chi inb'im chiwe, kel uri chi lik ijikb'am ik'ux xaq kixtzaq ti chupam i utz taj. 11We keje ile ki'ano, lik nim, lik chom ni ik'ulaxik uri rumal i Qajwal Jesucristo chi Tol qe, are kixok che rajawinik chi nti uk'isik.
Atb'al tzij re i k'utunik
12Rumali, kinmayij ti ukuxtaxik ronojel ile chiwe, tupu lik iweta'am chik, xaq ix jikil chik che i saq laj tzij chi k'uttal chiwe. 13Kinb'ij yin, kmajawik kinkuxtaj ile chiwe ru' inpixb'anik, tz'aqat in k'aslik. 14Man i Qajwal Jesucristo u'aljinsam chwe chi ya kinkamik. 15Xwiri kin-an ronojel ni'pa i rajwaxik man xaq chrijil chik inkamik, yix kk'un chik'ux ronojel taq i b'iroxik le.
16Lik qab'im chiwe wach uk'unik i Qajwal Jesucristo, xaq wach i nim laj ucho'ab'. Are xqak'ut ile chiwe, to' ti xqanojij ub'ixkil; lik ru' qab'a'wach xqilo chi lik nim u'ij uchomal. 17Yoj lik oj o ru' i Ajwal Jesucristo are xoksax u'ij uchomal rumal i Qaqajaw Dios, are xpe i chom laj ch'awb'al chikaj chi xub'ij: “Iri are Ink'ojol chi lik k'ax kinna'o; lik kinkikot rumal Ire.” Keje ile xub'ij#1.17 Salmos 2:7; 2 Samuel 7:14; Isaías 42:1; Mateo 17:5; Marcos 9:7; Lucas 9:35.. 18Yoj lik xqata i ch'awb'al le chi xpe chikaj man oj o ru' i Jesucristo chila che i lo'laj jyub'.
19Ile chi xqilo, ku'aljinsaj chqe chi i tzij xkitz'ib'aj kan i profeta, lik qatzij. Yix, utz i ki'ano chi lik kikoj retalil che wach kitz'ib'am kan ike. Ni'pa i tz'ib'tal kan kumal ike le, keje pacha jun kantil chi tzijtal pa equm, ktzunik k'a ksaqirik, k'a are kel li nim laj ch'umil re usaqirb'al.#1.19 I uk'unik i Ajwal Jesucristo piwanima, keje pacha i nim laj ch'umil re usaqirb'al le. 20O uchak kiwetamaj iri: Ni'pa i xkitz'ib'aj kan i profeta chupam uwuj i Dios, mijun winaq o pu'ab' kub'ij wach kel usuk' we to' kuch'ob' ire utukel. 21Man mijun profeta to' xutz'ib'aj wach unojb'al ire. Xwiri ni'pa i xkib'ij ike, lik are utzij i Dios, man ike lik xkiya kib' pu'ab' i Dios, xaq wach i xkib'ij, lik are Lo'laj Utewal i Dios xyaw chke.#1.21 Cf. 2 Timoteo 3.16; 1 Pedro 1.11.
Currently Selected:
2 Pedro 1: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
