Malako 6

Yisu bamiinyasula hu Nazareti

Mty 13.53-58; Luk 4.16-30

1Yisu amati ŋa mbuha mo yiina na ayeni hu musyenge wu nde haakuli. Bayihi ba nde baakaduukala nde#Mty 13.53; Luk 4.16 . 2Bu Saba yaatoodi, Yisu abaandihi ulongese mu nzo lisambulu yi Bayudaayo. Baatu ba balahi ba baakayuha ndongisili a nde, baakimuhi na baakafuula: «Maniima moosi huni mali mu uyiila nde? Ki pila a tsiki mo yiniiyi yi baava nde? Na buni bipadi bya pila mo yiniiyi bili mu uvangama mu myoho mya nde? 3Wunuuwu a ni salapandi, mwana a Mariya#Yow 6.42, mwana a ngu a Yaki, mwana a ngu a Yose, mwana a ngu a Yude, na mwana a ngu a Simoni ve? Bakedi ba nde a bubaatsahala na bisu ŋaaniŋa ve?» Maana moosi maakasa bo ikahu mu usa imiinu mu Yisu. 4Na Yisu aleeli bo: «Bubaakiinza mumbihuli pasi tsyelo, vengo mu tsi a nde, ŋa hati bibaayaka ikuta hya nde na mu nzo a nde#Mty 13.57; Luk 4.24; Yow 4.44.» 5Yisu a hakitwala uvaanga ipadi tso imosi ŋaana ve. Vengo ubeeloso hwa mwa babeedu mu usuusala hwa bo myoho#Mty 13.58 . 6Na nde akimuhi, mu pelili a bo yi imiinu.

Yisu miitsindaha kuumi na bayihi boole mu isalu

Mty 10.5-15; Luk 9.1-6

Yisu akayene mu mala ma ibiingi mohiina, mu ubaalongese baatu mambu ma Nzambi. 7Yisu ateeli bayihi bakuumi na boole. Nde abaandihi utsindaha bo boole-boole na aviidi bo matwala ŋa yulu mavupu ma mabi. 8Nde aviidi bo tumili mo yiniiyi: «A libita pasi isiha mu mudyenge a benu ve. Tso lipa, tso koome, tso mbongo mu mudi a luungu. Ka bitaani ndulu likaanda. 9Lwataani bikoodi mu miilu mya benu na a libita biyunga byole ve.»

10Nde akabweleele bo: «Tso bayaki benu mu pasi nzo, kwilalaani muuna, natee bu benu luupala muuna. 11Tso baatu baveliyaka benu pasi tsyelo na baveliyuhala benu, bu benu luumata ŋaana, kubalaani mufuundu a mataambi ma benu. Hiina hyuba iliimbu hya kebisili a bo#Mty 10.14; Luk 9.5; Mav 13.51; 18.6 .» 12Ni mu buuna, bayihi baayeni mu ulongese baatu mu usobo mbiili a bo. 13Bo baakabinga matengo ma malahi, baakakila maadi mu babeedu ba balahi na baakabeeloso bo#Yak 5.14 .

Lipfu la Yowani Mutondihi

Mty 14.1-12; Luk 9.7-9

14Mutumi Eloode ayuhi tsangu a Yisu, mu tooni ati, nduhi a nde yaadumi na baatu baakaleele: «Yowani Mutondihi miisuuha mu babaakwa! Ni mu buuna nde ali mu uvaanga bipadi.» 15Bakima baakaleele ti: «Nde ni mumbihuli Eliya.» Bakima kaka ti: «Nde mumbihuli wu afwanina na mumosi mu mimbihuli mya tsikulu.» 16Ka bu Eloode haakayuha ma Yisu haakavaanga, nde aleeli: «Wunuwu ni Yowani wu me atumi baatu mu ukese mutswe, miisuuha mu babaakwa!»

17Mu mbuli Eloode nde mwakulu atsindihi baatu mu ukaanga Yowani. Nde atumi baahada Yowani mapaanga na ukotese nde mu kondaayi. Nde haasiidi buuna, mu tooni a Elodyadi, wu Eloode haapatuli mu ukwele tso bu nde haaba mukadi a mwana a ngu a nde Filipo#Mty 14.3; Luk 3.19; 9.9 . 18Ni mu buuna, Eloode haakotisi Yowani kondaayi, mu tooni ati, Yowani aleeli nde ti: «A baava we muswa wu ukwele mukadi a mwana a ngu a we ve#Lev 8.16; 20.21 !» 19Elodyadi akabelele Yowani na akataasa uduba nde, ka nde a haakatwala ve. 20Eye, Eloode aba na boomo bwa Yowani, bu nde haaba haayaba ti Yowani muutu wa tsiitsa na wa ngidi. Buuna, Eloode akakalila nde. Ŋa nde haakayuha Yowani mu utoyo, Eloode aba na matsimi helini-helini. Ka nde akamono kinya mu uyuha bu Yowani haakatoyo#Mty 14.5; 21.26 . 21Ka ilumbu imosi, mu taangu yi yaayelemene, Eloode amoni bubwe mu uvangimasa ilaambu hi ilumbu hya mbutili a nde. Nde ateeli mu uyadya, bapfumu ba lituma la nde, bakuutu ba balwani na baatu ba likiinzu batsomi ba itaanzi hya Ngalili. 22Mwana a Elodyadi wu mukaasu, akoti mu nzo na akini. Nde amweesi Eloode na byenyi kinya. Buuna, mutumi Eloode aleeli huli nuumba mo wunuwu: «Vondo me pasi isiha hi we toondi, me tsa pa we hyo.» 23Titswene, Eloode alabi nde mulabu mo wunuwu: «Pasi bi we uvondo me, me tsa pa we byo. Tso hwaaba itini imosi mu byole hi Ipfumu hya me.» 24Nuumba apali na afuuli ngu a nde: «Hima me upondo?» Ngu a nde akaali nde: «Mutswe a Yowani Mutondihi.» 25Nuumba abingilili ufutaha huli mutumi, mu uyabisa nde pondili mo yiniiyi: «Me toondi ti mawasa maniima, we va me mutswe a Yowani Mutondihi ŋa yulu a lyengo!» 26Mutumi akoti mu lingebe; ka nde a haatondi ubisala pondili a Elodyadi ve, mu tooni milabu mi nde haasiidi ŋa busu bwa byenyi bya nde. 27Eloode atsindihi masulubete lisadaadu limosi mu bakeedi ba nde, na aviidi lo tumili yi ubehele nde mutswe a Yowani Mutondihi. Lisadaadu laayeni hu kondaayi na laakesi mutswe a Yowani. 28Titswene, lisadaadu laabehi mutswe ŋa lyengo na aviidi huli nuumba, wu ayava nde huli ngu a nde. 29Bu bayihi ba Yowani baayuhi musamu, bo baayidi mu uvolo nyutu a nde na baasuusi yo mutso a ngila.

Yisu na bayihi ba nde bamiibuungala koonge a baatu

Mty 14.13-21; Luk 9.10-17; Yow 6.1-14

30Biluumbi bya Yisu byayakuukama ŋa pedu a nde, na byayabisi nde moosi ma bo baasiidi na moosi ma bo baalongisi. 31Na Yisu aleeli bo: «Yaani ŋa muvanga, ŋa mbuha a tswehi na vuumaani hoole.» Nde haaleeli buuna, mu tooni ati, baatu ba balahi baakaya na baakafutaha, buuna bo a baakabaha tso taangu yi udya ve. 32Buuna, Yisu na biluumbi bya nde, baayeni mu hyabu ŋa muvanga ŋa mbuha yi ive na ive. 33Ka, baatu ba balahi baamoni bo mu utahuha na baadihuli bo. Baatu baamati mu misyenge mya bebele myosi matiinu, na baateehili bo uto mu miilu hu bo baakayene. 34Taangu yi Yisu hasutihi mu hyabu, nde amoni koonge a baatu yinene. Na mutima a nde aluuli mu lingebe la bo mu tooni ati, bo baabeedi we mameme ma maavele a keedi. Buuna, nde abaandihi ulongese bo bisiha bi bilahi. 35Bu busi bwaaba bwaka beleve, bayihi ba Yisu baayasusaha ŋa pedu a nde na baaleeli nde: «Busi bwamiiyila, na mbuha mo yiniiyi yi ive na ive. 36Futala baatu mo baniiba, bayene mu mala na bitsaka bi ibiingi mo hiniihi, mana bo bayasuumba byudya bya bo.» 37Ka Yisu akaali bo: «Vaani bo byudya benu mwakulu!» Bayihi baafuuli nde: «Bisu liyene liyatsinda makama moole (200) ma badenye#Mty 20.2 mu usuumba mapa, na liva bo byudya?» 38Yisu aleeli bo: «Mapa kwe benu lili na mo? Yenaani, yamonwaani.» Bo baayafuula na baayaleele nde: «Bisu na mapa mataanu na batswi boole.» 39Buuna, Yisu aviidi bo tumili mu utsahisa baatu boosi mu makabu-makabu ŋa yulu a biimbu bi bibisu. 40Na bo baatsahili mu miloongo mya kama (100) la baatu na mu miloongo mi maku mataanu ma baatu. 41Yisu avoli mapa ma mataanu na batswi baboole. Asiimbuli miisu hu yulu na asambili mu uvondo lisyeme. Titswene, atabuli mapa na aviidi mo huli bayihi, mu ukabila huli koonge a baatu. Yisu akabi kaka batswi baboole huli boosi. 42Boosi baadiidi na baaywaati. 43Na bayihi baatoli na baabehi byebe#2Pf 4.42-44 kuumi na byole bi byaluuli mu bitini bi mapa na bi batswi bi byasalili. 44Litangu la baatu ba baadiidi mapa, aba biveeve bitaanu (5 000) bi babahala.

Yisu bibaayaka mu uyene ŋa yulu a mamba

Mty 14.22-33; Yow 6.15-21

45Titswene, masulubete Yisu atumi bayihi ba nde mu uvaata mu hyabu, mana bo bateehele nde hu simu lina la dyanga, hu tsyelo musyenge a Betesayida, bu nde mwakulu huusaala afutala makonge ma baatu. 46Bu nde haamani ufutala bo, nde ayeni hu yulu isyelo mu usambila. 47Bu tsitsaha yaatoodi, hyabu hyaba hyaka ŋa butima bwa dyanga, na Yisu asaali nde siha ŋa simu. 48Nde amoni ti bayihi ba nde baaba na muvinyu mu utsindahala hyabu mu manaangu ma bo, mu tooni ifula hi hyakabwana bo. Ni mu buuna, teehele busi bukya, Yisu ayeni mu miilu ŋa yulu a mamba, na nde akiivyoho bo. 49Bu bayihi baamoni nde mu uyene mu miilu ŋa yulu a mamba, bo baatsimi ti wuuna aba mukuyi, na bo baafulihi. 50Mu tooni ati, bo boosi baakamono nde, na bo baaba na boomo. Ka masulubete, Yisu aleeli bo: «Hwadaani! Wunuwu me. A liba na boomo ve!» 51Titswene, Yisu akoti na abiisili bo mutso a hyabu, na ifula hyavudimini. Bayihi baasinzikimuha, 52bu bo baavelitsikaha ipadi hi mapa: mitima mya bo myaba myakangama.

Yisu miibeeloso babeedu hu Ngenezareti

Mty 14.34-36

53Hu mbisa a tsabuhili, bo baatoodi hu itaanzi hya Ngenezareti, na bo baasiingihi hyabu ŋa simu. 54Bu bo baasutihi mu hyabu, masulubete, baatu baadihuli Yisu. 55Buuna, baatu baataangili itaanzi hyoosi matiinu, na baakabehele nde babeedu ŋa yulu bipoyi, pasi hu bo baakayuha ti: «Yisu ndyowunuuwu ŋaniiŋa!» 56Pasi tsyelo yi Yisu haakayene, mu mala, mu misyenge, na mu bitsaka, baatu baakasuusa babeedu mu matandala ma mikungi, na baakayayaana nde mu unyaha ti babeedu babeleene tso tsoso ikutu hya nde. Na boosi ba baakabeembe nde, baakafuuha.

Currently Selected:

Malako 6: TSA

Highlight

Copy

Compare