Malako 5

Yisu miibeeloso nga livupu lilibi

Mty 8.28-34; Luk 8.26-39

1Yisu na bayihi ba nde, baayato hu simu lina la dyanga, hu tsi a bisu Ngelaseneya. 2Yisu asutaha mu hyabu, #5.1-2 Tsi a Ngelaseneya ni itaanzi hi hili hu Esete a dyanga li musyenge a Ngalili.masulubete, muutu mumosi apali hutso mangila, nde aba na livupu lilibi, na nde ayabwana Yisu. 3Muutu mo aba ubaatsahala hutso mangila, na muutu tso mumosi a haakabwetwala uhada nde tso mu paanga ve. 4Mataangu makima, baakahada nde myoho na miilu mu bitali na mapaanga. Ka nde akatabula byo byosi, na pasi muutu a hakabwekuuta nde ve. 5Taangu yoosi, butsuhu na nyangu, nde akabaadyengele hutso mangila na hu yulu bisyelo, mu ubaafulaha na ubaanemese linyutu mu mamanya. 6Bu nde haatalili Yisu hu lala, nde ayeni tiinu mu uyakongemene ŋa busu bwa nde. 7Nde afulihi mu ndaha yi mifudi: «Yisu, Mwana a Nzambi wa hu hati a yulu, we na me ki dyambu? Kolo-kolo a we, mu nduhi a Nzambi, a hanyongese me!» 8Mu tooni ati, Yisu akaleele nde: «Livupu lilibi, pala mu muutu mo wunuuwu!» 9Na Yisu afuuli nde: «Nduhi a we na?» Nde afutili: «Nduhi a me “Koonge#5.9 Koonge Litaangu li masadaadu la bebele na biveeve bisamunu huli bisu Looma.”, mu tooni ati, bisu lili ba balahi.» 10Na nde asinziyayaana Yisu, mu uveletsindaha mo hu mbadi a tsi.

11Bu ŋaana hwaba na koonge yinene yi bangulu#Lev 11.7; Pfu 14.8 yi yaaba mu udya ŋa pedu isyelo, 12mavupu ma mabi maayayiini Yisu, na maaleeli: «Tsindaha bisu hutso bangulu mo baniiba, mana bisu likoto mu bo!» 13Yisu aviidi bo muswa. Buuna mavupu ma mabi maapali, maakoti mu bangulu. Koonge bangulu yi litaangu laaba bebele na biveeve byole (2 000), yaakulimini mu tiinu yoosi hutso a dyanga umata hu yulu mutsundu. Bangulu boosi baadyami. 14Ba baakabuungala bangulu baabati na baayayabisa musamu hutso musyenge na mu mala. Na baatu baayamono ma maavyohi. 15Baatu bayato ŋa pedu a Yisu, baamoni nga koonge mavupu ma mabi atsahala, alwaata na tsiki yoosi. Na bo baamoni boomo. 16Ba baamoni ma maavyohi, baayabisi bo buni maabwiili huli nga mavupu ma mabi na huli bangulu. 17Buuna bo baabaandihi uyayaana Yisu mu umata mu itaanzi hya bo. 18Bu Yisu haakanama mu hyabu, nde wuuna wu aba na mavupu ma mabi ayayiini Yisu mu uyene na nde. 19Yisu a haaviidi nde muswa ve, ka aleeli nde: «Futaha hu nzo a we, huli ikuta hya we, na yabisa bo moosi ma Pfumu amiivangila we na buni nde amiikwila we lingebe.» 20Muutu mo wuuna ayeni na abaandihi uyabisa mu itaanzi hya Dekapoli#5.20 DekapoliItaanzi hi hyaaba hu Sude ya Esete ya dyanga la Ngenesareti., moosi ma Yisu haavangili nde. Na baatu boosi baakimuhi.

Yisu miibeeloso mukaasu na miisuula mwana a Yayiro mu lipfu

Mty 9.18-26; Luk 8.40-56

21Yisu abwesabuha simu lina mu hyabu, na koonge a baatu yinene yaakuukimi ŋa busu bwa nde. Nde aba ŋa muvanga a dyanga. 22Mumosi mu bakuutu ba nzo lisambulu yi Bayudaayo, nga nduhi a Yayiro ayidi; amono Yisu, nde abwiidi ŋa miilu mya nde. 23Na asinziyayaana huli nde, na uleele: «Mwana a me wu mukaasu aka ŋa pedu lipfu. Yaanga yaasuusala nde myoho, mana nde afuuha na aba moonyi!» 24Yisu ayeni na Yayiro. Koonge a baatu yinene yaakaduukala nde na yaakavinyala nde matsyelo moosi.

25Kaahu, mutso a koonge, hwaba na mukaasu mumosi wu makila maakapuuha umata bilima kuumi na byole. 26Nde akasinzamono pasi, mu mbuhili babuhi ba balahi. Nde anyambisini busina bwa nde bwosi, hwavele a tsoongo. Ka bubeedu bwa nde bwakatsohemene. 27Mukaasu mo wunuwu ayuha tsangu a Yisu, nde ayidi mu limbimbisa la Yisu na abeembi ikutu hya nde. 28Ka nde akaleele: «Tso me mbeembi ndulu bikutu bya nde, me upfuuha!» 29Masulubete, makila ma maakapuuha nde maakanyi, na nde ayaabi mu linyutu la nde ti nde miibeeloho mu bubeedu bwa nde. 30Masulubete, Yisu ayaabi ti, mifudi mimiipala mu nde. Buuna, nde akinguhi ŋa butima bwa koonge na afuuli: «Na miibeembe bikutu bya me?» 31Bayihi ba nde baafutili: «We li mu umono hwawe ti, koonge yili mu uvinyala we matsyelo moosi, na we bwefuula: “Na miibeembe me?”» 32Ka Yisu akatala ibiingi hya nde, mu uyaaba na asiidi buuna. 33Mukaasu atsuli likamba mu boomo, bu nde hamoni ma maavyohi mu nde. Nde ayabwa ŋa miilu mya Yisu na ayabisi nde imbuli hyoosi. 34Ka Yisu aleeli nde: «Mwana a me wu mukaasu, imiinu hya we himiifuuhasa we; yene mu hyenze, nyaha we beeloho mu bubeedu bwa we.»

35Bu Yisu haaba kini mu uyambila, baatu baamati hu nzo a Yayiro na baaleeli huli nde: «Mwana a we wu mukaasu miikwa; mu hima mu ubwekwamisa Mulongisi?» 36Ka Yisu, wu ayakimuha mambu mo maana, aleeli huli mukuutu a nzo lisambulu yi Bayudaayo: «A ba na boomo ve, sa ndulu imiinu!» 37Na Yisu a haasiingisi pasi muutu mu uyakeele nde ve, vengo Peetelo, Yaki na Yowani mwana a ngu a Yaki. 38Bo baatoodi huli mukuutu a nzo lisambulu yi Bayudaayo. Huuna Yisu amoni muyunga a koonge a baatu ba baakalila na ufulaha bileele. 39Nde akoti mu nzo na aleeli bo: «Mu hima benu lili mu muyunga na bililu? Mwana a haakwa ve, ka nde tolo haabwamina.» 40Ka bo baakakwede nde. Buuna Yisu apalisi bo boosi, na avoli taata na ngu a mwana, na bayihi ba nde babatatu. Bo baakoti mu itini hya nzo hu hwaba mwana. 41Yisu akaangi mwana mu hooho na aleeli huli nde: «Talita kume!» Mbindulili ni ti: «Nuumba, me miindeele we lo, suuha!»

42Masulubete, nuumba yi yaaba na bilima kuumi na byole, asuuhi mu lipfu na abaandihi uyene. Bo boosi baakimuhi hu ulahi. 43Ka Yisu asinzikebese bo mu uveleyabisa huli pasi muutu. Titswene, nde atumi bo mu uva nde byudya.

Currently Selected:

Malako 5: TSA

Highlight

Copy

Compare