Malako 4

Kuma a mukuni

Mty 13.1-9; Luk 8.4-8

1Yisu abwebaandiha ulongese ŋa muvanga a dyanga la Ngalili. Koonge yinene yaayadiinga nde. Ni mu buuna, nde haakoti na haatsahili mutso a hyabu ŋa yulu a dyanga. Na koonge yoosi yaaba ŋa simu la dyanga. 2Yisu akalongese bo misamu mi milahi mu makuma. Na mu ndongisili a nde, nde akaleele bo: 3«Yuhaani! Ilumbu imosi, mukuni apali mu unyanza muhunu. 4Bu nde haakanyanza mbutu, mbutu yina yaabwiidi mu muvaanga musoho, banyunyi baayidi na baadiidi yo. 5Mbutu kima yaabwiidi ŋa yulu a toto mamanya, hu hwavele na toto yindahi. Mbutu yaameni mawasa, mu tooni ati, toto a yaaba yindahi ve. 6Bu nyangu haabeengi, nde anyengisi mitswihala, na myo myakanyi mu tooni avele li manganzi. 7Mbutu kima yaabwiidi ŋatso bangamba. Bangamba baabuuhi na baavinyili mitswihala. Na myo, a myaabuti mbutu ve. 8Ka mbutu kima yaabwiidi ŋa toto a mbolese. Mitswiihala myaabuuhi, myarandi na myaapalisi bisaka. Isaka imosi hyaaviidi mbutu maku matatu (30), hina hyaaviidi mbutu maku masamunu (60), na bina kama (100) la mbutu.» 9Na Yisu aleeli: «Muutu nga matswi mu uyuha, nyaha ayuha!»

Yisu mu hima ubaasalila makuma

Mty 13.10-17; Luk 8.9-10

10Bu Yisu haatahuhi lala na koonge a baatu, ba baaba baadiinga nde na biluumbi bikuumi na byole, baafuuli nde mu dyambu li makuma. 11Nde akaali bo: «Tswehi a Ipfumu hya Nzambi, baamiiva huli benu. Ka huli baatu ba bali hu mbadi, bo ubaayuha yo mu makuma. 12Ni mu buuna,

“bo bali mu usungamana, ka a bali mu umono ve.

Bo bali mu uyuha, ka a bali mu utsikaha ve.

Tso bo buutsikaha, bo buusobo mbiili,

na Nzambi usa bo kolo-kolo#Esa 6.9-10 !”»

Mbindulili a kuma mukuni

Mty 13.18-23; Luk 8.11-15

13Titswene Yisu abweleele bo: Tso benu a lili mu utsikaha kuma mo yiniiyi ve, buni benu luutsikaha makuma mana moosi? 14Mukuni ni muutu wu ubaakuna maambu. 15Ba bali mu muvaanga a musoho, ni baatu ba bubaayuha maambu, ka Saatana ubaaya mawasa na umaasa ma baakuni mu mitima mya bo. 16Mbutu kima yi yaabwiidi ŋa toto yi mamanya, ni baatu bakima ba bubaayaka maambu: masulubete ma bamiiyuha mo, bo bali mu uyaka mo na kinya. 17Ka mambu a mu baamenese bo manganzi mu bo mwakulu ve, bo bubaakangama mu mo ndulu mu mwana a taangu hoole. Titswene, tso babwani na mbingisili, buuve tso batsundisi bo mu tooni a mambu ma Nzambi, masulubete bo buutiimba imiinu hya bo. 18Mbutu kima yi yaabwiidi ŋa toto matsyende, ni baatu ba bali mu uyuha mambu, 19ka bo bali mu usinzatsima manzala ma tsi, soho li busina na mapeyu ma pila mu pila, ni biina bibaavinyala mambu ma Nzambi, na mo a mali mu ubuta mbutu ve. 20Mbutu kima yi yaabwiidi ŋa toto ya mbolese, ni baatu ba bali mu uyaka mambu na bali mu ubuta mbutu, mumosi maku matatu (30), mukima maku masamunu (60), na mukima kama (100).

Kuma a mwinda na ya hyetso

Luk 8.16-18

21Nde abweleele bo: «Muutu ubehe mwinda, mu usuusa nde hutso ipaanyi buuve hu tsina a taangi? Mwinda ubaasuusa a ni ŋa hwasyenoho ve#Mty 5.15; Luk 11.33? 22Byosi bi byasweme, byumonehele ŋa liyalala. Na mambu moosi ma tswehi, muuyabahana ŋa liyalala. 23Muutu wu li na matswi mu uyuha, nyaha ayuha!» 24Yisu abweleele bo: «Kebaani mu ma benu lili mu uyuha! Hyetso hi benu libaasalila mu uyelemese bana, ni hiina kaka Nzambi huusalila mu uyelemese benu. Na nde ubwebwese ikima hi hyasinzafulala. 25Ni mu buuna, muutu wu li na isiha, buubweva nde bi byafulala. Ka huli wu avele na isiha, buumaasa nde tso hi nde ali na hyo.»

Kuma yi muhunu wu akuli mu nde mwakulu.

26Yisu abweleele: «Mbindulili a Ipfumu hya Nzambi ni yiniiyi: Muutu mumosi li mu unyanza muhunu mutso a ngundu a nde. 27Butsuhu na nyangu, tso nde bwaamini tso nde suuhi, muhunu li muupaanduha na li mu umene, hwavele muutu utsikaha buni libaavangama. 28Toto yo mwakulu yibaabuuhasa: ubaandiha mu muti, titswene mivoovo, natee mbutu yi yaakomo mu mivoovo. 29Na bu mbutu yim iiyele, mawasa-mawasa bubaatsindaha bakooli na mambeedi ma ngololo mu tooni ati, taangu yi utsonzehe mbutu yimiito#Yow 4.13 .»

Kuma libutu la mutade

Mty 13.31-32,34; Luk 13.18-19

30Yisu akabweleele: «Na hima luutwala ufwanisa Ipfumu hya Nzambi? Mu ki kuma bisu luutwala umweese hyo? 31Ipfumu hya Nzambi hyafwanina na libutu la mutade, bu bamiikuna lo mu toto, lo lili libutu li laalutahala bukeehe mu mbutu yoosi ŋa tsi. 32Ka hu mbisa ukuna libutu, lo libaakula, libaalutahala mu bunene byosi bi baakuna mu wooto. Lo libaalaabisa bitabi bi binene bi banyunyi ba yulu bubaatunga byanza bya bo hu tsina a posi a nde#Dan 4.9; Ezk 17.23; 31.6 .»

33Yisu akava ndongisili a nde mu makuma ma malahi ma pila mo yiniiyi, mu iteesi hiba baakayuha baakitwala utsikaha. 34Yisu a haakatoyo na koonge, hwavele usalila kuma ve. Ka ŋa tswehi, nde akabindula moosi huli bayihi ba nde.

Yisu miivudamasa ifula hiinene

Mty 8.23-27; Luk 8.22-25

35Ilumbu mo hiina ŋa tsitsaha, Yisu aleeli huli bayihi ba nde: «Lisabuhaani hu simu lina la dyanga.» 36Bayihi baasiisi koonge a baatu, na bo baabiti Yisu mu hyabu hi nde haaba ŋa yulu a hyo. Hwaba kaka na byabu bikima, bi byakayene na nde. 37Masulubete, ifula imosi hi mifudi hyanyingisi, na mapo maakabwa hutso a hyabu, na hyo hyabaandihi uluula mamba. 38Na Yisu aba tolo hu mbisa a hyabu, asika mutswe ŋa yulu a kurusu#4.38 kurusu Isiha hi ibaasyenolo mutswe ŋa taangi, mu taangu yi ubwamina.. Bayihi baasuuli nde na baaleeli: «Mulongisi, bisu limiikwa! Na a hili mu umweese we pasi ve?» 39Yisu asuuha, afwengili ifula mu mifudi na aleeli huli dyanga: «Ba swii! Vudamana!» Buuna ifula hyavuumi na kele yaafwiidi. 40Titswene nde aleeli huli bayihi: «Mu hima benu lili na boomo? Benu kini imiinu ve?» 41Ka boomo bu bwafulala bwakaangi bayihi na baakalelesene: «Nde wunuwu na ali, wu a tso ifula na mapo ma dyanga bibaasiingala nde#Mkg 65.8; 89.10; 107.23-32?»

Currently Selected:

Malako 4: TSA

Highlight

Copy

Compare