Malako 13

Yisu bibaayaka mu uyabisa utsala hwa nzo a Nzambi

Mty 24.1-2; Luk 21.5-6

1Bitsiitsa na Yisu mu upala mu nzo a Nzambi, mumosi mu bayihi ba nde aleeli nde: «Mulongisi, mono! Ki pila bubwe bu mamanya, ki pila bunene bwa nzo!» 2Yisu afutili nde: «We bibaayaka mu umono bunene bwa nzo mo yiniiyi? A huusaala ŋaniiŋa tso manya ŋa yulu a manya ve; byosi sa batsala.»

Mapasi na mbingisili

Mty 24.3-14; Luk 21.7-19

3Yisu atsahili hu yulu isyelo hi miti mya Olive, masungimini na nzo a Nzambi. Peetelo, Yaki, Yowani na Andele baafuuli nde ŋa muvanga: 4«Leele bisu ki taangu maana muutswiha, na ki iliimbu hyuyabisa ti maana moosi muusuka.»

5Buuna, Yisu abaandihi uyabisa bo: «Kebaani, muutu a hadungasa benu. 6Ba balahi buuya mu nduhi a me na buuleele: “Ni me!” Na bo buudungasa baatu ba balahi. 7Ŋa benu luuyuha mu utoyo mu midiingu, na batsyetsye ba midiingu, a liba na boomo ve. Maana maafwana uvangama. A yiumaaba tsukusu ve. 8Tsi mosi sa yitelemene tsi yina, na ipfumu sa hitelemene ipfumu hina. Toto sa yinyingama mu mambuha ma pila mu pila, napa limbunga sa liba. Yiina yiuba ni mbandihili misoongo mya mbutili. 9Kebaani mu tooni a benu mwakulu. Ka sa bayeholo benu mu manzo ma tsundusu; sa babeete benu mu manzo ma masambulu ma Bayudaayo. Sa batsundasa benu ŋa busu bu batumi ba matsi na ŋa busu bu bapfumu mu tooni a me; hiina hyuba imbangi huli bo. 10Ka hwafwana ti bamaayabisa Musamu wu Mubwe huli mabuli moosi. 11Ŋa buubita benu hu nzo a tsundusu, a laamaateehele umono boomo mu ma benu luuleele. Ka leelaani mambu ma buuva benu mu ngunga mo yiina, mu tooni ati, mo a muumata huli benu ve, ka ni huli Livupu la Ngidi. 12Mwana a ngu sa ayeholo mwana a ngu a nde mwakulu hu lipfu, na taata sa avaanga bumosi mu mwana a nde. Baana sa batelemene babuti ba bo, na buutuma ubelese bo mu lipfu#Ezk 38.21; Mik 7.6 . 13Baatu boosi sa babelele benu mu tooni a nduhi a me. Ka woosi wu ukuunda natee hu tsukusu, nde wuuna sa afuuha.

Mapasi ma likini a laamoni ve

Mty 24.15-28; Luk 21.20-24

14Ŋa benu luumono wu bali mu uteele “musafuli wu mutsali” ateleme ŋa mbuha yi nde haavelefwana uba#Dan 9.27; 11.31; 12.11, nyaha wu bibaayaka mu utaanga atsikaha mo bubwe! Buuna, ba buuba hu Yude, nyaha babata bebele na bisyelo; 15woosi wu uba hu yulu ibaanga hya nzo a nde, avelesutaha mu uvolo isiha mutso a nzo; 16na woosi wu uba hutso a ngundu a nde, avelefutaha hu nzo mu uvolo iyunga hya nde. 17Ki pila lingebe luuba mu bakaasu banga mayimi na mu ba buukaanwyasa baana mabeelo mu bilumbu mo biina! 18Baasambilaani mana mambu mo maana a mayiila mu taangu a piyu yi mifudi! 19Mu tooni ati, mu bilumbu mo biina, sa huba na mapasi ma maafulala bunene na moosi ma laamiibwaana na mo, umata pangili a tsi, ŋa Nzambi haavaangi byosi, natee lolo yiniiyi. Mapasi ma pila mo yiina, a muubweba ve#Dan 12.1 . 20Tso Pfumu a haavoli kesili yi ukuka bilumbu ve, muutu tso mumosi a haakiifuuha ve. Ka nde haakuki bilumbu, mu tooni a ba nde haamiisoolo. 21Ni mu buuna, tso muutu leeli benu: “Monwaani, Masiya ndyowu ŋaniiŋa!” Buuve ti: “Monwaani, ndyowunuuwu!” A lisiila nde imiinu ve. 22Mu tooni ati, bakristo ba mapfuta na mimbihuli mi mapfuta buuteleme; bo sa bavaanga biliimbu bya kimuhili na bimangu mu udungasa tso huyelimini, ba Nzambi haamiisoolo. 23Buuna benu, kebaani! Me amiinzibusa benu mu moosi.

Nziili a Mwana a muutu

Mty 24.29-31; Luk 21.25-28

24Ka mu bilumbu mo biina, hu mbisa mapasi ma pila mo yiina, taangu sa yikituha piipidi, tsuungi a huubweva mweede ve, 25bamvwelele buubwa umata hu mayulu, na matwala ma mali hu mayulu muunyingama#Esa 13.10; 34.4; Ezk 32.7-8; Yoe 2.10; 3.4 . 26Buuna, sa bamono Mwana a muutu mu uya hutso mayidu, mu matwala ma nde moosi na muyusu a nde#Dan 7.13. 27Buuna, nde sa atsindaha bapofi mu ukuukaha ba nde haamiisoolo mu bituungu bibina bya tsi, umata tsoso a toto natee tsoso mayulu#Pfu 30.4; Neh 1.9; Zak 2.10 .

Ileso hi mufiinge

Mty 24.32-35; Luk 21.29-33

28Tsikahaani ndongisili a kuma yi mufiinge. Bu bitabi bya nde bimiikolo, na bu makaya ma nde mamiifula, benu limiiyaaba ti kwanga yaaka bebele. 29Ni bumosi benu kaka, ŋa benu luumono misamu mo miniimi mu utswiiha, yaabaani ti Mwana a muutu aka bebele, ŋa munywa a nzo a benu. 30Mu mbuli, me ndi mu undeele benu: tuungi mo liniili a luuvyoho ve, tswamina maana moosi maya. 31Yulu na toto byuvyoho, ka mambu ma me a muuvyoho ve.

Nzambi siha yaabi taangu a tsukusu

Mty 24.36-44

32Mu ma mali mu utala ilumbu buuve ngunga yi mambu mo maana muuya, pasi muutu a hayaabi ve, a tso bapofi hu yulu ve, a tso Mwana kaka ve; ka ndulu Taata siha yaabi lo. 33Kebaani! Baani likanda, mu tooni ati, benu a liyaabi ŋa taangu yiuya ve. 34Sa buba we ŋa muutu ubaayene mudyenge: nde bibaayaka mu usiisa nzo a nde na ubaava lituma la nzo huli basalili ba nde; muutu muutu na isalu hya nde, na bibaayaka mu utuma keedi a munywa a nzo mu uba likanda. 35Buuna, baani likanda, ka benu a liyaabi ŋa pfumu a nzo huuya ve: ŋa tsitsaha, buuve hu hahati la busi, buuve ŋa tsusu huukohele, buuve ŋa ngwali. 36Ka tso nde yafutaha masulubete hu iliba, a hwafwana ve ti nde abiisa benu tolo. 37Ma me ndi mu undeele benu maniima, me ndi mu undeele mo huli boosi. Baani likanda!»

Currently Selected:

Malako 13: TSA

Highlight

Copy

Compare