Malako 12

Kuma huli banga mangundu ma miti mya vinye

Mty 21.33-46; Luk 20.9-19

1Yisu abaandihi uyambila na bo mu makuma: «Bahala limosi laakuni ngundu yi miti mya vinye. Nde adiingi yo muumbu, nde avahi ipinyili hya mbutu a vinye, na atuungi nzo yi mutaabu#Esa 5.1-2 mu bakeedi. Titswene nde asiisi ngundu huli basali ba mangundu ma vinye, na nde ayeni hu mudyenge. 2Bu taangu yaatoodi, nde atsindihi musalili mumosi huli basali ba mangundu ma vinye, mu uyavolo la nde kabu la mbutu yi miti mya vinye. 3Ka bo baakaangi musalili, baabeeti nde na baafutili nde myoho bunyanga. 4Buuna, nde abwetsindaha bo musalili mukima. Wuuna, bo baateti nde mu mutswe na baatuhi nde. 5Nde abwetsindaha mukima, na wuuna, bo baadubi. Titswene na bakima ba balahi ba bo baavangili bumosi: Bo baabeeti bamosi na baadubi bakima. 6Hwasaali na nde ndulu mwana a nde mumosi wu litondo. Nde atsindihi bo nde hu tsyelele na utsima ti: “Bo sa bakiinza mwana a me.” 7Ka basali ba mangundu ma vinye, baaleelisini: “Nde wunuwu ni mubyalili mukobe! Yaani, lidubaani nde, na mukobe sa aba wa bisu a benu!” 8Bo baakaangi nde, baadubi nde na baabumi nde hu mbadi a ngundu miti mya vinye.

9Nga ngundu miti mya vinye hima huusa? Nde sa aya aduba basali ba mangundu ma vinye, na nde sa ava ngundu huli bakima. 10Benu a laamaataanga dyambu mo liniili mu Mabasonehe ma Ngidi ve?

“Manya bibaayaka batuungi baabumi,

laaka manya la talu bibaayaka itungu.

11Pfumu ni wu asa buuna,

na lo ni dyambu bibaayaka muyusu ŋa miisu ma bisu!”»

12Bapfumu mo baana, baakasaha nzila yi ukaanga Yisu, ka bo baamoni boomo bwa koonge. Bo baakatsima ti, mu tooni a bo Yisu hatiidi kuma mo yiina. Bo baasiisi nde na baayeni.

Limandu la Kayifa

Mty 22.15-22; Luk 20.20-26

13Bo baatsindihi huli Yisu mwa litangu bibaayaka Bafarisi na mwana a baatu ba kabu la Eloode, mu uyayebe nde mu mikuma mi nde huupalisa. 14Bu bo baayidi, bo baleeli nde: «Mulongisi, bisu liyaabi ti we nga imbuli; we a hali na boomo bwa muutu tso mumosi ve, na we a hali mu utala baatu mu umono hwa miisu ve. Ka we bibaayaka mu ulongese nzila a Nzambi mu imbuli hyoosi. Baava muswa mu ufuta limandu huli Kayisaali? Hwafwana huli bisu mu ufuta vo naana?» 15Bu Yisu haaba haayaaba muwala a bo, nde aleeli bo: «Mu hima benu lili mu utehele me mweto? Behelaani me denye mumosi me mono nde.» 16Bo baabehili nde denye, na Yisu afuuli bo: «Hiinzi na bisono mo biniibi bya na?» Bo baafutili ti bya Kayisaali. 17Buuna, Yisu aleeli bo: «A ka! Futalaani huli Kayisaali bya Kayisaali, na huli Nzambi bya Nzambi.» Na bo baakimuhi mu tooni a mvutu a nde.

Hyuhu mu

Mty 22.23-33; Luk 20.27-40

18Basaduki ba bali mu usilasa ti a yili ve, baayamono Yisu na baafuuli nde: 19«Mulongisi, mono ma Moose haasonihi mu bisu: “Tso bahala likwiidi na lisiisi mukadi hwavele a mwana, mwana a ngu a nde sa akweele mukwili mo wuuna mana nde apalisa imbisa huli wu miikwa#Pfu 25.5,6 .” 20Kaahu hwaba na baana ba ngu tsambu ba babahala. Watsomi akweeli mukaasu na akwiidi hwavele usiisa imbisa. 21Waboole akweeli mukwili mo wuuna, na akwiidi hwavele usiisa imbisa. Ni bumosi kaka mu wu mutatu, 22na tso mumosi mu batsambu a hali wu asiisi imbisa ve. Ŋa mbisa a bo boosi, mukaasu kaka akwiidi. 23Mu ilumbu hya tsuuhili a babaakwa, ŋa babaakwa buusuuha, mukadi mo wuuna wa na huuba? Mu tooni ati bo batsambu baakweeli nde!» 24Yisu akaali bo: «Benu laamiidunga. Benu liyaabi mu hima? Mu tooni ati benu a lili mu utsikaha tso Mabasonehe ma Ngidi, tso matwala ma Nzambi ve. 25Ni mu buuna, ŋa babaakwa buusuuha, babahala na bakaasu a buubwekweelesene ve, ka bo buuba we bapofi hu mayulu#Mty 22.30; 1Yo 3.2 . 26Mu mamatali babaakwa ba buusuuha, benu a laataanga mu libuuku la Moose, ma Nzambi haaleeli nde ŋa pedu a saangi ve: “Me ni Nzambi a Abrahami, Nzambi a Isaki na Nzambi a Yakobi!” 27Nzambi, husiitisi Yisu, a hali Nzambi a babaakwa ve, ka nde Nzambi a ba bali moonyi. Benu laamiisinzadunga.»

Mukele wu afulala bunene

Mty 22.34-40; Luk 10.25-28

28Mumosi mu milongisi mi Mikele wu ayuhi bo mu usobosono minwya, na wu amoni ti Yisu afutili bo mvutu yimbwe, ayafuula Yisu: «Ki Mukele bibaayaka watsomi mu Mikele myosi?» 29Yisu afutili nde: «Watsomi ni wunuwu: “Yuha, Isereli! Pfumu Nzambi a bisu, bibaayaka ndulu Pfumu nde siha#Pfu 6.4. 30We afwana utondo Pfumu Nzambi a we mu mutima a we woosi, mu muvumu a we woosi, mu buyedi bwa we bwosi, na mu mufudi a we woosi#Pfu 6.4-5.” 31Wa myole ni wunuwu: “We afwana utondo muna a we, we we mwakulu#Lev 19.18.” A hu bibaayaka na Mukele mukima wu afulala mya myole miniimi bunene ve.» 32Mulongisi mikele aleeli nde: «Buuna ni bubwe, mulongisi! Ma we miileele ni ma mbuli: Nzambi ndulu nde siha bibaayaka, na a hu bibaayaka na Nzambi mukima ve ŋa yulu a nde#Pfu 4.35. 33Na ti utondo nde mu mutima a we woosi, mu buyedi bwa we bwosi, na mu mufudi a we woosi, na utondo muna a we, we we mwakulu, hwafulala tsoongo na bungodu bwosi bwa tsuhili banyama#Ose 6.6 buuve uva nde bungodu bukima.» 34Bu Yisu haamoni ti nde akaali bu hwafwana, aleeli nde: «We a hali lala na Ipfumu hya Nzambi ve.» Na muutu tso mumosi a haabwebila nde byuhu uva ve.

Kristo na Davidi

Mty 22.41-46; Luk 20.41-44

35Bu Yisu haakalongese mu nzo a Nzambi, nde aviidi hyuhu mo hiniihi: «Buni milongisi mi Mikele myutwala uleele ti Masiya mwana Davidi ali? 36Davidi nde mwakulu hutso Livupu la Ngidi aleeli:

“Pfumu miileele huli Pfumu a me:

Tsahala ŋa mbahala a me,

natee bu me utsuusa baboho ba we hu tsina a miilu mya we#1Ko 15.25 .”

37Davidi nde mwakulu bibaayaka mu uteele nde “Pfumu”: ka nde buni huuba mwana a nde?»

Koonge a baatu ba balahi, yaakayuha Yisu na kinya yoosi.

Yisu miisyembe milongisi mi Mikele

Mty 23.1-36; Luk 20.45-47

38Mu ndongisili a nde, nde akaleele bo: «Kebaani na milongisi mi Mikele. Bo baatondo ubaadyengele na miroopo mi mila, na ubaatondo ti babwehe bo mu matandala ma mikungi. 39Bo ubaasoolo bitsiha bya busu mu manzo ma masambulu ma Bayudaayo, na mambuha ma muyusu mu mikungi mya byudya. 40Bo ni ubaataana manzo ma bakwili, na mu usaha umonehele, bo bali mu usa masambulu ma mala. Bo sa bayaka tsundusu yi yaafulala bunono#Mty 23.14; Luk 20.27; Tit 1.11 !»

Bungodu bu mukwili wu iyaha

Luk 21.1-4

41Bu Yisu haaba haatsahala mu nzo a Nzambi ŋa busu bu itunga hi bungodu, nde akamono buni koonge a baatu yaakabwaha mbongo. Bisina bi bilahi byakasuusa mbongo yindahi#Luk 21.1; 2Pf 12.9 . 42Mukwili wu iyaha mumosi kaka ayidi, na asuusi mwa bimbombongo byole, bya talu ya hoole. 43Buuna Yisu ateeli bayihi ba nde na aleeli bo: «Mu mbuli me ndi mu undeele benu, mukwili mo wunuuwu wu iyaha, miisuusa hu hwafulala boosi ba bali mu usuusa mutso itunga. 44Mu tooni ati, bana boosi baviidi bongo yi yaabwevele na tsoongo huli bo; ka nde, hutso buyaha bwa nde, viidi byosi bi nde abeedi na byo, byosi bi nde akiisalila mu idiingu hya nde.»

Currently Selected:

Malako 12: TSA

Highlight

Copy

Compare