Malako 14

Pfuundu yimbi mu tooni a Yisu

Mty 26.1-5; Luk 22.1-2; Yow 11.45-53

1Bilumbu byole byaba byamiisaala mu uto mu mukungi a Paake na wu mapa ma maaveledaana#Pal 12.1-27 . Bakuutu ba bangaanga ba Nzambi na milongisi mi Mikele baakasaha nzila yi ukaanga Yisu mu dyeele na uduba nde. 2Ni mu buuna, bo baakaleele: «A luusaani buuna mu taangu mukungi ve, kini baatu buusa tudu.»

Mukaasu miipuupala Yisu nyafi ŋa yulu mutswe

Mty 26.6-13; Yow 12.1-8

3Yisu aba hu musyenge a Betanya, hu nzo a Simoni nga bwatsi. Bu nde haaba haatsahala ŋa metse, mukaasu mumosi akoti na itutu hya alabatere#14.3 alabatereItutu hibaavaanga mu manya bibaayaka lifuuka. hi hyaluula mu nyafi ya mu nare#14.3 nare maadi ma tsulu yimbwembwe ma bubaakamuna mu makaya. Ni mu maadi mo maana bubaavaanga nyafi. ya mbuli ya talu yindahi. Mukaasu adibuli itutu na apuupili nyafi ŋa yulu mutswe a Yisu. 4Bamosi ŋa hati la ba baaba ŋaana, baanyongi: «Ki tooni mu ubiiyasa nyafi mo yiniiyi? 5Bakiisuumbasa yo mu talu yi yaafulala makama matatu ma badenye na uva mbongo mo yiina huli bapuumbu!» Bo baakapamina mukaasu mo wunuwu hu unono. 6Ka Yisu aleeli: «Nyahaani nde. Mu hima benu lili mu ukwamisa nde? Ma nde amiivangila me, maafulala bubwe. 7Mu tooni ati, benu luuba na bapuumbu taangu yoosi#Pfu 15.11, na pasi taangu yi benu litoondi, benu utwala uvangila bo libwe; ka uto ti me, benu a luuba na me taangu yoosi ve. 8Nde miivaanga bibaayaka nde atwali uvaanga: nde miiteehele upuupala nyutu a me nyafi, mu uvangimasa yo mu tooni a ndiihili a me. 9Mu mbuli me ndeele benu: pasi tsyelo yi buukaayabisa Musamu wu Mubwe, mu toto yoosi, buukaayambila mu mukaasu mo wunuwu na buukaayibwala moonyi mu ma nde amiivaanga.»

Yuda li mu usaha buni nde huuyeholo Yisu

Mty 26.14-16; Luk 22.3-6

10Yuda Isikaryoti, mumosi mu bakuumi na boole bibaayaka bayihi, ayamono bakuutu ba bangaanga ba Nzambi mu uyeholo bo Yisu. 11Bu baayuhi dyambu mo liina, bo baamoni kinya na baasiidi nde lahi bibaayaka uva nde mbongo. Umata buuna, Yuda akasaha buni nde huuyeholo bo Yisu mu taangu yi yaafwana.

Bayihi ba Yisu bali mu uvangimasa ilaambu hya Paake

Mty 26.17-19; Luk 22.7-13

12Ilumbu hyatsomi hi mukungi wu mapa ma maaveledaana, ilumbu hi baakayeholo mameme mu tooni a Paake, bayihi ba Yisu baafuuli nde: «Huni we toondi ti bisu liyavangimasa we ilaambu hi we udya mu Paake?» 13Buuna, Yisu miitsindaha bayihi ba nde boole na uleele bo: «Yenaani hu musyenge, muutu mumosi uyaabwana benu, akaanga lisanga bibaayaka laaluula mu mamba. Duukalaani nde. 14Na hu nde huukoto, leelaani huli nga nzo: “Mulongisi miituma bisu mu uleele we: Itini hya nzo hi me undya ilaambu hya Paake na bayihi ba me huni hili?” 15Nde umweese benu hu yulu ibaanga hya nzo, itini hya nzo imosi hiinene, hi baamiivangimasa nzyeni na byosi bi buusalila. Ni muuna benu luusa pangimini a bisu a benu.» 16Bayihi baayeni na baatoodi hu musyenge. Bo baabiisi moosi we bu Yisu haaleeli bo. Na bo baavangimisi ilaambu hya Paake.

Yisu bibaayaka mu udya ilaambu hya Paake na bayihi ba nde

Mty 26.20-30; Luk 22.14-23; Yow 13.21-26; 1Ko 11.23-25

17Bu tsitsaha yaatoodi, Yisu ayidi na bayihi bakuumi na boole. 18Bu bo baabeedi ŋa metse na bu bo baakadya, Yisu aleeli: «Mu mbuli me ndeele benu: mumosi mu benu wu bibaayaka mu udya na me sa ayeholo me#Mkg 41.10; Mav 1.17 .» 19Bayihi baabahi lingebe, na bo baabaandihi ufuula nde mumosi mumosi: «Ni me?» 20Yisu aleeli bo: «Ni mumosi mu benu, mumosi mu bakuumi na boole, nde wuuna wu bibaayaka mu upfuuta myoho mu ikoombe na me#Mkg 41.10. 21Eye, Mwana a muutu mu ukwa ali, we bu Mabasonehe mali mu uyabisa#Mkg 22.2-19; Esa 53. Ka ki pila a tsingiili huli wu bibaayaka mu uyeholo Mwana a muutu! Beedi kini bubwe mu muutu mo wuuna, avelebutama hwa nde.»

22Bu bo baaba mu udya, Yisu avoli lipa na, hu mbisa ufutala matondo huli Nzambi, nde atabuli lo, akabi lo na aviidi lo huli bayihi ba nde na aleeli: «Volwaani, yiniiyi ni nyutu a me#Mty 26.26; Luk 22.19; 1Ko 11.23 .» 23Titswene, nde avoli mbuungu, hu mbisa ufutala matondo huli Nzambi, nde aviidi bo yo, na bo baanywidi bo boosi. 24Yisu aleeli bo: «Maniima ni makila ma me, makila ma Nzuhisini yi Nyatihi#Pal 24.8; Yel 31.31-34 , ma maatsamuhi mu tooni a baatu ba balahi. 25Mu mbuli me ndeele benu: Me a umbwenywa vinye ve, natee ilumbu hi me unywa yo yi nyatihi, hutso Ipfumu hya Nzambi.» 26Titswene, bo baayimbi mikuunga mi mukungi#Mty 26.30, bo baayeni hu isyelo hi miti mya Olive.

Yisu bibaayaka mu uyabisa ti Peetelo utuna nde

Mty 26.31-35; Luk 22.31-34; Yow 13.36-38

27Yisu aleeli huli bayihi ba nde: «Benu boosi sa litiimba me, mu tooni ati, baasonehe: “Me utete keedi mameme, na mameme muutsaamuha#Zak 13.7”. 28Ka me utsuuha mu babaakwa, me uteehele benu hu Ngalili.» 29Peetelo aleeli nde: «Tso bana boosi batiimbi we, me, me a utiimba we ve!» 30Yisu akaali nde: «Mu mbuli me ndeele we: lolo yiniiyi, ndulu butsuhu mo bunuubu, tswamina tsusu akohele kohele yoole, we, we utuna me tunala tatu.» 31Ka Peetelo akasinzaleele: «Tso hili ti me kwa itwadi na we, ubila ve, me utwala utuna we ve!» Na bayihi bana boosi baakaleele bumosi.

Yisu miiyasambila hu Ngetesemani

Mty 26.36-46; Luk 22.39-46

32Titswene, bo baabweto ŋa mbuha mosi yi bubaateele Ngetesemani, na Yisu aleeli huli bayihi ba nde: «Tsahalaani ŋaniiŋa, mu taangu yi me unzatsambila.» 33Nde abiti itwadi na nde Peetelo, Yaki na Yowani. Yisu abaandihi ukimuha na umono mangoongo, 34na nde aleeli bo: «Muvumu a me amiiluula mu lingebe natee huukwa; tsahalaani ŋaniiŋa, na baani likanda!» 35Nde asusihi hoole hu lala; abwidi ŋa toto na akasambila mana, tso huyelimini, ngunga mapasi yiniiyi, yitahuha lala na nde. 36Nde akaleele: «Aba, Taata#14.36 Aba Mbindulili mu ndaha ba Arameyene ti: Taata, buuve, o taata a me.: we ubaatwala moosi; tahusa mbuungu mapasi mo yiniiyi lala na me. Ka, a bu me miitoodo ve, bu we miitondo.» 37Nde ayafutaha huli bayihi ba nde na ayabiisa bo tolo. Yisu aleeli huli Peetelo: «Simoni, we aka tolo? We a haabaha mifudi mi uba likanda tso mu ngunga mosi ve? 38Baani likanda na sambilaani, mana benu a libwa mu malobese. Iluunzi hili hi hyahwada, ka imuutu hili hi hyakolo.»

39Nde abwetahuha na asambili mu ubaafutahala mambu ni mo mamosi. 40Titswene, nde abweyafutaha huli bayihi, na abiisi bo boosi baabwaamina; Miisu ma bo abeedi maaleme. Na bo a baabahi dyambu bibaayaka ukaala nde ve. 41Ŋa nde haayafutaha futaha bibaayaka matatu, Yisu aleeli bo: «Benu likini tolo, benu uvuuma lili mu uvuuma? Limiifwa! Ngunga yimiito. Bunuubu, Mwana a muutu bamiiyeholo ŋa myoho mya banga masumu. 42Telemaani, tswendaani! Monwaani muutu wu uyeholo me aka bebele!»

Yisu bamiikaanga

Mty 26.47-56; Luk 22.47-53; Yow 18.3-12

43Bu Yisu haaba kini mu utoyo, Yuda, mumosi mu bakuumi na boole bibaayaka bayihi ayidi. Ŋa mbisa a nde, hwaba na koonge balwani na basabila mu myoho, na bimbondi. Bakuutu ba bangaanga ba Nzambi na milongisi mi Mikele na mikukunyungu, ni ba baatsindihi bo. 44Yuda, wu akayeholo Yisu, amweesi bo iliimbu hi huusalila: «Wuuna wu me umbuumba, wuuna ni nde; kaangaani nde na bitaani nde hutso a keelisili yimbwe.» 45Bu Yuda haayidi, nde ayasusaha huli Yisu na aleeli nde: «Rabi!» Na nde abuumbi nde. 46Buuna bakima baabwiili na baakaangi nde. 47Ka mumosi mu ba baabeedi ŋaana, aduti sabila a nde, ateti musalili a mukuutu bangaanga ba Nzambi, na akesi nde tswi. 48Yisu aleeli bo: «Me kaahu mudubi me ndi, bu benu luuya na basabila na bimbondi mu uyakaanga me? 49Bilumbu byosi, me mbeedi ŋa hati la benu na me kambaandongese mu nzo a Nzambi, benu a laakaangi me ve. Ka maana mali mu uyiila, mana Mabasonehe ma Ngidi matswiiha.» 50Na bayihi boosi baatiimbi nde na baabati. 51Mupfudu-mbahala mumosi akaduukala Yisu. Nde aba alwata ndulu lileeso la mu lino. Baayehili ukaanga nde, 52ka nde anyahula lileeso, nde abati pene yi imbutala-ngu.

Yisu ŋa busu bwa pfuundu lituma bibaayaka bangaanga ba Nzambi

Mty 26.57-68; Luk 22.54-55; 22.63-71; Yow 18.13-14; 18.19-24

53Bo baabiti Yisu huli mukuutu bangaanga ba Nzambi, hu hwakuukimi bangaanga ba Nzambi boosi, mikukunyungu na milongisi mi Mikele. 54Peetelo akaduukala Yisu hu lala, natee hu hati litandala la nzo a mukuutu bangaanga ba Nzambi. Nde atsahili na bakeedi na nde akayoto mbaahu.

55Bakuutu ba bangaanga ba Nzambi na pfuundu lituma yoosi, baakasaha imbangi hi hyumweese tooni yi uduba Yisu. Ka bo a baabahi ve. 56Mu tooni ati, baatu ba balahi baakava bimbangi bi mapfuta mu nde#Mkg 27.12; 35.11, ka byo byakatungasana byo mwakulu. 57Mwana a baatu bakima baatelimi na baaviidi imbangi hi mapfuta hiniihi mu nde: 58«Bisu laayuha nde mu uleele ti: “Me utsala nzo a Nzambi mo yiniiyi yi baatuunga mu myoho mya baatu, na mu bilumbu bitatu, me utuunga kima yi yiuveleba vaanga la myoho mya baatu#Yow 2.19-21 .”» 59Ka tso mu mukuma mo wuuna, bo baakatungasana. 60Buuna, mukuutu bangaanga ba Nzambi atelimi ŋa kuungi, na afuuli Yisu: «We a hali mu ukaala pasi lo ve? Lima we leeli, mu bimbangi bi baatu bali mu uta mu we biniibi?» 61Ka Yisu abeedi swii, nde a haafutili dyambu ve. Mukuutu bangaanga ba Nzambi abwefuula nde: «We ni Masiya, Mwana a wu baasyeme#Esa 53.7; Mav 8.32 ?» 62Yisu akaali: «Eye, ni me! Na benu luumono Mwana a muutu atsahala ŋa mbahala a Pungu Matwala na uya hutso mayidu ma yulu.» 63Buuna mukuutu bangaanga ba Nzambi akasuli bikutu bya nde mwakulu na aleeli: «Bisu a lisaali na nzala bambangi ve! 64Benu limiiyuha nde mu utuha Nzambi! Benu buni litsimi?» Boosi baakabelese nde, na baakaleele ti lipfu#Lev 24.16 laahwama na nde. 65Titswene, mwana a baatu bakima baabaandihi utuula nde maate. Bo baapfubihi nde hiinzi, baateti nde makome na ubaaleele: «Sa bumbihuli, dihula na miitete we!» Bakeedi baavoli Yisu na baateti nde mapali#Yob 16.10; Esa 50.6; Yow 19.3 .

Peetelo miituna Yisu

Mty 26.69-75; Luk 22.54-62; Yow 18.15-18; 18.25-27

66Peetelo aba kini hu tsina hu litandala, ŋa musalili wu mukaasu mumosi wu mukuutu bangaanga ba Nzambi haayidi. 67Nde miimono Peetelo mu uyoto mbaahu, nde miidihula nde, na miileele nde: «We kaka, we beedi na Yisu musi Nazareti.» 68Peetelo atuni na aleeli: «Me a hanzaabi bibaayaka we bibaayaka mu ukana uleele ve, me a handi mu utsikaha ve.» Titswene, nde amati ŋa mukoho a mbaahu, mu uyene hu mbadi. [Buuna tsusu akohili.] 69Ka musalili wu mukaasu amoni nde na abwefutahala uleele ŋa busu bwa ba baabeedi ŋaana: «Bahala mo liniili mumosi mu bo ali!» 70Na Peetelo abwetuna. Mwana a taangu hoole, ba baabeedi ŋaana baabweleele huli Peetelo: «Ni mbuli, we bibaayaka mumosi mu baatu mo baana, mu tooni ati, we kaka musi Ngalili.» 71Buuna Peetelo abaandihi ufulaha: «Nyaha Nzambi asyembe me tso me ndi mu upfuta! Mu mbuli a Nzambi, me a hanzaabi muutu wu benu lili mu uyambila mu nde ve.» 72Masulubete, tsusu akohili kohele la moole, na Peetelo ayibuhili moonyi mu mambu ma Yisu haaleeli nde: «Tswamina tsusu akohele kohele yoole, we utuna me tunala tatu.» Mu tsimi mo yiina, Peetelo abaandihi ulila.

Currently Selected:

Malako 14: TSA

Highlight

Copy

Compare