Mataayi 15

Ndongisili mu bukulu bu Bafarisi

Mlk 7.1-23

1Bafarisi na milongisi mi Mikele baamati hu Yeruselemi mu uyamono Yisu na ufuula nde: 2«Mu hima bayihi ba we bali mu uvelekiinza bukulu bu bwasiisa bakuutu ba bisu? Mu tooni ati, bo a bubaaswaha makaka ma bo, we bu hu li bukulu, teehele mu dya ve.» 3Yisu afutili bo: «Ka benu, mu hima benu libaavelesiingala matumili ma Nzambi mu ubaaduukala bukulu bwa benu? 4Mu tooni ati, Nzambi aleele: “Kiinza taata a we na ngu a we”, na: “Woosi wu usinga taata a nde buuve ngu a nde, sa basyembe nde mu tsyembili lipfu.” 5Ka benu, benu lili mu uleele huli muutu: “We na muswa wu uleele huli taata a we buuve huli ngu a we ti, kabu li me kiipa we mu ukumbasa we, ni bungodu bu me ataasila mu uva Nzambi”. 6Na benu lili mu uva muswa huli muutu mo wuuna, mu ubwevelekiinza taata a nde. Buuna, benu libaamaasa mambu ma Nzambi mu usalila we bu hu li bukulu bwa benu! 7Benu banga muwala lili! Esaya aba na mbiinga ŋa nde habihuli bubwe mu tooni a benu:

8“Baatu mo baniiba bubaayuusa me mu bibodu,

ka mitima mya bo myasinzatahuha na me.

9Baatu mo baniiba mu pu bali mu ukuunda me,

ndongisili yi bo bali mu ulongese yili ndulu matumili ma baatu baasuunda#Esa 29.13.”»

10Titswene, Yisu ateeli koonge a baatu na aleeli bo: «Yuhaani na tsikahaani bubwe: 11A hi hibaakoto mu munywa a muutu hibaasumana nde ve. Ka hi hili mu upala mu muutu, hiina ni hi hili mu usumana nde.» 12Ni mu buuna, bayihi ba Yisu baayasusaha na baaleeli nde: «We yaabi ti Bafarisi bamiisinzaduka bu bayuhi we mu utoyo buuna?» 13Nde afutili: «Bubaatupala pasi musumana wu Taata a me wu li hu yulu haavelekuna. 14Nyahaani bo, bo bali binzimana bi bili mu ubita binzimana! Ka tso inzimana hibiti inzimana na nde, bo baboole sa babwa hutso iyuna.» 15Peetelo aleeli Yisu: «Bindula bisu tsiki a kuma mo yiniiyi.» 16Yisu ni uleele: «Benu kaka kaahu kini a laatsikaha ve? 17Benu a lili mu utsikaha ve ti, byosi bi bibaakoto mu munywa a muutu bi baavyohele mu moonyi a nde, titswene byo bipali mu nyutu a nde? 18Ka bi bibaapala mu munywa, bibaamata hutso mutima, na ni byo bibaasumana muutu. 19Mu tooni ati, ni hu hati mutima a muutu hubaapala matsimi ma mabi, ma mu baabita hu uduba, hu mayamba, hu bulaala, hu yiba, hu mapfuta, na hu bituhi. 20Biniibi byosi, ni bi bibaasumana muutu. Ka udya byudya hwavele uswaha makaka, we bu hu li bukulu, a hubaasumana muutu ve.»

Mukaasu a mwenyi miisa imiinu mu Yisu

Mlk 7.24-30

21Titswene, Yisu amati ŋaana na ayeni hu tsi a Tiiro na hu tsi a Sidoni. 22Na buunubu, mukaasu a Kaana mumosi wu akatsahala hu itaanzi mo hiina, ayidi huli Yisu na afulihi: «Pfumu, Mwana a Davidi, kwila me lingebe! Mwana a me wu mukaasu, tengo lamiikaanga nde na lo lili mu unyongese nde mu iteesi hi inono!» 23Ka Yisu a hafutili nde dyambu ve. Bayihi ba nde baayasusaha ŋa pedu a nde na uleele nde: «Binga nde, mu tooni ati, nde li mu usinzafulaha hu mbisa a bisu a benu.» 24Yisu afutili: «Baatsindaha me ndulu huli mameme ma maadimbala ma buli la Isereli.»

25Ka mukaasu ayaakongemene ŋa busu bwa Yisu na aleeli: «Pfumu, kumbasa me!» 26Yisu afutili: «A hu li bubwe mu uvolo lipa la baana na ubuma lo huli bamvwa ve.» 27Mukaasu afutili nde: «Pfumu, mumbuli, ka bamvwa kaka bubaadya bipepesi bi bibaabwa hu tsina a metse ma bapfumu ba bo.» 28Buuna Yisu afutili nde: «Mukaasu! Imiinu hya we hili hiinene! Nyaha buba we bu we tondi.» Na mu taangu mo yiina, mwana a nde wu mukaasu abeeluhi.

Yisu miibeeloso babeedu ba balahi

29Yisu amati ŋaana na ayeni hu simu la dyanga la Ngalili. Nde akumisi ŋa yulu isyelo na atsahili. 30Makonge ma baatu maayidi huli nde. Bo baabehi bikata, binzimana, banga matsode, biduka, na babeedu bakima ba balahi. Baayasuusa bo ŋa miilu mya Yisu, na nde abeelusi bo. 31Ni mu buuna baatu baakimuhi hu ulahi, bu bo baamoni biduka mu utoyo, banga bipiha mu ubeeloho, banga matsode mu uyene bu hwasungama, binzimana mu umono, na bo baayuusi Nzambi a Isereli.

Yisu miibuungala koonge a baatu kima yinene

Mlk 8.1-10

32Titswene, Yisu ateeli bayihi ba nde na aleeli: «Me ndi mu umono lingebe mu tooni a baatu mo baniiba. Lolo yiniiyi huka bilumbu bitatu bi bo bali mu ukwilala na me, na bo a bali na tso isiha hyudya ve. Tso me pfutili bo mu manzo ma bo nzala, bo buukolo binama mu nzila.» 33Bayihi baafuuli nde: «Huni bisu luutwala ubaha mapa ma uywatisa koonge mo yiiniyi yoosi ŋa ibiingi hi ive na ive hiniihi?» 34Yisu afuuli bo: «Mapa kwe benu lili na mo?» Bo baafutili: «Tsambu, na mwana a batswi ba bakeehe.» 35Nde atumisi koonge a baatu mu utsahala ŋa toto. 36Titswene, hu mbisa uvolo mapa matsambu na batswi Yisu afutili matondo huli Nzambi. Nde atabuli mapa, akabi na aviidi mo huli bayihi ba nde mu ukabila huli boosi. 37Baatu baadiidi na baaywati. Na baatoli byebe tsambu bi byaluuli mu bitini bi byasalili. 38Baatu ba baadiidi mapa na batswi, aba bebele biveeve bina (4 000) bi babahala, hwavele utanga bakaasu na baana. 39Bu nde haamani ufutala baatu mo baana boosi, Yisu avaati mu hyabu, na ayeni hu tsi a Mangadani.

Currently Selected:

Mataayi 15: TSA

Highlight

Copy

Compare