Mataayi 14

Lipfu la Yowani mutondihi

Mlk 6.14-29; Luk 9.7-9

1Mu taangu mo yiina, Eloode Atipasi wu akatuma itaanzi hya Ngalili ayuhi tsangu a Yisu. 2Nde aleeli huli basalili ba nde: «Muutu mo wuuna ni Yowani mutondihi, nde amiisuuha mu tsi a babakwa. Ni mu buuna, nde ali na matwala ma uvanga bipadi.»

3Mono buni Eloode haatsindihi baatu mu ukaanga Yowani. Nde atumi bahada Yowani mapaanga na ukotese nde mu kondaayi. Nde haasiidi buuna, mu tooni a Elodyadi, wu Eloode haapatuli mu ukwele tso bu nde haaba mukadi a mwana a tata a nde Filipo#Mlk 6.17. 4Yowani akaleele Eloode ti: «A baava we muswa wu ukwele Elodyadi ve#Lev 18.16; 20.21!» 5Eloode akasaha uduba Yowani. Ka nde aba na boomo bwa konge Bayudaayo, mu tooni ati boosi baakamono Yowani we mumbihuli. 6Mu mukungi wu ilumbu hya mbutili a Eloode, mwana a Elodyadi wu mukaasu, akini ŋa busu bwa byenyi. Nde amweesi Eloode kinya. 7Ni buuna, nde hasiidi lahi la na mulabu huli mwana a Elodyadi mu uva nde pasi iloho hi nde huvondo. 8Mu ndoongi a ngu a nde, nuumba aleeli Eloode: «Behele me mutswe a Yowani mutondihi ŋa yulu ikoombe mo hiinihi#14.8 Mu bukulu bwa bisu Looma, ukeese mutswe aba iteesi hi hyaba hyayabahana mu uduba muutu. Elodyadi atoondi ti mutswe basuusa ŋa yulu ikoombe, mana bayaaba ti Yowani baadubi. Titswene mutswe baafwana ubuma.!» 9Mutumi amoni lingebe mu hi mwana haavondi. Ka mu tooni milabu mi nde hasiidi ŋa busu bwa byenyi, Eloode atumi ti babehele nuumba mutswe. 10Eloode atsindihi muutu mu uyakese mutswe a Yowani Mutondihi hutso a kondaayi. 11Baabehi mutswe a nde ŋa yulu ikoombe na baaviidi huli nuumba, wu ayava nde huli ngu a nde. 12Bayihi ba Yowani baayavolo nyutu a nde na baayadiiha. Titswene, bo baayeni mu uyayabisa Yisu moosi ma maavyohi.

Yisu miibuungala koonge a baatu yinene

Mlk 6.30-44; Luk 9.10-17

13Bu Yisu haayuhi tsangu mo yiina, nde amati ŋaana mu hyabu mu uyene ŋa muvanga nde siha ŋa mbuha yi ive na ive. Ka bu koonge a baatu yaayuhi musamu, yo yaapali mu mala ma bebele na yaaduukili nde mu miilu mu muvanga a dyanga. 14Bu Yisu hapali mu hyabu, nde amoni koonge a baatu yinene, nde aluuli mu lingebe mu tooni a bo, na abeelusi babeedu ba bo. 15Bu busi bwaba bwaka beleve, bayihi ba Yisu baayasusaha ŋa pedu a nde na baaleeli nde: «Busi bwamiiyila, na mbuha mo yiniiyi yi ive na ive. Futala baatu mo baniiba, bayene mu mala ma ibiingi mo hiniihi, mana bo bayasuumba byudya.» 16Yisu afutili: «Bo a bali na nzala umata ŋaaniŋa ve, vaani bo byudya benu mwakulu!» 17Ka bayihi baafutili nde: « Ŋaaniŋa, bisu lili ndulu na mapa mataanu na batswi boole.» 18Yesu aleeli bo: «Behelaani me byo.» 19Titswene, nde atumi koonge a baatu mu utsahala ŋa yulu a biimbu. Nde avoli mapa ma mataanu na batswi baboole, asuuli miisu hu yulu na afutili matondo huli Nzambi. Titswene, nde atabuli mapa na aviidi mo huli bayihi, na bayihi baakabili mo huli koonge a baatu. 20Boosi badiidi na baaywati. Na bayihi baatoli bitini bi mapa bi byasalili. Baaluusi byebe kuumi na byole. 21Ba baadiidi baatoodi bebele biveeve bitaanu bi babahala (5 000), hwavele utanga bakaasu na baana.

Yisu li mu uyene ŋa yulu a mamba mu miilu

Mlk 6.45-56; Yow 6.16-21

22Masulubete, Yisu atumi bayihi ba nde mu ukoto mutso a hyabu na utswamina hu simu lina. Bu nde haba kini mu ufutala koonge a baatu. 23Bu nde haamani ufutala baatu boosi, nde akumisi hu yulu isyelo mu usambila. Bu tsitsaha yaatoodi, Yisu asaali nde siha ŋaana. 24Hyabu hyaba hyaka lala na simu. Mapo maakanyingasa hyabu na ifula hyakayabwana bo. 25Hu mikyakya, Yisu ayeni hu tsyelo bayihi ba nde, mu miilu ŋa yulu a mamba. 26Ŋa bayihi baamoni nde mu uyene ŋa yulu a mamba, boomo bwakaangi bo, na baaleeli: «Wunuuwu mukuyi!» Bo baabandihi ufulaha mu tsisu. 27Masulubete, Yisu aleeli bo: «Hwadaani, wunuuwu me, a liba na boomo ve!» 28Peetelo abaandihi uyambila na uleele nde: «Pfumu, umono ti wunuuwu ni we, tumasa me mu uya huli we ŋa yulu a mamba.» 29Yisu aleeli: «Yaanga!» Peetelo apali mu hyabu na ayeni ŋa yulu a mamba huli Yisu. 30Ka bu nde hamoni ti ifula aba hyafulala mifudi, nde amoni boomo. Na bu nde habandihi udyama, nde afulihi: «Pfumu, fuuhasa me!» 31Mu mawasa, Yisu alabi kaka na akaangi nde na aleeli: «Muutu nga imiinu hi ikeehe, mu hima we siidi paha?» 32Bo baakoti bo baboole mu hyabu, na ifula hyavudimini. 33Buuna, bayihi ba baaba mutso a hyabu baakongimini ŋa busu bwa Yisu na baaleeli: «Mu mbuli we li Mwana a Nzambi!»

Yisu miibeeloso babeedu hu Ngenezareti

34Hu mbisa a tsabuhili a dyanga, bo baatoodi hu itaanzi hya Ngenezareti#Mlk 6.53. 35Baatu ba mbuha mo yiina baadihuli Yisu, na baayabisi tsangu a nziili a nde mu ibiingi mo hiina hyoosi. Buuna, baabehili nde babeedu boosi. 36Bo baakayayaana Yisu mu unyaha ti babeedu babeleene tso tsoso ikutu hya nde. Na boosi ba baakabeembe nde, baabeeluhi.

Currently Selected:

Mataayi 14: TSA

Highlight

Copy

Compare