Mataayi 13

Yisu li mu ulongese mu makuma

13.1-52

Kuma mukuni

Mlk 4.1-20; Luk 8.4-15

1Ilumbu mo hiina, Yisu apali mu nzo na ayatsahala ŋa muvanga a dyanga mu ulongese. 2Koonge a baatu yinene yaayadiinga nde. Ni mu buuna, nde haakoti na haatsahili mutso a hyabu ŋa yulu a dyanga. Na koonge yoosi yaaba ŋa simu la dyanga. 3Nde akayambila na bo mu mambu ma malahi mu makuma, na nde aleeli: «Ilumbu imoosi, mukuni apali mu unyanza muhunu. 4Bu nde haakanyanza mbutu, mbutu yina yaabwiidi mu muvaanga musoho, banyunyi baayidi na baadiidi yo. 5Mbutu kima yaabwiidi ŋa yulu a toto mamanya, hu hwaba hwavele na toto yindahi. Mbutu yaameni mawasa, mu tooni ati, toto a yaaba na pfifi ve. 6Bu nyangu haabeengi, nde anyengisi mitswihala, na myo myakanyi mu tooni a vele li manganzi. 7Mbutu kima yaabwiidi ŋatso bangamba#13.7 bangamba miti mi matsyende.. Bo baabuuhi na baavinyili mitswihala mi myakapala. 8Ka mbutu kima yaabwiidi ŋa toto a mbolese. Mitswiihala myabuuhi, myarandi na myapalisi bisaka. Isaka imosi hyaviidi kama (100) la mbutu, hina maku masamunu (60), na bina maku matatu (30).» 9Na Yisu aleeli: «Muutu nga matswi, nyaha ayuha!»

Tooni yi Yisu ali mu usalila makuma

Mlk 4.10-12; Luk 8.9-10

10Bayihi ba Yisu baayasusaha na baafuuli nde: «Mu hima we li mu utoyo na bo mu makuma?» 11Yisu afutili bo: «Huli benu, Nzambi amiiva bungodu bu uyaaba matswehi ma Ipfumu hi mayulu, ka a huli bo ve. 12Ni mu buuna, muutu wu li na isiha, buubweva nde bi byafulala, na nde uba na bi byafulala. Ka huli wu avele na isiha, buumaasa nde tso hi nde ali na hyo. 13Ni mu buuna, me umbanzambila na bo mu makuma: Mu tooni ati, bo bali mu usungamana, hwavele umono. Bo bali mu uyuha, hwavele uyuha na hwavele utsikaha. 14Na huli bo, ma maaleeli mumbihuli Esaya mamiitswiha:

“Benu sa liyuha bubwe, ka benu a luutsikaha ve.

Benu sa lisungamana bubwe, ka benu a luumono ve.

15Eye, mitima mya baatu mo baniba myaka mi minono.

Bo baamiidibuha matswi,

bo baamiidibuha miisu,

mana bo bavelemono mu miisu mya bo,

bo baveleyuha mu matswi ma bo,

bo baveletsikaha mu mitima mya bo.

Ni buuna bo buubwevelesobo mbiili, mana me a hambeeloso bo#Esa 6.9-10.”»

16Yisu abweleele: «Ka benu, kinya huli benu bu miisu ma benu mali mu umono na matswi ma benu mali mu uyuha! 17Mu mbuli me ndi mu undeele benu, mimbihuli mi milahi na baatu ba butsiitsa baatondi umono ma benu lili mu umono, ka bo a baamoni mo ve. Bo baatondi kaka uyuha ma benu lili mu uyuha, ka bo a baayuhi mo ve#1Pe 1.10-12.»

Yisu li mu ubindula kuma mukuni

Mlk 4.13-20; Luk 8.11-15

18Yisu abweleele: «Yuhaani mbindulili a kuma a mukuni. 19Baatu ba bubaayuha mambu ma Ipfumu hi mayulu, na ubaaveletsikaha mo, bo bali ŋa muvanga a luuha hu mbutu yabwiidi. Nga Bubi ubaayamasa mambu ma bamiikuna mu mitima mya bo. 20Baatu bakima bali we toto mamanya hu mbutu yaabwidi. Bo bubaayuha mambu ma Nzambi na babaayaka mo mawasa na kinya yoosi. 21Ka abubaanyaha ti mo mameni manganzi mu mitima mya bo ve. Mu taangu a pasi na ya mbingisili, mu tooni a mambu ma Nzambi, bo ni ubaabwisa imiinu. 22Baatu bakima kaka bali we toto ya na bangamba hu mbutu yaabwiidi ŋatso matsyende. Bo bubaayuha mambu ma Nzambi, ka minyongo mu tooni a mambu ma tsi, soho li busina na makinya ma tsi, bibaavinyala mambu ma Nzambi, buuna mo utwala ubuta mbutu ve. 23Hu tsyelele, baatu bakima bamiiyaka mbutu mu toto a mbolese. Bo bali mu uyuha mambu na bali mu utsikaha; bo bali mu ubuta mbutu, mumosi kama (100), mukima maku masamunu (60) na mukima maku matatu (30).»

Kuma a hiimbu hi ibi

24Yisu abweta bo kuma kima na aleeli: «Ipfumu hi mayulu hyafwanina na muutu wu akuni muhunu wu mubwe mu ngundu a nde. 25Ŋa butsuhu, bu baatu bamiibwamina, muboho a nde ayidi mu ukuna muhunu wu mubi ŋatso a mbutu a bele, na ayeni. 26Bu mitswihala myakuli na myaviidi mbutu, biimbu bi bibi kaka byameni. 27Basalili ba mukuutu a nzo baayaleele nde: “Pfumu, we akuni muhunu wu mubwe mu ngundu a we. Ka biimbu bi bibi mo biniibi huni bimiimata?” 28Nde afutili bo: “Ni muboho asa buuna.” Basalili baafuuli nde: “We tondi ti bisu liyaatuupala biimbu bi bibi?” 29Pfumu afutili bo: “naana, mana ŋa benu luutuupala byo, benu alituupala kaka bele. 30Nyahaani byosi bikula nzila moosi, natee mu taangu yi ukuukaha, na mu taangu mo yiina, me tsa ndeele huli bakuukihi: Maatuupalaani biimbu bi bibi, na kutaani byo mu biko mana batsuha byo. Titswene, benu likotese muhunu a bele hutso isyengi hya me.”»

Kuma a libutu li mutade

Mlk 4.30-32; Luk 13.18-19

31Yisu atiidi bo kuma kima: «Ipfumu hi mayulu hyafwanina na libutu li mutade, li muutu amiikuna mu ngundu a nde. 32Lo lili libutu li laafulala bukeehe mu mbutu yoosi. Ka hu mbisa ukuna libutu, lo libaakula, libaafulala byosi bi baakuna mu wooto mu bunene. Lo libaakituha muti, na banyunyi bubaatunga byanza bya bo hutso bitabi bya nde.»

Kuma iloho hi hibaadanisa lidaama li mapa

Luk 13.20-21

33Yisu atiidi bo kuma kima mo yiniiyi: «Ipfumu hi mayulu hyafwanina na levure, iloho hi hibaadanisa lidaama li mapa, hi mukaasu amiivolo, na amiipfuuta mu byetso bi bilahi bi lidaama li mapa, te bu lo loosi luudaana.»

Yisu akasalila makuma

Mlk 4.33-34

34Yisu akava ndongisili a nde huli makonge ma baatu mu makuma. A hu li na dyambu tso limosi li nde haleeli bo hwavele a kuma ve. 35Nde hakasa buuna, mana mambu ma Nzambi hayabisi mu munywa a mumbihuli a nde matswiha:

«Me tsa nzambila mu makuma.

Me tsa nzabisa matswehi ma umata pangili a tsi#Mkg 78.2.»

Mbindulili a kuma a himbu hi ibi

36Titswene, Yisu asiisi koonge a baatu, na nde akoti mu nzo. Bayihi ba nde baayasusaha ŋa pedu a nde, na baleeli: «Bindula bisu kuma a hiimbu hi ibi hya mu ngundu.» 37Yisu afutili bo: «Wu ubaakuna muhunu wu mubwe ni Mwana a Muutu, 38ngundu ni tsi, muhunu wu mubwe ni baana ba Ipfumu hi mayulu. Hiimbu hi ibi ni baana ba Nga Bubi. 39Muboho wu akuna mbutu yimbi, ni mukuyi. Tsonzihili ni tsukusu a tsi. Batsonzihi ni bapofi. 40Ni mu buuna, we bu bubaatuupala biimbu bi bibi mu ubwaha byo hutso a mbaahu, sa buba kaka bumosi mu ilumbu hya tsyelele. 41Mwana a Muutu sa atsindaha bapofi ba nde. Bo buumaasa hutso Ipfumu hya nde, boosi ba bubaabwisa bana mu masumu, na ba bubaavaanga ma mabi. 42Na bapofi sa babwaha bo hutso a mbeenge a mbaahu, hu huba bililu na kulili a miinyu. 43Ka baatu ba baakangama mu Nzambi sa ba bamwademe we taangu hutso Ipfumu hya Taata#Dan 12.3 a bo. Woosi nga matswi, nyaha ayuha!»

Busina bu baaswehe

44Yisu abweleele: «Ipfumu hi mayulu hyafwanina na busina bu baaswehe hutso a ngundu. Muutu wu usoolo bwo miibweswehe bwo. Na hutso a kinya, nde uyasuumbasa bisiha byosi bi nde ali na byo, na uyasuumba ngundu mo yiina.

45Ipfumu hi mayulu hyabwefwanina na muutu wu uba sa mumbungu, wu li mu usaha bilabu bi bibwe. 46Bu nde amiimono ilabu hya talu yi yaafulala, nde ubaayasumbasa byosi bi nde ali na byo. Na nde uyasuumba ilabu mo hiina.

Kuma a lihi

47Ipfumu hi mayulu hyabwefwanina na lihi li baabwaha mu mubu, na li lili mu ukaanga batswi ba pila mu pila. 48Bu lo limiiluula mu batswi, balobi baafwana uduta lo ŋa simu. Titswene, bo bubaatsahala na bubaasoolo batswi. Ba babwe, bo bubaasuusa mutso maponzi. Ba baavele a tsongo, bo bubaabuma bo. 49Ni buuna kaka huuba mu ilumbu hya tsukusu a tsi. Bapofi sa bayaatahula babi ŋa hati li batsiitsa, 50na ubwaha bo hutso a mbeenge a mbaahu. Huuna sa huba bililu na kulili a miinyu.»

Busina bu bunyatihi na bu bukulu

51Yisu afuuli bayihi ba nde: «Benu limiitsikaha maana moosi bubwe?» Bo ni ufutala: «Eye.» 52Na nde aleeli bo: «Ni buuna, pasi mulongisi Mikele wu ka muyihi Ipfumu hi mayulu, nde li we mukuutu a nzo wu ubaapalisa bisiha bi binyatihi na bisiha bi bikulu mu iswehili hya nde.»

Bisu Nazareti a bali mu usiila Yisu imiinu ve

Mlk 6.1-6; Luk 4.16-30

53Bu Yisu haamani uleele makuma mo maana, nde amati ŋaana, 54nde ayeni hu musyenge wu nde haakuli. Nde abaandihi ulongese mu nzo a bo yi lisambulu li Bayudaayo. Baatu ba baakayuha ndongisili a nde, baakimuhi na baakafuula: «Tsiki mo yiniiyi huni yaamatila nde? Buni nde ali mu uvaanga bipadi mo biniibi? 55Wunuuwu a ni mwana a salapandi ve? Mariya a ni ngu ande ve? Yaki, Yosefi, Simoni na Yude, a bali baana ba ngu a nde ve? 56Bakedi ba nde a bali boosi ŋa hati la bisu ŋaaniŋa ve? Nde matwala mo maniima moosi huni mamiimatila nde?» 57Na maana moosi maakasa ti bo bavelesiila nde imiinu. Ka Yisu aleeli bo: « A bubaakiinza mumbihuli, mu tsi a nde, buuve mu nzo a nde ve#Yow 4.44.» 58Yesu avaangi ŋaana ndulu bipadi bya hoole, mu tooni apelili a bo yi imiinu.

Currently Selected:

Mataayi 13: TSA

Highlight

Copy

Compare