Pwede abwa 6

Ŋwɔ ǹglɔ̀ zɛɛrɛ akwâ mfo ene akwâ sàambyɛ yɛ â me ge adwe anyi ngɛ

1Éngɛ mmɛ zɔ ŋwɔ ǹglɔ̀ wɛ è chi adwe ene afwɔ mbèmbè ene akwâ sàambyɛ yɛ. Mmɛ zo enyɛm ǹgɛ̀ bi abwaʼ nyɛmɛrɛ chɛ â mwɔ àkɔʼɔ ngɛ, zɔʼ ene etsoʼ deʼ, akwâ ga na m̀bò kumu nɔ kpe, “Zeʼe!” 2Mmɛ kɔʼɔ ekere gɛrɛ zɔ m̀pwɔ̀ bèʼebɔ bla deʼ me tama aŋu. Egho à me kwaʼa m̀pwɔ̀ beʼebɔ yɛ ngɛ me bere ewuantsɛ̀. Â gɛrɛ ge ǹtàm m̀fɔ̀ ato ngɔ. Engɔ gli na àngwè ebiri kamakam ma ngwè à fɔɔ nɔ. Engɔ a na ngo fɔɔ ebiri wɛ à ma ngo ngwe nè bɔ m̀pɛ̀ʼ mɔ ngɛ. 3Èndzobo chɛ engɔ à chi adwe nùrù fyee ngɛ, mmɛ zo enyɛm ǹgɛ̀ kɔʼɔ yɛ à me tɛʼ amɔ achim embèmbè ngɛ ga kpe, “Zeʼe!” 4Éngɛ m̀pwɔ̀ bèʼebɔ tsɛrɛ gli zeʼe afwɔ yɛ atan m̀fɔ̀ à mwɔ ngɛ mwɔ efan. Ngwe à ndɛʼ angwa ebyeŋwɔ̀ mane ekama ebe egho wɛ à me kwaʼa ngɛ é chi m̀bwarambwad efwɔ ese mbɔʼtye bɔ sa gbɛ̀dɛ̀ àmɔ̀ àmɔ̀.

5Èndzobo chɛ eŋwɔ ǹglɔ̀ wɛ à chi adwe nùrù tɛd ngɛ, mmɛ zo enyɛm ǹgɛ̀ kɔʼɔ yɛ à me bwɛrɛ nùrù tɛd ngɛ ga kpe, “Zeʼe!” Mmɛ kɔʼɔ gɛrɛ zɔ m̀pwɔ̀ bèʼebɔ tsɛrɛ edi. Egho wɛ à me kwaʼa m̀pwɔ̀ bèʼebɔ ngɛ me bere ala mo ela abwo mɔ. 6Éngɛ mmɛ zo ala deʼ na etsoʼ nɔ ga abwaʼ nyɛmɛrɛ kɔʼɔ chɛ ekwɛ̀ ngɛ kpe, “E na nɛ̀rɛ̀ afwɛʼ anji ŋwaʼ ene aka ebun ǹkùru ŋwaʼ gɛrɛ nɛ̀rɛ̀ afwɛʼ anji ŋwaʼ ene eka ala deʼ e ma zɔ̀ʼrɔ̀ kpe bɛli ngɛ ètɛd. Bɛli a ne kama ekɛb, bɛʼngɛ mbɔn shi ke tsɔŋɔ ngud olif ene mɔm bo.” 7Èndzobo chɛ eŋwɔ ǹglɔ̀ wɛ à chi adwe nùrù kwɛ̀ ngɛ, mmɛ zo enyɛm ǹgɛ̀ kɔʼɔ nùrù kwɛ̀ yɛ ga kpe, “Zeʼ!” 8Mmɛ kɔʼɔ ekere e zo akwoshi m̀pwɔ̀ bèʼebɔ deʼ. Ekumu egho wɛ à me kwaʼa m̀pwɔ̀ bèʼebɔ yɛ ngɛ à na ewu. Abɛ bɔ kudu ma kìrì achim ngɔ, ma ndɛʼ ekama ebe engɔ é klini antiri bɔ ŋwaʼ efwɔ entiri kwɛ̀ edɔm chwâ. Â ga ebe engɔ kpe e zhudu bɔ efwɔ ese ene ebyeŋwɔ̀ mane chwɔ, achuu mane nyɛmɛrɛ twatwa efwɔ ese. 9Éngɛ ŋwɔ ǹglɔ̀ fuʼu adwe nùrù tan, mmɛ kɔʼɔ zɔ echud yɛ a ma twɔ̀n adwe aŋu ngɛ. Mmɛ zɔ ezhwɛɛrɛ abɔ byɛ â zhudu angɔ mbɔʼnga â sɛɛrɛ ega Ngwe gɛrɛ ga éŋwaʼa mbɔʼ Ngwe na antsɛ nɔ ene aghɛʼnji yɛ mbyɛɛ le ebɛrɛ anyi ngɛ. 10Ezhwɛɛrɛ bɔnɔ flaba ene etsoʼ kɛkɛ kpe, “Masakɛ Angwanìm, ngwo wɛ ngwo me pɛ gɛrɛ mwɔ éŋwaʼa ngɛ, na endzobo tse ngwo ma ngo sɛʼ bɔ efwɔ ese gɛrɛ shi ge enyii akwa abɔ byɛ â zhudu angbɛɛ ngɛ?” 11Ngwe à ndɛʼ angwa dɔɔ ǹdi bla ebe gho ŋwàʼaŋwàʼ abwaʼ angɔ. Â gɛrɛ ga ebe angɔ kpe mbɔn dye kuuru ńtara ntsɔn mpiʼ bwɛrɛ èndzobo nuru bwɔngwa byɛ â mwɔ bɔ afwɛʼ Yeso na mbɔn ngɛ mane bwɔngwa achim kristo byɛ e ma ngo zhudu angɔ na a zhudu angɔ ngɛ ma zeʼe é kla angɔn ngɛ. 12Éngɛ ŋwɔ ǹglɔ̀ fuʼu adwe yɛ à me bwɛrɛ nùrù mfo ngɛ, mmɛ kɔʼɔ zɔ chwâ binni ekama, etaranchwe kwaʼ di na ǹdi ku nɔ. Eta gimkpaʼ kwaʼ fàn na anɔm nɔ. 13Ńtɔrɔta sa nyɛ̀rɛ̀ ezob turu a chwâ ne enta azɔd ma turu èndzobo chɛ efùu kamakam ma fùu ngɛ nɔ. 14Ezob sodo ekere na aŋwɛʼrɛ fudu nɔ. E chi egu ŋwaʼaŋwaʼ mane eklaba ndim ŋwaʼaŋwaʼ afwɔ àmɔ̀. 15Éngɛ m̀fɔ̀rɔ̀ gimkpaʼ efwɔ ese, bwɔ ǹtɔʼ, eto ebe bɔ ebiri, bɔ akɛb, bɔ kamakam, bɔ gimkpaʼ, àdzob mane engɔ byɛ e ne mwɔ àdzob bo ngɛ namma efwɔ alaʼ efwɔ akob yɛ â mwɔ egu ngɛ. 16Angɔ ba sa zɔʼ agu mane akob kpe, “Mbɔn turu akwa njɛɛ kooro angbɛɛ mbɔʼtye engɔ wɛ e me tsɔmɔ edɔm atan m̀fɔ̀ ngɛ ne me né zɔ angbɛɛ bo, ŋwɔ ǹglɔ̀ gɛrɛ ne me né gè enyii akwa njɛɛ bo. 17Anji bɔɔbɔɔ yɛ Ngwe mane ŋwɔ ǹglɔ̀ ma ge enyii akwa bɔ ngɛ shi zeʼe. Tsɛ̀ʼ gho deʼ ma ngo pɛ enyii zɔnɔ bo.”

Currently Selected:

Pwede abwa 6: nbt

Highlight

Copy

Compare