Pwede abwa 5
5
Ŋwɔ ǹglɔ̀ we koʼro é fuʼ aŋwɛʼrɛ fudu
1Ala tsɛrɛ yɛ mmɛ à zɔ efwɔ nklama ngɛ à na aŋwɛʼrɛ fudu, abwo nde egho wɛ à me tsɔmɔ edɔm atan m̀fɔ̀ ngɛ. Â ne ŋwɛʼrɛ abwa ene aŋwɛʼrɛ fudu yɛ ene ebɛɛ gimkpaʼ, gɛrɛ me mɛɛrɛ ene adwe ene akwâ sàambyɛ. 2Mmɛ zɔ angere Ngwe kamakam deʼ è biiri ene etsoʼ kɛkɛ kpe, “Awɛ me koʼro é chi adwe ene akwâ yɛ gɛrɛ fuʼ aŋwɛʼrɛ fudu zɔnɔ ngà?” 3Bɛʼngɛ à ne tsɛʼ gho deʼ ezob, kà a chwâ, kà akwa bɔ kudu à me né fuʼ aŋwɛʼrɛ fudu yɛ, kà de shi kɔʼɔ efwɔ bo. 4Éngɛ mmɛ ku̧u sa sɔ̀ʼɔ mbɔʼnga à ne tsɛʼ gho deʼ à me né fuʼu aŋwɛʼrɛ fudu yɛ kà kɔʼɔ efwɔ bo. 5Éngɛ gho bi abwaʼ abɔ asamabi tɛʼ kwɛ̀ byɛ â mwɔ eto ngɛ ga ena kpe, “Kɔʼɔ anɔ! Ka ku̧u! Ǹgɔmaŋwa, m̀fɔ̀ kɛ efwɔ ekla Juda, ma gho efwɔ agha ekla M̀fɔ̀ Devid ngɛ, a shi ngwe fɔɔ. Engɔ gɛrɛ we koʼro tye è chi adwe ene akwâ sàambyɛ yɛ, gɛ̀rɛ̀ fuʼ aŋwɛʼrɛ fudu yɛ.”
6Éngɛ mmɛ zɔ ŋwɔ ǹglɔ̀ deʼ è me mwɔ na â shi kɛmɛ nɔ, è me tama aghɛɛghɛɛ atan m̀fɔ̀ mane nyɛmɛrɛ kɔʼɔ kwɛ̀ chɛ. Abɔ asamabi tɛʼ kwɛ̀ byɛ â mwɔ eto ngɛ â ne kɛɛrɛ engɔ gè aghɛɛghɛɛ. Engɔ à ne le ǹdwɔrɔ sàambyɛ mane aghɔɔ sàambyɛ. Ela bɔnɔ â ne tamma ene ezhwɛɛrɛ sàambyɛ byɛ Ngwe à me saa ebɛɛ ese gimkpaʼ ngɛ. 7Ǹglɔ̀ yɛ à tam ngɔɔ embè nu aŋwɛʼrɛ fudu yɛ abwo anɔm egho wɛ à me tsɔmɔ edɔm atan m̀fɔ̀ ngɛ. 8Èndzobo chɛ engɔ à shi nu aŋwɛʼrɛ yɛ ngɛ, nyɛmɛrɛ kɔʼɔ kwɛ̀ chɛ, mane abɔ asamabi tɛʼ kwɛ̀ byɛ â mwɔ eto ngɛ, godo a chwâ efàarà ŋwɔ ǹglɔ̀ wɛ. Gho ŋwàʼaŋwàʼ abwaʼ angɔ à ne bere amboo mane ńkuʼru deʼ chɛ â me ndeere ene aklibi àfɔ̀n ngɛ, e me ge adwe efwɔ e shwe yɛ â me tama na atsaʼra bɔ Ngwe nɔ. 9Éngɛ angɔ à kwɔn etsa fe deʼ kpe
“Ngwo we koʼro tye ngwo nu aŋwɛʼrɛ fudu yɛ,
chidi adwe yɛ à me mɛɛrɛ akwâ sàambyɛ yɛ ngɛ
ngwo we koʼro mbɔʼnga â zhudu awɛ, ngwo lɔɔ bɔ Ngwe ene anɔm njɛ.
Ngwo le angɔ shi bɔ Ngwe.
Angɔ à zeʼe efwɔ akla m̀pèrempèrè
Angɔ à na ga atsoʼ m̀pèrempèrè
Angɔ me zeʼe efwɔ ebe m̀pèrempèrè
Angɔ ba ngo mwɔ bɔ m̀pèrempèrè
10Engɔ shi le abɔ ntsɔ shi mwɔ ǹtìmi ètɛ zhiri byɛ e ma fwɛʼ ebe Ngwe bɔ ngɛ.
Angɔ gɛrɛ yà mwɔ ato edɔm ese.”
11Éngɛ mmɛ wu kɔ̀ʼ gɛ̀rɛ̀ zo etsoʼ engere akɛkɛ, e mwɔ ne ètɔɔshin nè ètɔɔshin nè ètɔɔshin nɔ. Angɔ me kɛɛrɛ atan m̀fɔ̀ mane nyɛmɛrɛ kɔʼɔ kwɛ̀ chɛ mane abɔ byɛ â mwɔ eto ngɛ ge aghɛɛghɛɛ. 12Angɔ kwɔn ene etsoʼ kɛkɛ kpe
“Eŋwɔ ǹglɔ̀ wɛ â zhudu ngɛ
we koʼro é nu ekama, àfɔ̀n, azɔm mane eghɛb,
eghɔ, enɛŋɛrɛkɛ mane m̀bɔ̀nɔ!”
13Éngɛ mmɛ zo ela gimkpaʼ byɛ e me ndeere ezob mane a chwâ ngɛ, enji chwâ mane efwɔ ebɔrɔndim ngɛ mane ela gimkpaʼ byɛ e mwɔ efwɔ angɔ ngɛ e ma kwɔrɔ kpe
“M̀bɔ̀nɔ, eghɔ, enɛŋɛrɛkɛ mane ekama
mwɔ ebe engɔ wɛ me tsɔmɔ edɔm atan m̀fɔ̀
mane ebe ŋwɔ ǹglɔ̀ ene akyɛ kengudu.”
14Nyɛmɛrɛ kɔʼɔ kwɛ̀ chɛ ga kpe, “Ekoʼro!” Abɔ byɛ â mwɔ eto ngɛ gunu amɔ a chwâ ghɔ eŋwɔ ǹglɔ̀ wɛ.
Currently Selected:
Pwede abwa 5: nbt
Highlight
Copy
Compare
Share
Want to have your highlights saved across all your devices? Sign up or sign in
© 2022, CABTAL
