Pwede abwa 7

Bɔ Israel 144,000

1Éngɛ mmɛ zɔ engere kwɛ̀ me tamma ene ebɛɛ ese kwɛ̀, me kli m̀pèrè efùu kwɛ̀ chɛ e mwɔ efwɔ ese ngɛ, mbɔʼtye ngɛ efùu deʼ ne me nɛɛ tye e fuu edɔm chwâ, kà efwɔ ebɔrɔndim, kà ene azɔd deʼ bo. 2Mmɛ zɔ angere tsɛrɛ ma kwaʼ à zeʼe anji abɛɛ gli etaranchwe. Engɔ à ne bere anɛ̂ Engwe yɛ mwɔ ekɔʼɔ ngɛ. Ene angwa etsoʼ, engɔ zɔʼ engere kwɛ̀ byɛ Ngwe à shi ndɛʼ ekama ebe angɔ é tsɔŋɔ chwâ mane ebɔrɔndim ngɛ. 3Angere wɛ ga kpe, “Mbɔn ke tsɔŋɔ ese, kà ebɔrɔndim, kà ezɔd bo, bwɛn èndzobo chɛ mbyɛɛ ma ge enɛ̂ ene ekɔshi bɔ afwɛʼ Ngwe bɔ̀ ngɛ.” 4Mmɛ gɛrɛ zo kpe nuru bɔ yɛ engere à ge anɛ̂ Ngwe akɔshi angɔ ngɛ â ne bwɛrɛ na bɔ ètɔɔshin eko ne èsama fyee tɛʼ kwɛ̀ nɔ. À na bɔ efwɔ anɔrɔkla wum ǹchwɔ̀ fyee Israel. 5Efwɔ enɔrɔ ekla Juda â ge enɛ̂ ene bɔ ètɔɔshin wum ǹchwɔ̀ fyee. Efwɔ enɔrɔ ekla Robɛn, bɔ ètɔɔshin wum ǹchwɔ̀ fyee, efwɔ enɔrɔ ekla Gad bɔ ètɔɔshin wum ǹchwɔ̀ fyee. 6Efwɔ enɔrɔ ekla Asha à na bɔ ètɔɔshin wum ǹchwɔ̀ fyee. Efwɔ enɔrɔ ekla Naftali à na bɔ ètɔɔshin wum ǹchwɔ̀ fyee. Efwɔ enɔrɔ ekla Manasɛ â na bɔ ètɔɔshin wum ǹchwɔ̀ fyee. 7Efwɔ enɔrɔ ekla Shimyɔn à na bɔ ètɔɔshin wum ǹchwɔ̀ fyee. Efwɔ enɔrɔ ekla Lɛvi à na bɔ ètɔɔshin wum ǹchwɔ̀ fyee. Efwɔ enɔrɔ ekla Isaka à na bɔ ètɔɔshin wum ǹchwɔ̀ fyee. 8Efwɔ enɔrɔ ekla Zebulun à na bɔ ètɔɔshin wum ǹchwɔ̀ fyee. Efwɔ enɔrɔ ekla Yɔsɛf à na bɔ ètɔɔshin wum ǹchwɔ̀ fyee. Efwɔ enɔrɔ ekla Bɛnjamin à na bɔ ètɔɔshin wum ǹchwɔ̀ fyee byɛ â me le anɛ̂ zɔnɔ.

Ǹtsara yɛ bɔ Ngwe ma ngo le ngɛ

9Aŋu abwa zɔnɔ â fɔɔ ngɛ, mmɛ kɔʼ è zɔ ebaŋabɔ wɛ gho deʼ à ne nɛɛ tye è ta bo ngɛ. Abɔ bɔnɔ â nyɛn zeʼe efwɔ ebɛ m̀pèrempèrè, efwɔ anɔrɔkla m̀pèrempèrè, m̀pèrè bɔ gimkpaʼ, ma ga atsoʼ m̀pèrempèrè, e me tamma efàarà atan m̀fɔ̀ mane ŋwɔ ǹglɔ̀. Angɔ à ne ge ǹdiri bla me beʼre eghama ebwo amɔ. 10Angɔ flaba ene angwa etsoʼ ma ga kpe, “Epweere ne zeʼe ebe Ngwe bɔ yɛ me tsɔmɔ edɔm atan m̀fɔ̀ ngɛ, gɛ̀rɛ̀ zeʼe ebe ŋwɔ ǹglɔ̀!” 11Engere gimkpaʼ â ne tamma me kɛɛrɛ atan m̀fɔ̀ mane bɔ tɛbɛ mane ela kɔʼɔ kwɛ̀. Angɔ gunu etongu amɔ a chwâ efàarà atan m̀fɔ̀ zɔnɔ ndɛʼ eghɔ ebe Ngwe. 12Angɔ à na kwɔrɔ kpe, “Ekoʼro! Ezodo, enɛŋɛrɛkɛ, azɔm, é ndɛʼ ebɛrɛ, eghɔ, ekama mane eghɔ mwɔ ebe Ngwe bɔ ngɔɔ bwɛn efwɔ endzobo kengudu, ekoʼro!”

13Éngɛ gho tɛ̀bɛ bi biiri ena kpe, “Abɔ bɔnɔ e me ge ǹdiri bla nɔ ne ewɛ? Angɔ gɛrɛ ne zeʼe awe?” 14Mmɛ gii ebe angɔ kpe, “Gho kɛ, mmɛ ke nɛɛ bo.” Engɔ gii ena kpe, “Abɔnɔ na angɔ byɛ e shi gli efwɔ ǹgoʼ kɛ̀ ngɛ, angɔ shi so ǹdiri amɔ ene anɔm ŋwɔ ǹglɔ̀ e shi pɛ. 15Ne ǹji yɛ angɔ me tamma efàarà atan m̀fɔ̀ Ngwe, ma ghɔ engɔ nchi mane ǹklì efwɔ ndɔngwe kɛ̀ ngɔ ngɛ. Engɔ wɛ gɛrɛ me tsɔmɔ edɔm atan m̀fɔ̀ ngɛ wa ngo kooro angɔ. 16Angɔ yà ne wu gwɔn nchwɔrɔ kà ku fi̧ri bo. Enchwe yà ne wu twɔ̀n angɔ bo, angɔ gɛrɛ ke ma ngo zɔ akwa twɔn eghɛʼ bo 17mbɔʼnga ŋwɔ ǹglɔ̀ wɛ mwɔ edɔm atan m̀fɔ̀ ngɛ ya ngo mwɔ ǹkɔʼ angɔ. È ya ngo gbèe angɔ saa ene amumun ndim myɛ è ma ndɛʼ etyê ngɛ. Ngwe gɛrɛ ya ngo fla endɛrɛ gimkpaʼ aghɔɔ angɔ.”

Currently Selected:

Pwede abwa 7: nbt

Highlight

Copy

Compare