Pwede abwa 3

Ekɔn ebe ndɔngwe a Sadis

1Engɔ gɛrɛ wu ga ena kpe, Ŋwɛʼrɛ ebe ato efwɔ ndɔngwe a Sadis ga kpe, “Ewunɔ ne ekɔn wɛ e me zeʼe ebe engɔ wɛ me le ezhwɛɛrɛ Ngwe sàambyɛ mane ńtɔrɔta sàambyɛ ngɛ.” È ga kpe, “Mmɛ we nɛɛ abwa yɛ mbɔn ma fwɛʼ ngɛ. Mbɔn na zhuŋu kpe mbɔn na bɔ kɔʼɔ, bɛʼngɛ mbɔn shi mwɔ ma bɔ kudu. 2Mbɔn tamma ene m̀bwɛrɛ, azhwɛɛrɛ wu twàʼrà ezɔɔrɔ kristo yɛ e bli efwɔ akwa ndzɔn ngɛ, mbɔʼtye a ne mɛɛrɛ ku bo, mbɔʼnga mmɛ ke zɔ efwɛʼ mbɔn e me koʼro ene ǹchwɔ̀ efàarà Ngwe ndza bo. 3Éngɛ mbɔn zhuŋu ebwa wɛ mbɔn à bɛɛrɛ gɛrɛ zo ngɛ. Mbɔn sa shi ebwa wɛ gɛrɛ kobo eleabwa bɔɔbɔɔ ndzɔn. Mala mbɔn ne me né tamma ambwɛrɛ bo, shi mmɛ wa ngo zeʼe ne ejii nɔ, mbɔn gɛrɛ ne ma ngo nɛɛ endzobo yɛ mmɛ ma ngo zeʼe ngɛ bo. 4Bɛʼngɛ m̀pùru bɔ deʼ à da bli efwɔ abɛ Sadis byɛ e ne ma le abwa bɔɔbɔɔ bo ngɛ. Angɔ ba ngo zhiri nè mmɛ, me ge ǹdiri bla, mbɔʼnga angɔ me koʼro é gè. 5Abɔ byɛ e ngwe fɔɔ abwa bɔɔbɔɔ ngɛ, gɛrɛ ba ngo ge ǹdiri bla akwa àmɔ̀, mmɛ gɛrɛ ne ma ngo nyiimi akumu angɔ efwɔ aŋwɛʼrɛ etyê bo. Mmɛ wa ngo ga apɛpɛ efàarà àtɛ ngu mane engere mɔ kpe mbɔn na bɔ mbu. 6Abɔ byɛ e me le ètimi é zo ngɛ, zhuru nɛɛ ebwa wɛ azhwɛɛrɛ Ngwe ma ga ebe ndɔrɔngwe ngɛ.”

Ekɔn ebe ndɔngwe Filadɛlfya

7Engɔ gɛrɛ wu ga ena kpe Ŋwɛʼrɛ ebe ato a ndɔngwe Filadɛlfya kpe, “Ewunɔ ne ekɔn e me zeʼe ebe engɔ wɛ me pɛ gɛrɛ ma gà éŋwaʼa ngɛ. Engɔ wɛ me le ekama é klini bɔ na Devid à ma klini ngɛ. Engɔ wɛ e fuʼu, tsɛʼ gho deʼ me né gwɔbɔ bo, e gɛrɛ gwɔbɔ tsɛʼ gho deʼ me né fuʼ bo ngɛ. 8Mmɛ we nɛɛ abwa gimkpaʼ yɛ mbɔn ma le ngɛ. Mbɔn kɔʼɔ anɔ, mmɛ shi fuʼu enduʼndɔ shi endɔn wɛ gho deʼ ne me né gwɔbɔ bo ngɛ. Mmɛ we nɛɛ kpe mbɔn ne le ma âfwɔ ekama, éngɛ mbɔn a zo ega ngu a da ne tɔrɔ angu bo. 9Mmɛ wa le abɔ byɛ e mwɔ efwɔ ǹtìmi asatan, ma ga andɔɔ kpe mbɔɔ na bɔ Juu shi ne mwɔ bɔ Juu bo ngɛ zeʼe gunu àmɔ̀ enji elo mbɔn. Angɔ gɛrɛ ba ngo nɛɛ kpe mmɛ we doʼo angɔn. 10Na aŋu mbɔn shi kɔnɔshin, klini etaa e shi etsɛrɛ ndza ngɛ, mmɛ wa ngo kɔʼɔ angɔn èndzobo chɛ akwa̧ʼra ma ngo zeʼe ebe abɔ byɛ e ma tsɔmɔ efwɔ ese ngɛ. 11Afwɔ ya sa ndada mmɛ wa zeʼe. Mbɔn fɔɔ embè é le ebɛrɛ ndzɔn ene mmɛ e me kama mbɔʼtye gho deʼ ne nduʼru enɛrɛ ndzɔn bo. 12Mala mbɔn ngwe fɔɔ, shi mmɛ wa le mbɔn mwɔ na aku ene ndɔngwe kɛ̀ ndza nɔ. Mbɔn yà ne nyɛrɛ efwɔ anji deʼ bo. Mmɛ wa ngo ŋwɛ̀ʼrɛ̀ ekumu Ngwe ndza mane ekumu abɛ Ngwe ndza yɛ mwɔ Jerusalɛm fe, yɛ è me zeʼe ekere ebe Ngwe ndza ngɛ mane ekumu fe ngu akwa ndzɔn. 13Egho wɛ me le ètimi é zo ngɛ zhuru ebwa wɛ azhwɛɛrɛ Ngwe ma ga ebe ndɔrɔngwe ngɛ.”

Ekɔn ebe ndɔngwe a Laodesya

14Engɔ gɛrɛ wu ga ena kpe Ŋwɛʼrɛ ebe ato efwɔ ndɔngwe a Laodisya kpe,

“Ewunɔ ne ekɔn e me zeʼe ebe engɔ wɛ e ma zɔʼrɔ kpe Amɛn ngɛ, engɔ wɛ ma pwèdè éŋwaʼa mbɔʼ Ngwe anchwɔnchwɔ ngɛ. Engɔ wɛ Ngwe à ndeere ela gimkpaʼ nyɛ̀rɛ̀ zèʼe achim ngɔ ngɛ. 15Mmɛ we nɛɛ abwa gimkpaʼ yɛ mbɔn ma fwɛʼ ngɛ. Mmɛ we nɛɛ kpe mbɔn ke ma jù kà nɔm ene abwa ndza bo. Mbɔn be koʼro e ma jù kà ma nɔm. 16Bɛʼngɛ na aŋu mbɔn me ndɛrɛ ne ma jù kà nɔm ene ebɛrɛ ndzɔn ene mmɛ bo ngɛ, mmɛ wa ngo tù angɔn waʼ ne emɛn nɔ.” 17Mbɔn gà kpe mbɔn be fɔ̧rɔ, mbɔn be le ela gimkpaʼ, mbɔn ke ma ke ala deʼ tsɛʼ bo. Bɛʼngɛ mbɔn de ke nɛɛ kpe mbɔn na bɔ e ma zɔ ǹgoʼ, e ma klasɔn ene mbɔn bo. Mbɔn ke nɛɛ kpe mbɔn na bɔ ndzaŋa, mwɔ àfò aghɔɔ, gɛ̀rɛ̀ mwɔ nè akwa kɛ́ɛ bo. 18Enyɛrɛ éngɛ, mmɛ ndɛʼ etɛʼɛ endɔn kpe, mbɔn zɔn aklibi àfɔ̀n wɛ me pɛ ngɛ ena mbɔʼtye mbɔn fɔ̧rɔ, mbɔn gɛrɛ zɔnɔ ǹdiri bla ena é kooro akwa ndzɔn anyi mbɔʼtye eju ne sa bèrè angɔn bo. Mbɔn gɛrɛ zeʼe zɔn ekye ena ge aghɔɔ ndzɔn, mbɔʼtye mbɔn sa zɔ akwâ. 19Mmɛ wa bwe gɛrɛ ma todo abɔ byɛ mmɛ me doʼo angɔ ngɛ. Éngɛ, sa ga éŋwaʼa gɛrɛ kobo eleabwa njɛ. 20Kɔʼɔ anɔ, mmɛ we tama enduʼndɔ ma gbeʼre, gho deʼ wɛ zo etsoʼ ngu fuʼu enduʼndɔ ngɛ, mmɛ wa nyii zeʼe efwɔ ndɔ gɛrɛ nde nè engɔ, engɔ gɛrɛ nde nè mmɛ. 21Ebe egho wɛ ma ngwè fɔɔ ngɛ, mmɛ wa ngo ndɛ̀ʼ afwɔ ebe engɔ é tsɔmɔ ebara mfu edɔm atan m̀fɔ̀ nkirinkin aŋu mmɛ à ngwe fɔɔ bɔ m̀pɛ̀ʼ mbu me tsɔmɔ enjitsɔ ebara àtɛ ngu edɔm atan m̀fɔ̀ mɔ ngɛ. 22Egho wɛ me le ètimi é zo ngɛ, zhuru ebwa wɛ azhwɛɛrɛ Ngwe ma gà ebe ndɔrɔngwe ngɛ.

Currently Selected:

Pwede abwa 3: nbt

Highlight

Copy

Compare